GENESA 41

₁Kuteloko malembe mambirhi ma hundzile, Faro a lorha norho: Vonani, a a yimile ekusuhi ni nambu; ₂kutani a vona tihomu ta matswele ta ntlhanu na timbirhi leto saseka, leto nona, ti huma enambyeni, ti dya enhlangeni. ₃A tlhela a vona tihomu tin'wana ta matswele ta ntlhanu na timbirhi ti huma enambyeni endzhaku ka teto, ti ri leto biha, ta nyama leya ku ondza; kutani ti yima ekusuhi ni tihomu tin'wana eribuwini ra nambu. ₄Kutani tihomu leta ku biha, ta nyama leya ku ondza, ti dya leta ntlhanu na timbirhi letinene, leto nona. Kavaloko Faro a sisimuka. ₅Kutani a etlela kambe ra vumbirhi, a lorha, a vona min'oko ya ntlhanu na mimbirhi ya koro (tirigo), a yi mirile erihlangeni ri ri rin'we, leyi cheleke swinene; ₆a tlhela a vona min'oko ya ntlhanu na mimbirhi leyi chochiweke, leyi tshweke hi mheho ya le vuxeni, yi mirile ya timbakarhi. ₇Kutani min'oko leya timbakarhi yi kulungela min'oko leya ntlhanu na mimbirhi leyo chela swinene. Kutani Faro a khindlimuka, a kuma leswaku a a lorhile. ₈Nimixo, moya wa Faro a wu tshukile; kutani a rhuma ku ya vitana vangoma hinkwavo va Egipta ni tintlhari ta kona. Kutani Faro a va hlavutela milorho ya yena, kambe a ku vanga na un'we wa vona la tivaka ku hlamusela swona eka Faro.

₉Kavaloko ndhuna ya vacheleri a vulavula na Faro, a ku: “Namuntlha ndzi tsundzuka milandzu ya mina. ₁₀Faro a a karihele malandza ya yena, a hi nghenise ekhotsweni, endlwini ya ndhuna ya valanguteri, mina ni ndhuna ya vaphameri. ₁₁Kutani hi lorhe milorho hi vusiku byin'we, mina na yena; un'wana ni un'wana a lorha norho lowu nga ni ku hlamuseriwa ka wona. ₁₂Kambe wandzisanyana wa Muheveru, a a ri kona na hina, nandza wa ndhuna ya valanguteri; hi n'wi hlavutela, kutani a hi hlamusela milorho ya hina, un'wana ni un'wana hilaha a lorheke hakona. ₁₃Kute hilaha a nga hi hlamusela hakona, kunene swi endlise sweswo: Faro u ndzi tlherisele entirhweni wa mina, kambe loyiya, a n'wi hayeka.”

₁₄Kavaloko Faro a rhuma ku ya vitana Yosefa; kutani va ta hatlisa va n'wi humesa ekhotsweni; va n'wi byewula, a ambala tinguvu tin'wana, a ta eka Faro. ₁₅Kutani Faro a ku eka Yosefa: “Ndzi lorhe milorho, kambe a ku na la ndzi hlamuselaka yona; ndzi twile va ku vula leswaku loko u twe norho, wa hlamusela.”

₁₆Yosefa a hlamula Faro, a ku: “A hi mina: Xikwembu hi xona lexi nga ta hlamula Faro hi ku hlamula lokunene.”

₁₇Kutani Faro a ku eka Yosefa: “Eku lorheni ka mina, ndzi vone ndzi yima eribuwini ra nambu; ₁₈kutani ku huma enambyeni tihomu ta matswele ta ntlhanu na timbirhi, leto nona letinene, ti ri karhi ti dya enhlangeni; ₁₉kutani ku huma tihomu tin'wana ta ntlhanu na timbirhi endzhaku ka tona, ti ri ta ku ondza, ti bihe ngopfu, ti ondzile ni nyama; a ndzi nga si vona leto bihisa sweswo emisaveni hinkwayo ya Egipta. ₂₀Kutani tihomu leta ku ondza leto nyenyetsa, ti dya tihomu leta ntlhanu na timbirhi leto rhanga, leto nona. ₂₁Kuteloko ti ti kulungela endzeni ka tona, a ti vonakanga leswaku ti dye nchumu kambe a ta ha vonaka ni ku ondza kukotisa khale. Kavaloko ndzi khindlimuka. ₂₂Eku lorheni ka mina ndzi engeta ndzi vona min'oko ya ntlhanu na mimbirhi yi mirile erihlangeni rin'we, yi cherile swinene; ₂₃ndzi va ndzi vona ni min'oko ya ntlhanu na mimbirhi ya timbakarhi, leyi swinyeke, leyi tshweke hi moya wa vuxa, yi hume ndzhaku ka yin'wana. ₂₄Kutani min'oko ya timbakarhi yi kulungela min'oko leya ntlhanu na mimbirhi leyinene. Kutani ndzi byerile vangoma, kambe a ku na munhu la ndzi hlamuselaka.”

₂₅Yosefa a ku eka Faro: “Norho wa Faro i wun'we; Xikwembu xi tivisa Faro leswi xi nga ta swi endla. ₂₆Tihomu letinene ta ntlhanu na timbirhi, i malembe ya ntlhanu na mambirhi; kutani min'oko leyinene ya ntlhanu na mimbirhi, i malembe ya ntlhanu na mambirhi; i norho wun'we. ₂₇Kambe tihomu leta ntlhanu na timbirhi leta ku ondza, to nyenyetsa, leti nga huma endzhaku ka teto, i malembe ya ntlhanu na mambirhi; ni timbakarhi leta ntlhanu na timbirhi, leti swinyeke, leti nga tshwa hi moya wa vuxa, ma ta va malembe ya ntlhanu na mambirhi ya ndlala. ₂₈Hi yona mhaka yoleyo ndzi byelaka Faro; leswi Xikwembu xi nga ta swi endla, xi kombise Faro. ₂₉Waswivo, ku ta ta malembe ya ntlhanu na mambirhi ya ndzalo leyikulu etikweni hinkwaro ra Egipta. ₃₀Kutani ku ta humelela malembe ya ntlhanu na mambirhi ya ndlala endzhaku ka walawo; ndzalo hinkwayo yi ta rivariwa etikweni ra Egipta, ndlala yi ta heta tiko; ₃₁ndzalo a yi nga ha tiviwi etikweni leri hikwalaho ka ndlala yeleyo leyi landzanaka, hikuva yi ta va ndlala leyikulu ngopfu. ₃₂Kutani norho, loko wu humelele Faro kambirhi, hileswaku i mhaka leyi tiyisiweke hi Xikwembu, kambe Xikwembu xi ta hatlisa ku yi endla.

₃₃“Kutani sweswi, Faro a a lange munhu lowa mano, wo tlhariha, a n'wi veka ehenhla ka tiko ra Egipta. ₃₄Faro a a veke ni vakamberi etikweni hinkwaro, va teka xirhundzu xa vuntlhanu xa leswi mirisiwaka etikweni ra Egipta hi malembe ya ntlhanu na mambirhi laya ndzalo. ₃₅Kutani a va hlengelete swakudya hinkwaswo hi malembe walawo lamanene va hlengeleta koro emavokweni ya Faro, va hlayisa swakudya emitini. ₃₆Kutani swakudya sweswo yi ta va mbuva ya tiko hi malembe ya ntlhanu na mambirhi laya ndlala, lama nga ta va kona etikweni ra Egipta, tiko ri nga ti tshuka ri fa hi ndlala.”

₃₇Mhaka yeleyo yi tsakise Faro ni malandza ya yena hinkwawo. ₃₈Kutani Faro a ku eka malandza ya yena: “Xana hi nga kuma munhu la fanaka na loyi, yeloyi moya wa Xikwembu wu nga eka yena?” ₃₉Kutani Faro a ku eka Yosefa: “Leswi Xikwembu xi nga ku kombisa mhaka leyi hinkwayo, a ku na munhu lowo tlhariha ni lowa ku twisisa kukotisa wena. ₄₀Hi wena la nga ta va hosi ya yindlu ya mina, kutani tiko ra mina hinkwaro ri ta fumiwa hi nomu wa wena; ntsena ndzi ta va nkulukumba eka wena, hi xiluvelo xa mina.” ₄₁Faro a engeta a ku eka Yosefa: “Waswivo, ndzi ku vekile ehenhla ka tiko hinkwaro ra Egipta.” ₄₂Faro a susa xingwavila xa yena eritihweni ra yena, a vehela eritihweni ra Yosefa; a n'wi bombisa hi mikhancu leya ntsembyana lowo vevuka, a n'wi bela ritlama ra nsuku enhan'wini; ₄₃a n'wi tshamisisa ekalichini leyi landzaka ya yena, kutani va huwelela emahlweni ka yena, va ku: “Abreke!” (Khinsamani!) Kutani a n'wi veka ehenhla ka tiko hinkwaro ra Egipta. ₄₄Kutani Faro a ku eka Yosefa: “Hi mina Faro; loko ku nga ri hi ku lerisa ka wena, a ku na munhu la nga tlakusaka voko ra yena kumbe nenge wa yena etikweni hinkwaro ra Egipta.” ₄₅Kutani Faro a thya Yosefa vito ra Safanati-Paneyaka (muhlavuteri wa leswi fihliweke); kutani a n'wi lovota nsati, i Asnati, n'wana Potifera, muprista wa Ono. Kavaloko Yosefa a huma ku ya kambela tiko ra Egipta.

₄₆Yosefa a a ri ni malembe ya makume manharhu nkarhi lowu a yimaka emahlweni ka Faro, hosi ya Egipta; kutani Yosefa a huma emahlweni ka Faro, a rhendzeleka etikweni hinkwaro ra Egipta. ₄₇Kutani hi malembe laya ntlhanu na mambirhi ya ndzalo etikweni, va pfune ngopfungopfu. ₄₈Yosefa a hlengeleta swakudya hinkwaswo swa malembe ya ntlhanu na mambirhi etikweni ra Egipta, a hlayisa swakudya emitini, a veka emutini wun'wana ni wun'wana swakudya swa tiko leri nga ekusuhi na wona. ₄₉Yosefa a va a hlengeleta koro, i ngi i sava ra lwandle hi ku tala ngopfungopfu, va ko va tshika ku hlaya, hikuva a swi tsandza vahlayi.

₅₀Kakuloko malembe ya ndlala ma nga si fika, vana vambirhi va velekele Yosefa hi Asnati, n'wana Potifera, muprista wa Ono. ₅₁Lowa hosi, Yosefa a n'wi chula vito ra Manase (ku rivala) a ku: “Hikuva Xikwembu xi ndzi riverisile ku karhala ka mina, ni swa le kaya hinkwaswo swa le ka tatana.” ₅₂Lowa ndzisana a n'wi thya vito ra Efrayimi (mbhandzu wa vumbirhi), a ku: “Hikuva Xikwembu xi ndzi tatisele etikweni ra nhlomulo wa mina.”

₅₃Malembe laya ntlhanu na mambirhi ya ndzalo ma va kona etikweni hinkwaro ra Egipta. ₅₄Kutani malembe ya ntlhanu na mambirhi ya ndlala ma sungula ku fika, hilaha Yosefa a nga vula hakona; ndlala yi va kona ematikweni hinkwawo, kambe etikweni ra Egipta swakudya a swi ri kona. ₅₅Kuteloko tiko hinkwaro ra Egipta ri nghenele hi ndlala, ri rilela swakudya eka Faro, Faro a ku eka Vaegipta hinkwavo: “Yanani eka Yosefa, mi endla leswi a nga ta mi byela swona.” ₅₆Kutani ndlala yi funengeta misava hinkwayo; kavaloko Yosefa a pfula tindlu ta mbuva hinkwato, a xavisa koro eka Vaegipta; kambe ndlala a yi ri kona leyikulu etikweni ra Egipta. ₅₇Kutani va matiko hinkwawo va ta eEgipta ku ta xava koro eka Yosefa, hikuva ndlala a yi ri leyikulu ngopfu ematikweni hinkwawo.