Ta Yakobo loko a hlangana na Esawu.
1Yakobo a tlakusa mahlo, a languta, a vona Esawu a ri karhi a ta, a ri ni vanhu va mune wa madzana; kutani a pambula vana exikarhi ka Leya na Rahele ni malandza lamambirhi. 2Kutani a rhangisa malandza ni vana va vona va ya emahlweni, va landzela hi Leya ni vana vakwe; endzhaku a ku ta Rahele na Yosefa. 3Kambe yena a va hundzela emahlweni, a ya khinsamela ehansi, kantlhanu na kambirhi, a ko a fika ekusuhi ni hosi ya yena. 4Kutani Esawu a tsutsuma a hlangana na yena; a n'wi singarhela, a wela enhan'wini ya yena, a n'wi ntswontswa, kutani va rila. 5Kutani a tlakusa mahlo, a vona vavasati ni vana, a ku: “I va mani volavo u nga na vona la?”
Yakobo a ku: “I vana lava Xikwembu xi pfuneke nandza wa wena ha vona.” 6Kutani malandza ma tshinelela kusuhi, ma ri ni vana va yena, va khinsama. 7Na yena Leya ni vana vakwe va tshinelela, va khinsama; endzhaku ka vona, ku ta Yosefa na Rahele va khinsama.
8Esawu a ku: “U endla yini hi ntlhambi hinkwawo lowu ndzi nga hlangana na wona xana?”
Yakobo a ku: “Hi leswaku ndzi tiva ku kuma tintswalo emahlweni ka hosi yanga.”
9Kambe Esawu a ku: “Ndzi ni leswo tala, makwerhu, swa wena a swi ve swa wena.”
10Kambe Yakobo a ku: “Ndza ku khongela, loko kumbe ndzi kume tintswalo emahlweni ka wena, amukela evokweni ra mina nhlengo wa mina, hikuva hikwalaho ka swona ndzi langutile mombo wa wena, hilaha i ngi munhu a languta mombo wa Xikwembu, kutani u ndzi amukerile hi tintswalo. 11Wa nga amukela nhlengo wa mina lowu byisiweke eka wena, hikuva Xikwembu xi ndzi tatele tintswalo; a ndzi pfumari nchumu.” A n'wi sindzisa a kondza a amukela.
12Kutani Esawu a ku: “A hi sukeni hi muka, ndzi ta famba na wena.”
13Kambe Yakobo a ku: “Hosi yanga, wa swi tiva leswaku swihlangi swi tsanile, ni leswaku ndzi talelwe hi tinyimpfu ni tihomu leti an'wisaka; kutakuloko swi angwetlisiwa hi siku rin'we, swifuwana hinkwaswo swi nga fa. 14Hosi yanga, rhanga emahlweni ka nandza wa wena, mina ndzi ta sundzasundza khwatsinyana, hi ku pima mikondzo ya swifuwo leswi ndzi rhangelaka emahlweni, ni mikondzo ya swihlangi, ndzi kondza ndzi fika eSeyira, eka hosi yanga.”
15Esawu a ku: “Loko swi ri tano, ndzi ta ku siyela vanhu van'wana eka valavo ndzi nga na vona.”
Kambe a ku: “Hikwalaho ka yini xana? I ngi ndzi kume tintswalo emahlweni ka hosi yanga.” 16Kutani hi siku lero, Esawu a tlhela a famba hi ndlela ya yena ku ya eSeyira.
Ta ku fika ka Yakobo eKanana.
17Kutani Yakobo a ya eSukoti, a tiakela kona yindlu, a endlela ni swifuwo swa yena matshanganyana ya marhavi, hikwalaho-ke a nga thya vito ra xivandla xexo eSukoti (matshanganyana). 18Kutani Yakobo, nkarhi lowo a vuyaka Padani-Aramu, a fika hi ku tsaka emutini wa Xikeme, wu nga etikweni ra Kanana, a dzima mitsonga yakwe yi vandzamane ni muti. 19Kutani a xava xivandla lexi a dzimeke ntsonga wakwe eka xona, a humesa dzana ra makesita emavokweni ya vana va Hamoro, tata wa Xikeme. 20Kutani a aka gandzelo kona, a ri thya vito ra Eli-Elohe-Israele (Xikwembu, i Xikwembu xa Israele).
