Ta tiko ra Ogo, hosi ya Baxani, loko ri hlaseriwa.
1“Hi lo hundzuka, kutani hi tlhandluka etlhelo ra Baxani. Kavaloko Ogo, hosi ya Baxani, ni tiko ra yena hinkwaro, va ta hlangana na hina eEdreyi, va lava ku lwa na hina. 2Kambe Yehovha a ku eka mina: ‘U nga n'wi chavi, hikuva ndzi n'wi nehile emavokweni ya wena, yena ni vanhu va yena hinkwavo, ni tiko ra yena, u ta n'wi endla kukotisa leswi u nga endla eka Sihoni, hosi ya Vaamori la akeke eHexiboni.’ 3Kutani Yehovha, Xikwembu xa hina, xi neha emavokweni ya hina, na yena Ogo, hosi ya Baxani, ni tiko hinkwaro ra yena, hi n'wi hlasela ku ko ku hela vanhu va yena. 4Enkarhini wolowo hi tekile miti hinkwayo ya yena; a ku vanga na muti wun'we lowu hi nga wu tekangiki: yi ri miti ya 60, ni tiko hinkwaro ra Arigobi, ku ri ku fuma ka Ogo wa Baxani. 5Miti leyi hinkwayo a yi biyiwile hi marhangu layo leha, ni timbanti ni tinghole; ku nga hlayiwangi miti leyi nga biyiwangiki leyo tala ngopfu. 6Hi va yirisile kukotisa leswi hi nga swi endla eka Sihoni, hosi ya Hexiboni, loko hi yirisa vavanuna ni vavasati ni vana. 7Kambe hi titekele swifuwo hinkwaswo, ni leswi phangiweke emitini.
8“Enkarhini wolowo hi tekile ka tihosi letimbirhi ta Vaamori tiko leri nge hase ka Yordani, ku suka enambyeni wa Arinoni, ku ya fika entshaveni ya Hermoni. 9(Vasidoni va vula Hermoni eSiriyoni, kambe Vaamori va yi vula Seniri.) 10Hi tekile miti hinkwayo leyi nga erivaleni ri nga tiko ra Giliyadi hinkwaro, ni tiko ra Baxani hinkwaro, ku ya fika eSaleka na Edreyi, leyi nga miti ya ku fuma ka Ogo, wa Baxani. 11(Hikuva Ogo hosi ya Baxani a a sarile a ri swakwe wa rixaka ra swinkontlonkontlo. Xana mubedo wa yena, wu nga mubedo wa nsimbhi a wu nga ri eRabata, emutini wa Vaamoni xana? Ku leha ka wona swi ri swisungunhu swa 9, ni ku anama ka wona swisungunhu swa mune, swi ri swisungunhu swa wanuna.)
Ku avanyisiwa ka tiko leri nga evuxeni bya Yordani.
12“Hi tekile tiko leri enkarhini wolowo. Ku suka eArowere loyi nga enambyeni wa Arinoni, ni hafu ya ntshava ya Giliyadi, ni miti ya yona ndzi swi nyikile va Rhuveni ni va Gadi; 13leswi seleke swa Giliyadi, ni tlhelo hinkwaro ra Baxani leri nga tiko ra Ogo, ndzi ri nyikile hafu ya nyimba ya Manase; tiko hinkwaro ra Arigobi ni ra Baxani hinkwaro, hi leri vuriwaka tiko ra Varefayimi.
14“Yayiro, n'wana Manase, a teka tiko hinkwaro ra Arigobi, ku fika endzilakaneni wa Vagexuri ni Vamaakati; kutani a ri thya vito ra yena; i miti ya Baxani leyi vuriwaka ninamuntlha miti ya Yayiro. 15Kutani ndzi nyikile Makiri tiko ra Giliyadi. 16Eka va Rhuveni ni va Gadi ndzi va nyikile tlhelo ra tiko ra Giliyadi, ni tiko leri fikaka enambyeni wa Arinoni, exikarhi ka nkova lowu nga ndzilakana, ni ku ya fika enkoveni wa Yaboko, endzilakaneni wa vana va Amoni, 17ni rivala, na Yordani lowu nga ndzilakana, ku suka eKinereta, ku ya fika eLwandle ra Rivala, ri nga Lwandle ra Munyu, ehansi ka ntshava ya Pisga evuxeni.
18“Enkarhini wolowo ndzi mi lerisile ndzi te: ‘Yehovha, Xikwembu xa n'wina xi mi nyikile tiko leri leswaku ri va ra n'wina. N'wina hinkwenu vavanuna va matimba, mi ta famba mi hlomile emahlweni ka vamakwenu, vana va Israele. 19Vasati va n'wina ntsena ni vananyana va n'wina, ni swifuwo swa n'wina — (ndza swi tiva leswaku mi ni mitlhambi leyo tala) — swi ta sala emitini leyi ndzi mi nyikeke yona, 20Yehovha a ko a wisisa vamakwenu kukotisa n'wina, kutani na vona va ta fuma tiko leri Yehovha a va nyikeke rona ehase ka Yordani; kutani un'wana ni un'wana u ta tlhelela erifuweni ra yena leri ndzi mi nyikeke rona.’
21“Enkarhini wolowo ndzi lerisile Yoxuwa, ndzi te: ‘Mahlo ya wena ma vonile hinkwaswo leswi Yehovha, Xikwembu xa n'wina, xi swi endleke eka tihosi letimbirhi Yehovha u ta endlisa sweswo eka matiko hinkwawo lawa u nga ta nghena eka wona: 22Mi nga tshuki mi va chava, hikuva Yehovha, Xikwembu xa n'wina, xi ta mi lwela xi ri xona.’
23“Enkarhini wolowo, ndzi khongerile Yehovha, ndzi te: 24‘Hosi Yehovha u sungurile ku kombisa nandza wa wela vukulu bya wena, ni matimba ya voko ra wena, hikuva Xikwembu i xihi ematilweni ni le misaveni lexi tivaka ku tirha mitirho ni maendlelo kukotisa ya wena? 25Wa nga ndzi pfumelela ku hundza ndzi ta vona tiko lerinene leri nga emahlweni ka Yordani, ni ntshava leyinene ya Lebanoni.’ 26Kambe Yehovha u ndzi holoverile hikwalaho ka n'wina, a nga ndzi yingisanga; kutani Yehovha u te eka mina: ‘Swi ringene, u nga ha engeti u ndzi byela mhaka leyi. 27Khandziya enhlohlorhini ya Pisga, u tlakusa mahlo ya wena evupeladyambu, ni le n'walungwini, ni le dzongeni, ni le vuxeni, u languta hi mahlo ya wena, hikuva u nga ka u nga peli Yordani loyi. 28Lerisa Yoxuwa, u n'wi tiyisa, ni ku n'wi khongotela, hikuva hi yena la nga ta famba emahlweni ka tiko, ni loyi a nga ta va nyika tiko leri u nga ta ri vona, ri va ndzhaka ya vona.’ 29Kutani hi tshamile entshaveni, hi langutene na Beta-Peyori.
