EZEKIELE 29

₁Hi lembe ra vukhume, hi n'hweti ya vukhume, hi siku ra khume na mambirhi ra n'hweti, rito ra Yehovha ri ta eka mina, ri ku: ₂“N'wana wa munhu, rhendzelekisa mombo wa wena eka Faro hosi ya Egipta, u profeta eka yena ni le tikweni hinkwaro ra Egipta. ₃Vulavula, u ku: Hosi Yehovha u ri: Vona, Faro, ndzi le ka wena, hosi ya Egipta, ngwenya leyikulu leyi etlelaka emilambyeni ya yona, leyi vuleke leswaku: ‘Nambu wa mina i wa mina, hi mina ndzi tiendleleke wona!’

₄“Kambe ndzi ta nghenisa swinjovo swa mina etinhlayeni ta wena, ndzi ta damarerisa tinhlampfi ta milambu ya wena etihakatimbeni ta wena, ndzi ku humesa emilambyeni ya wena, na swona tinhlampfi hinkwato ta milambu ya wena ti ta damarela etihakatimbeni ta wena. ₅Ndzi ta ku cukumeta emananga, wena ni tinhlampfi hinkwato ta milambu ya wena; u ta wela emasin'wini; a ku nga oleriwi, ni loko ku ri ku hlengeletiwa. Ndzi ku nyiketa swivandzana swa nhova ni tinyanyana ta tilo, u va swakudya swa swona. ₆Vaaki hinkwavo va Egipta va ta swi tiva leswaku hi mina Yehovha, hikuva a va ri nhonga ya rihlanga eka yindlu ya Israele.

₇“Kakuloko va ku khoma hi voko, u tshoveka, u handzula makatla ya vona hinkwavo, ni loko va khegela ehenhla ka wena, u tshoveka, u rhurhumerisa swisuti swa vona hinkwavo. ₈Hikwalaho, ku vula Hosi Yehovha: Vona, ndzi ta tisa fumu ehenhla ka wena, ndzi tsema munhu ni xifuwo eka wena. ₉Tiko ra Egipta ri ta va rhumbi ni ku onhaka; va ta swi tiva leswaku hi mina Yehovha, hikuva u te: ‘Nambu i wa mina, ndzi wu endlile.’ ₁₀Hikwalaho, vona, mina ndzi le ka wena, ni le milambyeni ya wena, ndzi ta endla tiko ra Egipta ku onhaka ni rhumbi, ku suka eMigidolo, ku ta eSeyene, ni ku fika enkoveni wa Kuxi. ₁₁A ku nga ha kandziyi nenge wa munhu kona, a ku nga ha kandziyi nenge wa xifuwo kona, a ku nga akiwi kona hi malembe ya mune wa makume. ₁₂Ndzi ta endla tiko ra Egipta rhumbi exikarhi ka matiko lama nga rhumbi, ni miti ya rona exikarhi ka miti leyi onhiweke, ri ta va rhumbi hi mune wa makume ya malembe; ndzi ta hangalasa Vaegipta exikarhi ka matiko, ndzi va hangalasela ematikweni hinkwawo.

₁₃“Hikuva Hosi Yehovha u ri: Kutakuloko ku hele malembe lawa ya mune wa makume, ndzi ta hlengeleta Vaegipta ematikweni lawa va hangalaseriweke ka wona; ₁₄ndzi ta landza Vaegipta lava yisiweke evukhumbini, ndzi va vuyisa etikweni ra Patroso, etikweni leri va tswariweke eka rona; kutani kona va ta va ku fuma loku tsongahaleke. ₁₅Egipta u ta tsongahala ku tlula ku fuma kun'wana; a a nga ha titlakusi kambe ehenhla ka matiko; na swona, ndzi ta va hunguta, leswaku va nga ha fumi ematikweni. ₁₆A va nga ha tshembiwi hi va yindlu ya Israele; va tsundzuxa ku biha ka yona ka siku ingi va hundzukele eka vona; kambe va ta swi tiva leswaku hi mina Hosi Yehovha.”

₁₇Hi lembe ra 27, hi n'hweti yo sungula, hi siku ro sungula ra n'hweti, rito ra Yehovha ri ta eka mina, ri ku: ₁₈“N'wana wa munhu Nebukadnetsara hosi ya Babilona, u lerise nyimpi ya yena ku tirha ntirho lowukulu eka Tiri; tinhloko hinkwato ti endliwe mimpandhla, ni makatla hinkwawo ma tshwumukile; kutani kona eTiri, yena, ni nyimpi ya yena, a va vonanga hakelo ni yin'we ya ntirho lowu va wu tirheke kona. ₁₉Loko swi ri tano, Hosi Yehovha u ri: Vonani, ndzi ta nyika Nebukadnetsara, hosi ya Babilona, tiko ra Egipta; u ta teka vunyingi bya vanhu kona, a teka leswi phangiweke swa yena, a teka ni swiphango swa yena; kutani leswo swi ta va hakelo ya nyimpi ya yena. ₂₀Ndzi n'wi nyike tiko ra Egipta hi ntirho wa yena hilaha a tirheke hakona eka Tiri, hikuva, va ndzi tirherile, ku vula Hosi Yehovha! ₂₁Hi siku lero ndzi ta mirisela yindlu ya Israele rimhondzo, kutani wena, ndzi ta ku nyika nomu lowu ahlameke exikarhi ka vona; kutani va ta swi tiva leswaku hi mina Yehovha.”