ESTERE 2

₁Endzhaku ka sweswo, kuteloko vukari bya Ahasuwerusi byi herile, a tsundzuka Vhasiti ni leswi endliweke hi yena ni leswi kaneriweke hi yena. ₂Kutani malandza lama tirhelaka hosi ma ku: “A ku laveriwe hosi vanhwana lavantshwa, lava sasekeke; ₃kutani ematikweni hinkwawo ya ku fuma ka yona, hosi a yi lerise tindhuna leswaku va hlengeleta vanhwana hinkwavo lavantshwa, lavo saseka, va tisiwa eXuxani, ntsindza, endlwini ya vavasati, evuhlayiselweni bya Hegayi, ndhuna ya hosi ni mulanguteri wa vavasati; ₄va nyikiwa hi yena maakha ya vona; kambe wanhwana la nga ta tsakisa hosi, a a vekiwe nkosikazi ematshan'weni ya Vhasiti.” Mhaka yoleyo yi tsakisa hosi, kutani a endla sweswo.

₅A ku ri ni wanuna wa Muyuda eXuxani ntsindza, la vuriwaka Mordekayi, n'wana Yayiro, n'wana Ximeyi, n'wana Kixi, Mubenjamini. ₆A a susiwe eYerusalema a yisiwa evukhumbini kun'we na Yekoniya hosi ya Yuda, loyi ingi a yisiwile evukhumbini hi Nebukadnetsara, hosi ya Babilona. ₇A a ri karhi a wundla Hadasa, la nga Estere, n'wana hahani wa yena, a nga ri na tata wa yena ni mana wa yena; nhwanyana yeloyi a a sasekile, a languteka; siku ku faka tata wa yena ni mana wa yena, Mordekayi u n'wi hlayisile, a n'wi endla n'wana wa yena.

₈Kuteloko rito ra hosi ni ku lerisa ka yona swi tiviwile, ni loko vanhwana lavanyingi va hlengeletiwile eXuxani, ntsindza, evulangutelweni bya Hegayi, na yena Estere a yisiwa endlwini ya hosi, evulangutelweni bya Hegayi, mulanguteri wa vavasati. ₉Wanhwana a n'wi tsakisa, kutani a kuma tintswalo eka yena; a hatlisa a n'wi nyika maakha ya yena ni swakudya swa yena, a n'wi nyika ni vanhwanyana va ntlhanu na vambirhi lava hlawuriweke endlwini ya hosi, kutani yena a n'wi yisa ni vanhwana va yena ekamareni leyo saseka ku tlurisa endlwini ya vavasati.

₁₀Kambe Estere a nga n'wi tivisanga xivongo xa rikwavo; ni loko ku ri ku tswariwa ka yena, hikuva Mordekayi a a n'wi lerisile leswaku a nga tshuki a titivisa. ₁₁Hi siku rin'wana ni rin'wana, Mordekayi a a tifambela emahlweni ka rivala ra yindlu ya vavasati, ku tiva hilaha Estere a tshameke hakona, ni leswi nga ta n'wi humelela.

₁₂Kuteloko ku fike nkarhi wa vanhwana hinkwavo wa ku nghena ha un'we un'we eka hosi Ahasuwerusi, va ri karhi va tilunghisile hi ku lerisa loku lerisiwaka vavasati hi tin'hweti ta khume na timbirhi, hikuva masiku ya ku tilunghisa ka vona a ma tshamisise sweswo: hi tin'hweti ta ntlhanu na yin'we, a va tola mafurha ya mirha, hi tin'hweti tin'wana ta ntlhanu na yin'we va tola maakha lama nun'hwelaka ni swin'wana; ₁₃wanhwana yeloyi a nghena eka hosi; hinkwaswo leswi ingi a swi lava, a nyikiwa swona leswaku a huma na swona endlwini ya vavasati a ya endlwini ya hosi. ₁₄A nghena kona nimadyambu; nimixo a tlhelela endlwini ya vumbirhi ya vavasati, evulangutelweni bya Xaaxigazi, ndhuna ya hosi, mulanguteri wa vasati va hosi; a a nga tlheri a nghena eka hosi, loko ku nga ri loko a naveriwa hi hosi, a vuya a vitiwa hi vito ra yena.

₁₅Loko a ri Estere, n'wana Abihayili, hahani wa Mordekayi, loyi ingi a n'wi hlayisile, a n'wi endle n'wana wa yena, siku ku fikaka nkarhi wa yena wa ku nghena eka hosi, a nga lavanga nchumu loko xi nga ri lexi ingi a xi byeriwile hi Hegayi, ndhuna ya hosi, mulanguteri wa vavasati; kutani Estere a kuma tintswalo eka hinkwavo lava n'wi vonaka. ₁₆Estere a yisiwa sweswo eka hosi Ahasuwerusi, endlwini ya yena ya vuhosi, en'hwetini ya vukhume, yi nga n'hweti ya Tebete, elembeni ra vuntlhanu na mambirhi ra ku fuma ka yena. ₁₇Hosi yi rhandza Estere ku tlurisa vavasati van'wana hinkwavo, kutani a kuma tintswalo ni ku amukeriwa emahlweni ka yena ku tlula vanhwana van'wana hinkwavo; kwalaho a n'wi tlhandleka harhi ya vukosikazi enhlokweni, kutani a n'wi veka nkosikazi ematshan'weni ya Vhasiti. ₁₈Kutani hosi yi endlela tihosana ta yena hinkwato ni tindhuna ta yena nkhuvo lowukulu, wu nga nkhuvo wa Estere, a hunguta ndzuvo wa matiko, kutani a nyika tinyiko hilaha hosi yi nga nyikaka hakona.

₁₉Siku ku hlengeletanaka vanhwana ra vumbirhi, Mordekayi a a tshamise emahlweni ka nyangwa ya hosi. ₂₀Tanihi loko Estere a lerisiwile hi Mordekayi, a nga tivisangi ku tswariwa ka yena ni loko ri ri rixaka ra rikwavo hikuva Estere a endle leswi a swi byeriweke hi Mordekayi, kukotisa siku lero loko a ri karhi a kurisiwa hi yena.

₂₁Emikarhini yoleyo, Mordekayi loko a ri karhi a tshamile emahlweni ka nyangwa ya hosi Bigitana na Terexi tindhuna letimbirhi ta hosi, va nga valanguteri va tinyangwa, va karihela hosi, kutani va ringeta ku khoma hosi Ahasuwerusi. ₂₂Mhaka yoleyo yi tiviwa hi Mordekayi, kutani a yi tivisa nkosikazi Estere, Estere yena a byela hosi hi vito ra Mordekayi. ₂₃Mhaka leyo yi lavisisiwa, yi kumiwa leswaku yi tano, kutani va hayekiwa havambirhi emhandzeni; kutani timhaka leto ti tsariwa ebukwini ya timhaka ta ku fuma, emahlweni ka hosi.