EZEKIELE 19

₁Wena vula mahlomulo ehenhla ka tihosana ta Israele, u ku: ₂Mana wa wena ingi a ri mani? Nghala ya ntswele. Yi etlele exikarhi ka tinghala; exikarhi ka swinghalana yi an'wisile swinghalana swa yona. ₃Yi kurisile xinghalana xin'we, xi kula xi va nghala, yi dyondza ku handzula swiharhi ni vanhu. ₄Ku twala ka yona ku fika ematikweni; yi phasiwa hi marindzi ya vona, va yi bela nsimbhi etinhompfini, va yi koka etikweni ra Egipta. ₅Loko nghala ya ntswele yi vonile leswaku ku langutela ka yona ingi ku hundzukile swahava, yi teka xinghalana xin'wana, yi xi kurisa leswaku yi va nghala leyintshwa. ₆Yi fambafamba exikarhi ka tinghala, yi hundzuka nghala yinene, yi dyondza ku handzula swiharhi, yi dya ni vanhu. ₇Yi nghena etindlwini ta vona ta vuhosi, yi onha miti ya vona. Tiko hinkwaro, ni hinkwaswo leswi ngi swi ri eka rona swi lova hi ku dzumadzuma ka yona. ₈Kambe matiko ya matlhelo hinkwawo ma yi pfukela, ma yi rhiya hi mitlhamu, kutani yi phasiwa emarindzini ya vona. ₉Va yi boxa tinhompfu hi xingwavila, va yi khotsa ebokisini, va yi tekela eka hosi ya Babilona. Kutani yi nghenisiwa ekhotsweni, leswaku rito ra yona ri nga ha twakali ehenhla ka tintshava ta Israele.

₁₀Mana wa wena a a ri tanihi wena, a fana ni vhinya leyi byariweke ekusuhi ni mati; yi vekile ngopfu, a yi ri ni marhavi layo tala hikwalaho ka ku tala ka mati. ₁₁Yi hlukise marhavi lamakulu, lama ringanaka tinhonga ta vuhosi. Vanhu a va yi languta hikwalaho ka ku tlakuka ka yona, ni ku tala ka marhavi ya yona. ₁₂Kambe yi susiwile hi vukari, yi cukumetiwile ehansi; mheho ya le vuxeni yi omise mihandzu ya yona, marhavi ya yona layo tiya ma omile, ma tshoviwile: kutani ma hisiwa hi ndzilo. ₁₃Sweswi, yi byariwile emananga laha ku omeke, emisaveni leyi nga ni torha. ₁₄Ndzilo wu humile emarhavini, wu hisile mihandzu; yi nga ha ri na marhavi lamanene lama ringanaka nhonga ya vuhosi. Hi rona rito ra nhlomulo, ri ta va rito ra nhlomulo.