Ta Davhida loko a hlula Vafilista, ni Vamowabu, ni Vasiriya, ni Vaedomu.
1Endzhaku ka sweswo, Davhida a lwa ni Vafilista, a va hlula, kutani Davhida a teka Metege-Ama emavokweni ya Vafilista. 2Kutani a hlasela Vamowabu, a va etlerisa ehansi a va pima hi ngoti: lava ringanaka tingoti timbirhi a va dlaya, ni lava ringanaka ngoti yin'we a va hanyisa. Hi sweswo Vamowabu va fumiwa hi Davhida, va ta luva eka yena.
3Kutani Davhida a lwa na Hadadi-Esere, n'wana Rehobo, hosi ya Soba, loko a ha ya tiyisa vuhosi bya yena enambyeni wa Yufrata; 4Davhida a n'wi tekela vanhu lava khandziyaka tihanci va 1 700, ni vanhu lava fambaka hi milenge va 20 000; Davhida a xeka swihlapfa swa tihanci ta tigolonyi hinkwato, kambe a hlayisa swipani swa dzana. 5Vasiriya va Damaska va ta pfuna Hadadi-Esere, hosi ya Soba, kambe Davhida a dlaya vanhu va 22 000 va Vasiriya. 6Kutani Davhida a veka vanhu va nyimpi ya yena ku langutela Siriya ya Damaska; kutani Vasiriya va fumiwa hi Davhida, va ya luva eka yena. Sweswo Yehovha a a ponisa Davhida hinkwako laha a yaka kona. 7Davhida a teka switlhangu swa nsuku leswi ngi swi ri swa malandza ya Hadadi-Esere, a swi tisa eYerusalema. 8Kutani Davhida a teka koporo leyo tala ngopfu eBeta ni le Berotayi, miti ya Hadadi-Esere.
9Kambe Toyi, hosi ya Hamata, a twa leswaku Davhida a a hlurile tinyimpi hinkwato ta Hadadi-Esere; 10kutani Toyi a rhuma n'wana wa yena Yoramu eka hosi Davhida ku n'wi rungula ni ku khensa hikuva a a lwile na Hadadi-Esere, a va a n'wi hlula; hikuva Hadadi-Esere a a lwa na Toyi. Yoramu a a tamele swibya swa silivhere ni swibya swa nsuku, ni swibya swa koporo. 11Kutani hosi Davhida a swi hlawulela Yehovha, swin'we ni silivhere ni nsuku leswi a swi hlawuleke, swi hume ematikweni hinkwawo lawa a ma hluleke: 12etikweni ra Siriya ni ra Mowabu, ni ka vana va Amoni, ni ka Vafilista, ni ka Vaamaleke, ni le xumeni xa Hadadi-Esere n'wana Rehobo, hosi ya Soba.
13Davhida a kurisa kambe vito ra yena loko a vuya eku hlaseleni ka Vasiriya enkoveni wa mungu, a dlaya vanhu va 18 000. 14Kutani a veka varindzi etikweni hinkwaro ra Edomu, Vaedomu hinkwavo va fumiwa hi Davhida. Sweswo Yehovha a a ponisa Davhida hinkwako laha a yaka kona.
15Davhida a a fuma Vaisraele hinkwavo, kutani Davhida a tshama a yingisa timhaka ta tiko hinkwaro ra yena, a va a ti lulamisa. 16Yowabu n'wana Seruya, a a ri ndhuna ya nyimpi; na Yoxafati, n'wana Ahiludi a a ri muhlayisi wa matsalwa; 17Sadoki, n'wana Ahituba, na Ahimeleke n'wana Abiyatara a va ri vaprista; Seraya, yena, a a ri mutsari. 18Benaya, n'wana Yehoyada, a a ri ndhuna ya Vakereti ni ya Vapeleti. Loko va ri vana va Davhida, a ti ri tindhuna ta hosi.
