TIMHAKA 1

₁Oho Teyofilo! Ebukwini yo sungula, ndzi tsarile timhaka hinkwato leti Yesu a nga sungula ku ti endla ni ku ti dyondzisa, ₂ku ko ku fika siku leri a nga tlhandlukisiwa etilweni ha rona, loko a lerisile hi Moya lowo Kwetsima vaapostola lava a va hlawuleke, ₃va nga lava, loko a twisiwe ku vaviseka, a nga tikomba eka vona a hanya, hi swikombiso leswo tala leswi khorwisaka, va n'wi vona hi masiku ya mune wa makume, a ri karhi a vula ta ku fuma ka Xikwembu.

₄Kakuloko a hlengeletene na vona, a va lerisa, a ku: “Mi nga tshuki mi suka eYerusalema, kambe mi langutela lexi Tatana a mi tshembiseke xona, lexi mi xi tweke eka mina; ₅hikuva Yohane, kunene u khuvurile hi mati kambe n'wina mi ta khuvuriwa hi Moya lowo Kwetsima, loko ku hundzile masiku ma nga ri mangani.” ₆Vona lava hlengeletaneke kona, va n'wi vutisa, va ku: “Hosi, xana u ta pfuxa enkarhini wolowo ku fuma ka Israele xana?” ₇A ku eka vona: “A swi mi fanelangi ku tiva tinguva, hambi yi ri mikarhi leyi Tatana a tihlawuleleke yona hi vukulukumba bya yena ntsena; ₈kambe mi ta nyikiwa matimba, siku Moya lowo Kwetsima wu taka eka n'wina; kutani mi ta va timbhoni ta mina kwala Yerusalema, ni le tikweni hinkwaro ra Yudiya, ni ra Samariya, ni ku ya fika emakun'wini ya misava.”

₉Kuteloko a vulavurile timhaka teto, a tlhandlukisiwa, va ri karhi va n'wi languta; kutani papa ri n'wi siva emahlweni ya vona. ₁₀Va ku va ha tlakusile mahlo ya vona etilweni, loko a ri karhi a tlhandluka, vonani, ku humelela eka vona vavanuna vambirhi, va ambele swo basa, ₁₁va ku: “Vavanuna va Galeliya, mi yimele yini mi langutile etilweni? Yesu loyi a tekeriweke etilweni a ri exikarhi ka n'wina, u ta tlhela a vuya hi mukhuva lowu mi n'wi voneke a ya etilweni ha wona.”

₁₂Kutani va suka entshaveni leyi va nge ya Mitlhwari, leyi nga ekusuhi na Yerusalema, hi mpfhuka lowu ringanaka ndlela ya siku ra Savata, kutani va tlhelela eYerusalema. ₁₃Kuteloko va nghenile va khandziya endlwini leyi nga ehenhla, laha ku tshameke Petro na Yohane, na Yakobo, na Andriya na Filipi, na Tomasi, na Bartolomi, na Matewu, na Yakobo, n'wana Alfiya, na Simoni Muhiseki, na Yuda, makwavo wa Yakobo. ₁₄Volavo hinkwavo a va tiyisela hi mbilu yi ri yin'we emikhongelweni, va ri ni vavasati, na Mariya, mana wa Yesu ni vamakwavo va yena.

₁₅Hi masiku walawo, Petro a yima exikarhi ka vadyondzisiwa (vunyingi bya vona lava hlengeletaneke a va lava ku va dzana ni makume mambirhi), a ku: ₁₆“Vavanuna varikwerhu, a swi fanela leswaku Tsalwa ri hetiseka, leri nga bvumbhiwa hi Moya lowo Kwetsima, hi nomu wa Davhida, leri vuleke Yudasi, loyi a tiendleke mufambisi wa lava khomeke Yesu. ₁₇Hikuva a a hlayiwa exikarhi ka hina, kutani u averiwile ntirho lowo. ₁₈Kambe, kuteloko a tixavele nsimu hi hakelo ya ku homboloka, a tisunga hi ku tiwisa ehansi, a handzuka hi le xikarhi, kutani marhumbu ya yena ma huma hinkwawo. ₁₉Mhaka leyi, yi tiviwa hi hinkwavo lava akeke eYerusalema, va ko va thya nsimu yoleyo eHakeldama hi ririmi ra vona, hileswaku Nsimu ya Ngati. ₂₀Hikuva ku tsariwile ebukwini ya Tipisalema leswaku: ‘Byetlelo bya yena a byi hundzuke rhumbi; ku nga ha vi na munhu la tshamaka kona!’ na kambe: ‘Un'wana a a teke vurisi bya yena.’ ₂₁Hikwalaho-ke, eka vavanuna lava ngi va ri na hina emikarhini hinkwayo leyi Hosi Yesu a nga tshama a nghena ni ku huma exikarhi ka hina, ₂₂ku sungula eku khuvuleni ka Yohane ku ya fika siku leri a tekeriweke etilweni a ri exikarhi ka hina, un'wana wa vona u fanele ku va swin'we na hina mbhoni ya ku pfuka ka yena.”

₂₃Hikwalaho va humesa vambirhi: Un'wana a a ri Yosefa, la nga thyiwa Barsaba, loyi va nga engeta va n'wi thya Yusto; un'wana a a ri Matiyasi. ₂₄Kutani va khongela, va ku: “Hosi, wena la tivaka timbilu ta hinkwavo, kombisa loyi u n'wi hlawuleke eka lavambirhi lava, ₂₅leswaku a teka vutshamo bya ntirho lowu ni vuapostola lebyi Yudasi a byi tshikeke ku ya exivandleni xa yena.” ₂₆Kutani va hlahluva hi nhlolo, kutani nhlolo yi humesa Matiyasi; kutani a hlayiwa exikarhi ka vaapostola lava khume na un'we.