EKSODA 16

₁Nhlengeletano hinkwayo ya vana va Israele yi suka eElimi, kutani va fika emananga ya Sina, la nga exikarhi ka Elimi na Sinayi, hi siku ra khume na ntlhanu ra n'hweti ya vumbirhi, ya ku huma ka vona etikweni ra Egipta. ₂Kutani nhlengeletano hinkwayo ya vana va Israele yi karihela Muxe na Aroni emananga. ₃Vana va Israele va ku: “Nge hi dlayiwe hi voko ra Yehovha etikweni ra Egipta, hi ri karhi hi titshamele xikarhi ka timbita ta nyama, hi dya ni vuswa, hi xurha. Hikuva mi hi humesile hi fika la mananga leswaku mi dlaya tiko leri hinkwaro hi ndlala.”

₄Kutani Yehovha a ku eka Muxe: “Waswivo, ndzi ta mi nisela vuswa lebyi humaka etilweni, tiko ri ta huma ri tihlengeletela leswi ringanaka siku rin'wana ni rin'wana, leswaku ndzi va ringa loko va ta famba hi nawu wa mina, kumbe loko swi nga ri tano. ₅Kutani hi siku ra ntlhanu na rin'we va ta sweka leswi ringanaka swa masiku mambirhi.” ₆Kutani Muxe na Aroni va ku eka vana va Israele hinkwavo: “Nimadyambu mi ta tiva leswaku i Yehovha la mi humeseke etikweni ra Egipta. ₇Nimixo mi ta vona ku kwetsima ka Yehovha, hikuva u yingisile hilaha mi dzumadzumeleke Yehovha: xana hina hi va mani leswi mi hi karihelaka?” ₈Muxe a engeta a ku: “Kunene Yehovha u ta mi nyika nyama nimadyambu mi dya, nimixo a mi nyika vuswa mi xurha, hikuva u yingisile ku dzumadzuma ka n'wina, hilaha mi n'wi kariheleke hakona. Hikuva hina ho va swini-ke? A mi karihelanga hina, mi karihele Yehovha.” ₉Kutani Muxe a ku eka Aroni: “Byela nhlengeletano hinkwayo ya vana va Israele, u ku: ‘Tshinelani ekusuhi na Yehovha, hikuva u yingisile ku dzumadzuma ka n'wina.’ ” ₁₀Kutani loko Aroni a ri karhi a vulavula ni nhlengeletano ya vana va Israele, a va languta tlhelo ra mananga, kutani ku kwetsima ka Yehovha ku vonaka epapeni; ₁₁kutani Yehovha a vulavula na Muxe, a ku: ₁₂“Ndzi yingisile ku dzumadzuma ka vana va Israele; u va byela, u ku: ‘Nimadyambu mi ta dya nyama, nimixo mi ta xurha vuswa; mi ta tiva leswaku hi mina Yehovha, Xikwembu xa n'wina.’ ”

₁₃Nimadyambu switsatsatsa swi huma swi tata mixaxa; nimixo mberha a yi wile, yi rhendzele mixaxa. ₁₄Kuteloko mberha yi hlanhlekile, a ku ri ni swilo leswo nge tindzhohonyana laha erivaleni, swi fana ni gamboko ehenhla ka misava. ₁₅Vana va Israele loko va swi vona, va vutisana, va ku: “I swini leswi?” hikuva a va nga tivi leswaku i swini. Kutani Muxe a ku: “Hi byona vuswa lebyi Yehovha a mi nyikaka byona leswaku mi dya. ₁₆Hi yona mhaka leyi Yehovha a mi leriseke, a ku: ‘Un'wana ni un'wana a tihlengeletele hi ku ringanisa ku dya ka yena, mpimo wa homere hi nhloko yin'wana ni yin'wana hi ku hlaya ka vanhu, un'wana ni un'wana u ta hlengeletela lava nga entsongeni wa yena.’ ”

₁₇Vana va Israele va endlisa sweswo van'wana va tihlengeletela ngopfu van'wana switsongo. ₁₈Kutani va pima hi homere; loyi ngi a hlengeletile ngopfu, a nga tlulanga van'wana, ni loyi ngi a hlengelete switsongo a nga pfumalanga. Un'wana ni un'wana a tihlengeletela hilaha a dyaka hakona. ₁₉Kutani Muxe a ku eka vona: “Ku nga vi na munhu la tivekelaka swa nimixo.” ₂₀Kambe a va yingisanga Muxe, van'wana va tivekele swa nimixo, kambe ku hume swivungu, swi nun'hwa; kutani Muxe a va karihela. ₂₁Masiku hinkwawo, nimixo, un'wana ni un'wana a a tihlengeletela hilaha a dyaka hakona; kutani loko dyambu ri tlhava, a swi n'oka.

₂₂Hi siku ra ntlhanu na rin'we va hlengeleta swakudya kambirhi, mipimo mimbirhi hi munhu un'wana ni un'wana. Kavaloko vakulukumba hinkwavo va nhlengeletano va ta tivisa Muxe. ₂₃Kutani Muxe a ku eka vona: “Hi yona mhaka leyi lerisiweke hi Yehovha. Mundzuku i siku ra ku wisa, i Savata leri hlawuleriweke Yehovha; leswi mi swi swekaka, swekani namuntlha, mi oxa leswi oxiwaka, kutani hinkwaswo leswi salaka, mi swi hlayisela mundzuku.” ₂₄Va swi hlayisa ku fika nimixo, hilaha Muxe a leriseke hakona; kambe a swi bolanga, a swi humangi swivungu. ₂₅Kutani Muxe a ku: “Namuntlha dyanani swona, hikuva i ku wisa ka Yehovha; namuntlha mi nga ka mi nga kumi nchumu enhoveni. ₂₆Mi ta tihlengeletela swona hi masiku ya ntlhanu na rin'we, kambe hi siku ra ntlhanu na mambirhi i Savata, swi nga ka swi nga vi kona.”

₂₇Hi siku ra ntlhanu na mambirhi, van'wana va tiko va huma ku ya hlengeleta swona, kambe a va kumanga nchumu. ₂₈Kutani Yehovha a ku eka Muxe: “Mi ta ala ku yisa kwihi ku hlayisa ku lerisa ka mina ni milawu ya mina? ₂₉Anakanyani leswaku Yehovha u mi nyikile Savata, hikwalaho a mi nyikaka vuswa bya masiku mambirhi hi siku ra ntlhanu na rin'we. Un'wana ni un'wana a a tshame ekaya, ku nga tshuki ku va na munhu la humaka ekaya hi siku ra ntlhanu na mambirhi.” ₃₀Kutani tiko ri wisa hi siku ra ntlhanu na mambirhi.

₃₁Kutani va yindlu ya Israele va thya vuswa lebyi vito ra manna (hileswaku i yini); a yi fana ni tindzhoho leto basa ta khoriyanda, swi nandziha kukota swimbundzu leswi pfuviweke ni vulombe. ₃₂Kutani Muxe a ku: “Mhaka leyi lerisiweke hi Yehovha hi leyi: A ku hlayisiwe homere leyi teleke hi manna exikarhi ka tinxaka ta n'wina ti ta vona vuswa lebyi ndzi mi phameleke byona emananga loko ndzi mi humesa etikweni ra Egipta.” ₃₃Kutani Muxe a ku eka Aroni: “Teka mbita, u yi chela homere leyi teleke hi manna, u yi veka emahlweni ka Yehovha ku yi hlayisela tinxaka ta n'wina.” ₃₄Hilaha Yehovha a leriseke Muxe hakona, Aroni a yi veka emahlweni ka Vumbhoni leswaku yi hlayisiwa kona. ₃₅Vana va Israele va dya manna hi mune wa makume ya malembe va kondza va nghena etikweni leri akiweke va dya manna va kondza va fika emaaveni ya tiko ra Kanana. ₃₆Mpimo wa homere, loko wu hlayiwa eka khume, wu endla efa.