EZRA 8

₁Hi leti tihosana ta tindlu ta vatata wa vona, ni mavito ya tinyimba leti nga huma eBabilona na mina, enkarhini wa hosi Ataserkisi: ₂Eka vana va Finiyasi, Gerixomu; eka vana va Itamara, Daniele; eka vana va Davhida, Hatuxi; ₃eka vana va Xekaniya eka vana va Paroxi Zakariya; ku tsariwile na yena vavanuna va 150. ₄Eka vana va Pahata-Mowabu, Eli-Howenayi, n'wana Zerahiya, a ri ni vavanuna va 200; ₅eka vana va Xekaniya, n'wana Yahaziele, a ri ni vavanuna va 300, ₆eka vana va Adina, Ebede, n'wana Yonatani, a ri ni vavanuna va 50; ₇eka vana va Elamu, Yexaya, n'wana Ataliya, a ri ni vavanuna va 70; ₈eka vana va Xefatiya, Zebadiya, n'wana Mikaele, a ri ni vavanuna va 80; ₉eka vana va Yowabu, Obadiya, n'wana Yehiele, a ri ni vavanuna va 218; ₁₀eka vana va Xelomiti, Beni-Yosifiya, a ri ni vavanuna va 160; ₁₁eka vana va Bebayi, Zakariya, n'wana Bebayi, a ri ni vavanuna va 28; ₁₂eka vana va Azigadi, Yohanani, n'wana Hakatani, a ri ni vavanuna va 110; ₁₃eka vana va Adonikama, va nga vo hetelela, hi lawa mavito ya vona: Elifelete na Yuwele, na Xemaya, va ri ni vavanuna va 60; ₁₄eka vana va Bigivhayi, Utayi na Zabudu, va ri ni vavanuna va 70.

₁₅Ndzi va hlengeleta enambyeni lowu khulukelaka eAhavha, kutani hi gova kona masiku manharhu. Kuteloko ndzi kamberile tiko ni vaprista, ndzi nga kumi na un'we wa vana va Levhi; ₁₆ndzi rhuma vanhu ku ya vita Eliezere, na Ariele, na Xemaya, na Elinatani na Yaribi, na Elinatani, na Natani na Zakariya, na Mexulama, ti nga tihosana na Yoyaribi, na Elinatani, vavanuna va ku anakanya; ₁₇ndzi va lerisa ematshan'weni ya Ido, hosana ya tikonyana ra Kasifiya, ndzi va nyika timhaka leti va nga ta byela Ido makwavo wa vona, ni Vanetinimi lava akeke etikwanyaneni ra Kasifiya, ndzi ku: “A va nehe vanhu ku ta khoma ntirho wa yindlu ya Xikwembu xa hina.” ₁₈Hilaha voko ra vunene ra Xikwembu xa hina ingi ri ri eka hina hakona, va hi nehela wanuna wa miehleketo wa vana va Maheli, n'wana wa Levhi, n'wana Israele, a nga Xerebiya ni vana va yena, ni vamakwavo, va ri 18; ₁₉un'wanyana i Haxabiya, na Yexaya, wa vana va Merari, ni vamakwavo, ni vana va vona, va ri 20; ₂₀ku ta ni Vanetinimi va 220, va hlawuriwa hinkwavo hi mavito, va nga Vanetinimi lava Davhida ni tihosana ingi va va nyikile ku tirhela Valevhi.

₂₁Loko ha ha ri enambyeni wa Ahavha, ndzi vula siku ra ku titsona swakudya, hi ta titsongahata emahlweni ka Xikwembu xa hina, leswaku hi tikombelela eka xona riendzo lerinene ra hina, ni ra vana va hina ni ra swilo hinkwaswo swa hina. ₂₂Hikuva a ndzi ri ni tingana ku kombela vandla ra tinhenha, ni vakhandziyi va tihanci eka hosi, leswaku va hi lwela eka valala endleleni, hikuva a hi byerile hosi, hi ku: “Voko ra Xikwembu xa hina ri yimela hinkwavo lava xi lavaka, kasi matimba ni vukari bya xona byi lwa ni hinkwavo lava xi fularhelaka.” ₂₃Hi titsona swakudya sweswo, hi lava ku pfuniwa hi Xikwembu xa hina hikwalaho ka mhaka leyi, kutani xi hi yingisa.

₂₄Kavaloko ndzi hlawula tihosana ta vaprista ta khume na timbirhi, a nga Xerebiya, na Haxabiya, ni vamakwavo va vona va khume. ₂₅Ndzi va pimela ku tika ka silivhere ni nsuku, ni swigotso swa nhlengo lowu humeseriweke yindlu ya Xikwembu xa hina hi hosi ni tindhuna ta huvo, ni tihosana ta yena, ni Vaisraele hinkwavo lava ngi va ri kona. ₂₆Ndzi pima, ndzi va nyika titalenta ta silivhere ta 650, ni swibya swa silivhere leswi endlaka titalenta ta dzana, ni titalenta ta nsuku ta dzana; ₂₇ni mindzheko ya makume mambirhi ya nsuku, ya nxavo wa tidarika ta khume ra madzana, ni timbita timbirhi ta koporo leto saseka, leto vangama kukotisa nsuku, leti ngi i nsuku hi nxavo; ndzi ku eka vona: ₂₈“Mi hlawuleriwe Yehovha, timbita na tona ti hlawulekile loko yi ri silivhere ni nsuku, swilo leswi humeseriwaka Yehovha, Xikwembu xa vatata wa n'wina, hi ku rhandza. ₂₉Hanyanyani, mi swi hlayisa ku fikela siku mi nga ta pima ku tika ka swona emahlweni ka vakulukumba va vaprista, ni Valevhi, ni tihosana ta tinyimba ta vatatana va Vaisraele eYerusalema, evuhlayiselweni bya yindlu ya Yehovha.” ₃₀Sweswo, vaprista ni Valevhi va amukela silivhere ni nsuku, ni swigotso swin'wana hi ku tika ka swona, leswaku va swi heleketa eYerusalema, endlwini ya Xikwembu xa hina.

₃₁Hi sukile enambyeni wa Ahavha, siku ra khume na mambirhi ra n'hweti yo rhanga hi kongoma eYerusalema; voko ra Xikwembu xa hina a ri ri na hina, xi hi lamulela emavokweni ya valala, ni lava tumbeleke etindleleni, ₃₂hi kondza hi fika eYerusalema, kutani hi wisa kona masiku manharhu. ₃₃Hi ra vumune, hi pima ku tika ka silivhere, ni nsuku, ni swigotso hi ri endlwini ya Xikwembu xa hina hi swi veka emavokweni ya muprista Meremoto, n'wana Uriya, a ri na Eliyazara, n'wana Finiyasi, na Yozabadi, n'wana Yexuwa, na Nowadiya, n'wana Binuyi, va ri Valevhi, ₃₄hi ntsengo ni ku tika ka swona hinkwaswo; ku tika ka swona hinkwaswo, ku tsariwa kona enkarhini wolowo.

₃₅Kutani va le ku bohiweni lava tlheleke va humesela Xikwembu xa Israele tiholokosta; ku tlhaveriwa Vaisraele hinkwavo tinkunzi ta khume na timbirhi, ni makhuna ya 96, ni swinyimpfana swa 77; ni swiphongo swa 12 swa magandzelo ya swidyoho hinkwaswo leswi swi tlhaveriwa Yehovha hi mukhuva wa ku hisa. ₃₆Kambe va nyika tindhuna ta hosi ni vafumi va hase ka nambu, ku lerisa ka hosi, kutani valavo va yimela tiko ni yindlu ya Xikwembu.