Timhaka leti kombisaka khombo ra ku hanya ni ku pfuna ka vutlhari.
1Ku twakala lokunene ku sasekile ku tlula mafurha ya risuna, ni siku ra ku fa ri tlula siku ra ku velekiwa. 2Swi sasekile ku ya endlwini ya swirilo, ku tlula ku ya endlwini ya mikhuvo; hikuva kona hilaha ku helaka munhu wihi ni wihi, kutani munhu la hanyaka u ehleketa hakona. 3Tingana ti sasekile ku tlula mafenya, hikuva hambi munhu a onye mombo, mbilu ya yena yi nga va yi basile. 4Mbilu ya lavo tlhariha yi le ndlwini ya swirilo kasi mbilu ya swihunguki yi rhandza yindlu yo tsaka.
5Swi sasekile loko munhu a yingisela ku holovela ka lavo tlhariha ku ri ni ku yingisela risimu ra swihunguki. 6Hikuva kukotisa ku pfuma ka mitwa leyi tshiveriweke ehansi ka mbita, swi tano ni ku hleka ka swihunguki. Swoleswo na swona i vuhava.
7Kunene, masangu ma hlanyisa la tlhariheke, kambe tinyiko ti onha mbilu ya munhu. 8Makumu ya mhaka ma tlula masungulo ya yona. Mbilu yo leha yi sasekile ku tlula mbilu leyi tikurisaka. 9U nga tshuki u hatlisa ku kariha embilwini ya wena, hikuva vukari byi salela exifuveni xa xihunguki.
10U nga tshuki u ku: “Hikwalaho ka yini masiku ya khale a ma sasekile ku tlula masiku ya namuntlha xana?” Hikuva loko u vutisa mhaka leyi, a hi ku vutisa hi vutlhari. 11Vutlhari byi sasekile kukota ndzhaka, byi tlula ni ndzhaka eka lava vonaka dyambu. 12Hikuva munhu u le ndzhutini wa vutlhari, kukotisa loko a ri endzhutini wa mali; na kona ku tiva ku sasekile hikuva vutlhari byi hanyisa lava nga na byona.
13Xiyisisa ntirho wa Xikwembu, hikuva i mani la nga ololoxaka lexi petsiweke hi xona? 14Hi siku ra ku kateka, tsaka, kambe hi siku ra khombo anakanya. Xikwembu lexi endleke un'wana ni un'wana leswaku munhu a nga tshuki a tiva nchumu wa leswi nga ta n'wi humelela endzhaku.
15Leswi hinkwaswo ndzi swi vonile hi siku ra mina ra vuhava. Ku ni munhu wa ku lulama la lovaka eku lulameni ka yena, kasi ku ni munhu wa ku homboloka la andzisaka masiku ya yena eku hombolokeni ka yena. 16U nga tshuki u tiendla la lulameke ku tlurisisa, na swona, u nga tshuki u tiveka la tlhariheke ku tlurisa, hikuva a u ta tilovisela yini xana? 17U nga tshuki u tiendla lowo biha ku tlurisisa, kambe u nga tshuki u tiendla xihunguki, hikuva a u ta fela yini wu nga si va nkarhi wa wena xana?
18Swi sasekile loko u tamela lexi, na rona voko ra wena ri nga tshuki ri fularhela lexiya, hikuva la chavaka Xikwembu u huma emakhombyeni hinkwawo.
19Vutlhari byi nyika lavo tlhariha matimba ku tlula vafambisi va khume va matimba lava nga emutini. 20Kunene a ku na munhu wo tlhariha emisaveni la nga dyohiki ni siku ni rin'we. 21Loko swi ri tano, u nga hlayisi marito hinkwawo lama vulavuriwaka, u nga ti tshuka u yingisa nandza wa wena loko a ku hleva. 22Hikuva mbilu ya wena yi tiva swisandzu leswinyingi leswi, na wena u nga hleva van'wana ha swona.
23Hinkwaswo ndzi swi ringetile hi vutlhari ndzi ku: “Ndzi ta va la tlhariheke!” Kambe swa ha ri ekule na mina. 24Leswi ngi swi ri kona swi le kule, swi entile ngopfu, la nga ta swi kuma i mani xana?
25Kutani ndzi pfumelelana ni mbilu ya mina ku lava ni ku tiva, ni ku lavisisa vutlhari ni ku tivisisa leswaku ku homboloka i vuhunguki, ni vuphukuphuku i rihuhu. 26Kutani ndzi kuma leswaku wansati loyi mbilu ya yena yi fanaka ni rikoka, ni mitlhamu, loyi mavoko ya yena swi nga swiboho, u bava ku tlula rifu. La lulameke emahlweni ka Xikwembu, u ta n'wi chupukela, kambe mudyohi u ta phasiwa hi yena.
27Languta lexi ndzi xi kumeke, ku vula Muvuri, loko ndzi ri karhi ndzi ehleketa mhaka yin'wana ni yin'wana leswaku ndzi kuma xiga xa yona. 28Ni sweswi mbilu ya mina ya ha xi lava, kambe a yi si xi kuma; exikarhi ka khume ra madzana ya vanhu ndzi kumile wanuna un'we, kambe exikarhi ka vavasati hinkwavo, wansati a ndzi n'wi kumanga. 29Languta ntsena lexi ndzi xi kumeke: Hi leswaku Xikwembu xi endlile vanhu lava lulameke, kambe vona va lavile mikhuva yo tala.
