Ta ku akiwa ka Tabernakela.
1“Besalele na Oholiyabu, ni vavanuna hinkwavo lavo tlhariha, lava Yehovha a va nyikeke vutlhari, ni ku twisisa, ni ku tiva ku tirha, va ta va ta tirha ntirho hinkwawo wa vukwetsimelo hilaha Yehovha a leriseke hakona.”
2Kutani Muxe a vitana Besalele, na Oholiyabu, ni vavanuna hinkwavo lavo tlhariha, lava Yehovha a ngheniseke vutlhari etimbilwini ta vona va ri hinkwavo lava byisiweke hi timbilu ta vona ku tirha ntirho. 3Kutani va teka nhlengo hinkwawo eka Muxe, lowu tisiweke hi vana va Israele ku tirha ntirho wa vukwetsimelo, kambe a va ha tisa nhlengo siku rin'wana ni rin'wana, nimixo. 4Kutani vavanuna hinkwavo lava tirhaka mitirho hinkwayo ya vukwetsimelo va tshika ntirho lowu va wu tirhaka va ta eka Muxe va ku: 5“Tiko ri tisile ku hundzisa leswi ringanaka ntirho lowu Yehovha a leriseke leswaku wu endliwa.” 6Kutani Muxe a lerisa leswaku va huwelela emixaxeni mhaka leyi nge: “Vavanuna ni vavasati va nga ha tshuki va lunghisa mitirho ya nhlengo wa vukwetsimelo.” Tiko ri siveriwa sweswo ku tisa swilo. 7Hikuva swilo swa ku endla ntirho hinkwawo a swi ringene, swi ko swi sala.
8Kutani vavanuna hinkwavo lava tlhariheke exikarhi ka lava tirhaka mitirho, va aka Tabernakela hi tinguvu ta khume ta ntsembyana lowo saseka leyi swuriweke, ni ta xivunguvungu ni ta scarlet ni crimson, va yi endlela ni tikerubu leti lukiweke hi ntirho wa vutlhari. 9Ku leha ka nguvu a swi ri swisungunhu swa makume mambirhi na ntlhanu na swinharhu, kutani ku anama ka yona a swi ri swisungunhu swa mune; tinguvu hinkwato a ti endliwa hi mpimo wun'we.
10Ku hlanganisiwa swin'we tinguvu ta ntlhanu, ni tinguvu tin'wana ta ntlhanu swin'we. 11Kutani va sula tingoti ta xivunguvungu eku swonyeni ka nguvu leyo rhanga, emakun'wini ka tinguvu leti rhungiweke va endlisa sweswo emaswonyeni ya nguvu yin'wana ya makumu eka leti rhungiweke. 12Va swula tingoti ta ntlhanu wa makume engubyeni yin'wana, ni ta ntlhanu wa makume engubyeni yin'wana ya makumu eka leti rhungiweke. Tingoti a ti lavana. 13Kutani ku endliwa swovetana swa ntlhanu wa makume swa nsuku, kutani va hlanganisa tinguvu swin'we hi swovetana; hi mukhuva wolowo, Tabernakela yi endliwa xilo xin'we.
14Kutani va endla tinguvu ta voya bya timbuti ku endla ntsonga ehenhla ka Tabernakela, ku endliwa tinguvu teto ta khume na yin'we. 15Ku leha ka nguvu yin'wana ni yin'wana swi va swisungunhu swa makume manharhu, ni le ku anameni ka yona swisungunhu swa mune; tinguvu teto hinkwato ti endliwa hi mpimo wun'we. 16Kutani va rhunga tinguvu ta ntlhanu tlhelo rin'wana, ni tinguvu ta ntlhanu na yin'we tlhelo rin'wana. 17Va luka tingoti ta ntlhanu wa makume eku swonyeni ka nguvu yin'wana leyo rhanga, ni tingoti ta ntlhanu wa makume eku swonyeni ka nguvu yin'wana ya vumbirhi. 18Kutani va endla swovetana swa ntlhanu wa makume swa koporo, va hlanganisa ha swona ntsonga leswaku xi va xilo xin'we. 19Va endlela Tabernakela xifunengeto xa madzovo ya tinyimpfu lama petiweke eka leswo tshwuka, ni swifunengeto swa madzovo ya xwale ku funengeta ehenhla.
20Kutani ku vatleriwa Yindlu mapulangi hi murhi wa munga, va ma yimisa. 21Ku leha ka pulangi rin'wana ni rin'wana ku va khume ra swisungunhu, ni ku anama ka rona xisungunhu xin'we na hafu. 22Pulangi rin'wana ni rin'wana a ri ri ni swihlanganiso swimbirhi leswi lavaneke va vatla sweswo mapulangi hinkwawo ya Tabernakela. 23Va endlisa sweswo mapulangi ya Tabernakela, mapulangi ya makume mambirhi hitlhelo ra dzonga, exineneni. 24Ehansi ka mapulangi ya makume mambirhi lawa, va endla switshamo swa silivhere swa mune wa makume; switshamo swimbirhi ehansi ka pulangi rin'wana ni rin'wana, ehansi ka swihlanganiso swimbirhi swa pulangi rin'wana ni rin'wana. 25Va endla mapulangi ya makume mambirhi tlhelo rin'wana ra yindlu, en'walungwini; 26switshamo swa wona swa mune wa makume a swi ri swa silivhere, switshamo swimbirhi ehansi ka pulangi rin'wana ni rin'wana. 27Tlhelo ra vupeladyambu, hi mpfungwe wa Yindlu va endla ntlhanu wa mapulangi ni pulangi rin'we. 28Kutani va endlela Yindlu, tlhelo ra mpfungwe, mapulangi mambirhi emagombyeni; 29a ma tsindziyerile ehansi ni le henhla ku fika exingwavileni lexo rhanga va endlisa sweswo mapulangi mambirhi emagombyeni. 30Loko swi ri sweswo, a ku ri ni mapulangi ya ntlhanu na manharhu, ni switshamo swa wona swa khume na ntlhanu na xin'we; a swi ri swimbirhi ehansi ka pulangi rin'wana ni rin'wana.
31Kutani va endla timbalelo ta ntlhanu ta murhi wa munga ta mapulangi ya tlhelo rin'wana ra Yindlu; 32ni timbalelo ta ntlhanu ta mapulangi ya tlhelo rin'wana, ni timbalelo ta ntlhanu ta mapulangi ya muhosi ka Yindlu, tlhelo ra vupeladyambu. 33Kambe rivalelo leri nga exikarhi, va ri endla leswaku ri hlanganisa mapulangi hinkwawo, ku suka etlhelo rin'wana, ku ya fika etlhelo rin'wana. 34Kutani va nameka mapulangi hi nsuku, va endla ni swingwavila swa wona hi nsuku, leswi timbalelo ti nghenisiwaka eka swona; na tona timbalelo va ti nameka hi nsuku.
35Va endla nguvu ya Tabernakela hi xivunguvungu, ni scarlet, ni crimson, ni ntsembyana lowo saseka, leyi swuriweke va yi endla hi mukhuva wa ntirho wa vutlhari, va endla ni tikerubu eka yona. 36Va endlela nguvu timhandze ta mune hi murhi wa munga, va ti nameka hi nsuku; swovetana swa tona a swi ri swa nsuku va chulula switshamo swa tona swa mune hi silivhere. 37Kutani va endlela nyangwa ya Tabernakela nguvu ya xivunguvungu ni ya scarlet, ni ya crimson, ni ya ntsembyana lowo saseka, leyi swuriweke, wu va ntirho lowu endliweke hi vutlhari, 38va endla ni timhandze ta yona ta ntlhanu, ni swovetana swa tona, kutani va nameka tinhloko ta tona ni timbalelo ta tona hi nsuku; kambe switshamo swa tona swa ntlhanu, a swi ri swa koporo.
