EKSODA 14

₁Yehovha a vulavula na Muxe, a ku: ₂“Byela vana va Israele va hambuka va dzima mitsonga emahlweni ka Pi-Hahiroto, exikarhi ka Migidolo ni lwandle, ku langutana na Baala-Sefoni; mi ta yimisa mitsonga ku langutana na kona, ekusuhi ni lwandle. ₃Kutani Faro u ta vula hikwalaho ka vana va Israele a ku: ‘Va lahlekile xikarhi ka nhova; mananga ya va sivela.’ ₄Ndzi ta nonon'hwisa mbilu ya Faro, u ta va landza; kambe ndzi ta tidzunisa ha Faro ni nyimpi ya yena hinkwayo; Vaegipta va ta tiva leswaku hi mina Yehovha.” Kutani va endlisa sweswo.

₅Kuteloko hosi ya Egipta yi tivisiwa leswaku tiko ri balekile, mbilu ya Faro ni timbilu ta malandza ya yena ti hundzukela tiko, va ku: “Hi endlile yini loko hi tshunxile Israele leswaku a nga ha hi tirheli xana?” ₆Kavaloko a pana kalichi ya yena a famba ni vanhu va yena. ₇A teka ni makalichi ya 600 lama hlawuriweke, ni makalichi hinkwawo ya Egipta; a ku ri ni tinhenha ehenhla ka wona hinkwawo. ₈Kambe Yehovha a nonon'hwisa mbilu ya Faro, hosi ya Egipta, leswaku a landza vana va Israele, hikuva vana va Israele a va humile hi voko ra matimba. ₉Vaegipta va va landzela; tihanci ni makalichi hinkwawo ya Faro, ni lava khandziyeke, ni nyimpi ya yena hinkwayo, yi va kuma va govile ekusuhi ni lwandle, emahlweni ka Pi-Hahiroto, ku langutene na Baala-Sefoni.

₁₀Loko Faro a ri karhi a tshinelela, vana va Israele va tlakusa mahlo, va vona Vaegipta va va landzelela. Kutani vana va Israele va chava ngopfu, va huwelela eka Yehovha. ₁₁Va ku eka Muxe: “Xana a ku nga ri na masirha eEgipta, leswi u hi suseke leswaku hi ta ta fela emananga? U hi endle yini loko u ta hi humesa eEgipta? ₁₂Xana a hi tona timhaka leti hi ku byeleke tona eEgipta, loko hi ku: ‘Hi tshike, hi tirhela Vaegipta,’ hikuva a swi sasekile loko hi tirhela Vaegipta, swi nga ri leswaku hi fa emananga.”

₁₃Kutani Muxe a ku eka tiko: “Mi nga chavi; yimani mi ta vona hilaha Yehovha a nga ta mi lamulela hakona namuntlha; hikuva Vaegipta lava mi va vonaka sweswi, a mi nga ha tlheli mi va vona kambe. ₁₄Yehovha u ta mi lwela, kambe n'wina mi ta timiyelela ntsena.”

₁₅Kutani Yehovha a ku eka Muxe: “U huwelela yini eka mina; byela vana va Israele leswaku va famba. ₁₆Kambe wena yimisa nhonga, u tlakusa voko ra wena ehenhla ka lwandle, u ri tsemakanyisa, vana va Israele va ta famba exikarhi ka lwandle, laha ku omeke. ₁₇Kambe mina ndzi ta nonon'hwisa timbilu ta Vaegipta, va ta mi landzela; kutani ndzi ta tidzunisa ha Faro ni nyimpi ya yena hinkwayo, ni makalichi ya yena, ni 12 va khandziyaka tihanci. ₁₈Vaegipta va ta tiva leswaku hi mina Yehovha, loko ndzi ta tidzunisa ha Faro ni makalichi ya yena ni lava khandziyaka tihanci.”

₁₉Ntsumi ya Xikwembu leyi rhangeleke mavandla ya Israele yi suka, yi famba endzhaku ka vona; kutani ku nembelela ka papa ku suka emahlweni ka vona ku ya yima endzhaku ka vona exikarhi ka nyimpi ya Vaegipta ni ya Vaisraele. ₂₀Tlhelo rin'wana papa ri endle ntima, kambe tlhelo rin'wana a ri voninga vusiku; kutani a va tshinelelananga vusiku hinkwabyo.

₂₁Kutani Muxe a tlakusa voko ra yena ehenhla ka lwandle, kutani Yehovha a fambisa lwandle hi vusiku hinkwabyo hi mheho ya matimba ya vuxa; a phyisa lwandle, mati ma avana hi le xikarhi. ₂₂Kutani vana va Israele va famba exikarhi ka lwandle, laha ku omeke; mati ma endle tintshava hi matlhelo mambirhi. ₂₃Kutani Vaegipta va va hlongorisa, va nghena exikarhi ka lwandle endzhaku ka vona, ni tihanci ta Faro hinkwato, ni makalichi ya yena ni vakhandziyi va yena. ₂₄Hi nkarhi wa mixo, Yehovha a languta nyimpi ya Vaegipta a ri epapeni ra ndzilo, kutani a pfulunganya nyimpi ya Vaegipta, ₂₅a hlumule masondzo ya makalichi ya vona, kutani va ma koka hi matimba. Kutani Vaegipta va ku: “A hi balekeni emahlweni ka Vaisraele, hikuva Yehovha a va lwela, a lwa ni Vaegipta.”

₂₆Kutani Yehovha a ku eka Muxe: “Tlakusa voko ra wena ehenhla ka lwandle, mati ma ta vuya henhla ka Vaegipta ni makalichi ya vona, ni vakhandziyi va tihanci.” ₂₇Kutani Muxe a tlakusa voko ra yena ehenhla ka lwandle; kutani, loko byi xa, lwandle ri tlhelela evutshan'weni bya rona, kutani kakuloko Vaegipta va baleka, va hlangana na rona; kavaloko Yehovha a wisa Vaegipta exikarhi ka lwandle. ₂₈Mati ma vuya, ma funengeta makalichi ni nyimpi hinkwayo ya Faro leyi nga landza Vaisraele elwandle, a ku salangi munhu ni un'we. ₂₉Kambe vana va Israele va famba exikarhi ka lwandle, laha ku omeke, mati ma va endlerile tintshava hi matlhelo mambirhi.

₃₀Hi siku rero Yehovha a lamulela Israele emavokweni ya Vaegipta kutani Israele a vona mitsumbu ya Vaegipta eribuwini ra lwandle. ₃₁Ku va kona Israele a vonaka matimba lamakulu ya Yehovha, lawa a ma kombiseke Vaegipta. Kutani tiko ri chava Yehovha; ri pfumela eka Yehovha ni le ka Muxe, nandza wa yena.