Ta Muxe na Aroni emahlweni ka Faro.
1Endzhaku ka sweswo, Muxe na Aroni va ta eka Faro, va ku eka yena: “Yehovha, Xikwembu xa Israele, u te: ‘Tshika tiko ra mina ri ya ndzi endlela nkhuvo emananga.’ ”
2Kutani Faro a ku: “Yehovha i mani leswaku ndzi yingisa rito ra yena, ndzi tshika Israele a famba? Yehovha a ndzi n'wi tivi, na Israele ndzi nga ka ndzi nga n'wi tshiki a famba.”
3Va ku: “Xikwembu xa Vaheveru xi humelele eka hina; hi pfumelele hi famba riendzo ra masiku manharhu emananga, hi ya gandzela Yehovha, Xikwembu xa hina, hi magandzelo, leswaku a nga tshuki a hi dlaya hi ntungu, kumbe hi fumu.”
4Kutani hosi ya Egipta yi ku eka vona: “N'wina, Muxe na Aroni, mi tshimbisela yini tiko ku tirha ntirho wa rona? Tlhelelani emitirhweni ya n'wina.” 5Faro a engeta, a ku: “Vanhu lava va tele sweswi etikweni leri, kutani mi va tshimbisa mitirho ya vona.”
6Hi siku lero Faro a lerisa valanguteri va tiko ni vafambisi va rona, a ku: 7“Mi nga tshuki mi nyika tiko byanyi ku endla switina, tani hi leswi nga endliwa ku fika namuntlha; a va tilavele byanyi bya vona. 8Hambiswiritano, mi va lerisa switina leswi va nga swi endla khale, mi nga hunguti nchumu, hikuva va loloha; hikwalaho va huwelelaka, va ku: ‘A hi yeni, hi ya gandzela Xikwembu xa hina.’ 9Ntirho a wu tikele vanhu lava, va wu khoma, va nga tshuki va yingisa marito ya vunwa.”
10Kutani valanguteri va tiko ni vafambisi va rona va byela tiko, va ku: “Faro u te: ‘A ndzi nga ha mi nyiki byanyi; 11fambani mi ri n'wina mi tilavela byanyi laha byi kumekaka kona, hikuva a ku nga hungutiwi nchumu entirhweni wa n'wina.’ ” 12Kutani vanhu va hangalaka etikweni hinkwaro ra Egipta ku hlengeleta byanyi bya nhova. 13Valanguteri va va hatlisisa, va ku: “Hetani mitirho ya n'wina, mi endla ntirho wa siku rin'wana ni rin'wana kukota khale loko ma ha ri ni byanyi.” 14Vafambisi va vana va Israele lava vekiweke hi valanguteri va Faro, va biwa; a va ku eka vona: “A mi hetanga ha yini mitirho ya n'wina ya switina tolo ninamuntlha kukota khale xana?”
15Kutani vafambisi va vana va Israele va ya rila eka Faro, va ku: “U endlisela yini sweswo malandza ya wena? 16A va nyiki byanyi eka malandza ya wena, kambe va ku eka hina: ‘Endlani switina!’ Kutani malandza ya wena ma biwa, ni tiko ra wena ri vekiwa nandzu.”
17Kutani a ku: “Ma loloha, ma loloha! Hikwalaho mi nge: ‘A hi yeni hi ya gandzela Yehovha.’ 18Fambani mi ya tirha; kambe a mi nga ha nyikiwi byanyi; hambiswiritano mi ta humesa switina leswi mi nga lerisiwa swona.” 19Vafambisi va vana va Israele va vona leswaku va le ku xanisekeni, loko ku vuriwa va ku: “Mi nga hunguti switina swa n'wina swa siku rin'wana ni rin'wana.”
20Kutani loko va huma eka Faro va ya hlangana na Muxe na Aroni lava va va languteleke. Va ku eka vona: 21“Yehovha a a mi langute, kutani a hi avanyisela, hikuva mi hi endlile xisandzu emahlweni ka Faro, ni le mahlweni ka malandza ya yena, mi va nyikile fumu ro hi dlaya.”
22Kutani Muxe a tlhelela eka Yehovha a ku: “Hosi, u xanisele yini tiko leri? U ndzi rhumele yini xana? 23Hikuva ka hari mpfhuka ndzi ya eka Faro, ndzi vulavula hi vito ra wena, wa ha xanisa tiko leri, kutani a ku kutsulangi tiko ra wena.”
