VAGALATIYA 3

₁Yo! Vagalatiya, swihunguki! Mi yenge hi mani, n'wina lava Yesu Kriste a kombisiweke emahlweni ka n'wina hi ku tlula ngopfu, ingi u vambiwile exikarhi ka n'wina. ₂Ndzi rhandza ku twa eka n'wina mhaka leyi ntsena: Xana mi nyikiwe Moya hi mitirho ya nawu, kumbe hi ku yingisa ta ku pfumela? ₃Xana mi hungukise ku yini swonghasi! Loko mi sungule hi Moya mi ta hetisela hi nyama xana? ₄Xana ku xaniseka lokonghaso, mi ku yingisele mahala xana? Loko kunene swi ri mahala! ₅Loyi a mi avelaka Moya, ni la endlaka masingita exikarhi ka n'wina, xana u swi endla hi mitirho ya nawu, kumbe hi ku yingisa ka ku pfumela?

₆Tanihi loko: “Abrahama a pfumele eka Xikwembu, kutani u hlayeriwe kona ku lulama,” ₇tsundzukani hakona leswaku lava nga va ku pfumela, hi vona vana va Abrahama.

₈Kutani Tsalwa, hi ku vona eku sunguleni leswaku Xikwembu xi ta hlaya ku lulama eka vamatiko hi ku pfumela, ri byerile Abrahama khale mahungu lamanene, ri te: “Matiko hinkwawo ma ta katekisiwa ha wena,” ₉hikwalaho, lava nga vapfumeri, va katekisiwa ni mupfumeri Abrahama. ₁₀Hikuva hinkwavo lava namarhelaka mitirho ya nawu, va le ku rhukaniweni, hikuva ku tsariwe va ku: “Ku rhukaniwa mani na mani la nga tiyiseriki eka hinkwaswo leswi tsariweke ebukwini ya nawu ku swi endla.” ₁₁Loko swi ri leswaku a ku na munhu la nga hlayiwaka la lulameke emahlweni ka Xikwembu hi nawu, swa vonaka, hikuva va te: “La lulameke u ta hanya hi ku pfumela.” ₁₂Kasi nawu a wu humi eku pfumeleni, kambe wu te: “Munhu la endlaka swoleswo u ta hanya ha swona.” ₁₃Kriste u hi kutsurile eku rhukaniweni ka nawu hi ku hlayiwa la rhukaniweke ematshan'weni ya hina hikuva ku tsariwile va ku: “Ku rhukaniwe mani na mani la hayekiweke emhandzeni,” ₁₄leswaku ku kateka ka Abrahama ku tela vamatiko ha Yesu Kriste, leswaku hi amukela hi ku pfumela ku tshembisiwa ka Moya.

₁₅Vamakwerhu, ndzi vulavula hi mukhuva wa vanhu: Ntwanano, hambi wu ri wa munhu, loko wu tiyisiwile, a ku na la nga wu herisaka, hambi ku ri ku wu engetela. ₁₆Kasi ku tshembisa ku endleriwe Abrahama ni rixaka ra yena; a nga vulanga, a ku: “Ni tinxaka ta yena,” kukotisa leswo ngi u vula leto tala; kambe a ku, “hi ku hlaya rin'we ntsena.” Ni rixaka ra wena, a nga Kriste. ₁₇Loko swi ri tano, lexi ndzi xi vulaka hileswaku: Ntwanano lowu tiyisiweke khale hi Xikwembu a wu onhiwanga, ni ku tshembisa ka xona, a ku herisiwanga hi nawu lowu nga ta endzhaku, loko ku hundze malembe ya mune wa madzana, ni makume manharhu. ₁₈Hikuva loko ndzhaka yi nga nyikiwa hi nawu, a ya ha nyikiwi hi ku tshembisa, kasi Xikwembu xi yi nyike Abrahama hi ku tshembisa ntsena.

₁₉Loko swi ri tano, nawu i wa ku endla yini-ke? Wu nyikiwe endzhaku hikwalaho ka ku dyoha, ku ko ku humelela rixaka leri ku tshembisa ku endleriweke rona, kutani ku tiyisiwe hi tintsumi, evokweni ra muhlanganisi. ₂₀Kasi muhlanganisi a hi wa un'we, kambe Xikwembu, xona, i xin'we.

₂₁Loko swi ri tano, xana nawu wu alana ni ku tshembisa ka Xikwembu xana? Niswitsanana! Hikuva loko nawu wun'wana lowu tivaka ku hanyisa, ingi wu nyikiwe vanhu, hi laha ku lulama ku nga ta huma enawini; ₂₂kambe Matsalwa ma pfarile hinkwaswo eku dyoheni, leswaku leswi tshembisiweke swi nyikiwa eka vapfumeri hi ku pfumela eka Yesu Kriste. ₂₃Kutani loko ku pfumela ku nga si ta, a hi pfaleriwa hi nawu, hi risiwa hi wona, ku ri karhi ku languteriwa ku pfumela, ku ko ku vonakala. ₂₄Hikwalaho, nawu a wu ri murisi wa hina ku hi yisa ka Kriste, hi ta hlayiwa lava lulameke hi ku pfumela. ₂₅Kambe ku pfumela, loko ku tile, a ha ha ri eku fumeni ka murisi yeloyi; ₂₆hikuva hinkwenu mi vana va Xikwembu hi ku pfumela eka Yesu Kriste. ₂₇Hikuva n'wina hinkwenu lava khuvuriweke eka Kriste, mi funengele Kriste. ₂₈A ka ha ri na Muyuda hambi Mugriki; a ka ha ri na khumbi, ni loko a ri n'wana wa xitswalwa; a ka ha ri na wanuna, ni loko a ri wansati, hikuva hinkwenu mi un'we eka Yesu Kriste. ₂₉Kutani loko mi ri va Kriste, hilaha mi nga rixaka ra Abrahama, mi ri vadyandzhaka, hilaha ku tshembisiweke hakona.