GENESA 46

₁Israele a suka a ri ni swilo swa yena hinkwaswo; a fika eBerexeba, a humesela Xikwembu xa Isaka, tata wa yena, magandzelo. ₂Kutani Xikwembu xi vulavula na Israele hi swivonakariso swa vusiku, xi ku: “Yakobo, Yakobo!”

A hlamula a ku: “Hi mina loyi.”

₃Xi ku: “Hi mina Xikwembu, Xikwembu xa tata wa wena; u nga chavi ku ngirimela eEgipta, hikuva ndzi ta ku endla tiko lerikulu kona. ₄Na mina ndzi ta ngirimela eEgipta na wena, kambe ndzi ta tlhela ndzi ku tlhandlukisela halenu hakunene; Yosefa u ta ku vuyetela mahlo.”

₅Yakobo a suka eBerexeba; vana va Israele va fambisa Yakobo, tata wa vona, ni swihlangi swa vona, ni vasati va vona hi tigolonyi toleto Faro a nga ti rhuma ku ya va rhurhisa. ₆Va teka ni mitlhambi ya vona ni swigotso leswi ngi va ri na swona etikweni ra Kanana, va kongoma eEgipta, a ri Yakobo ni rixaka ra yena hinkwaro. ₇A teka na yena vana va yena, ni vatukulu va yena, ni vana va xisati va yena, ni vatukulu va xisati va yena, ni rixaka ra yena hinkwaro, va ya eEgipta.

₈Mavito ya vana va Israele lava nga ya eEgipta, hi lawa: Yakobo ni vana va yena. Mativula ya Yakobo i Rhuveni. ₉Vana va Rhuveni: Hanoko, na Palu na Hesironi na Karimi. ₁₀Vana va Simiyoni: Yemuwele, na Yamini, na Ohada, na Yakini, na Sohari, na Xawulu, n'wana wa nsati wa Mukanana. ₁₁Vana va Levhi: Gerixoni, na Kohata na Merari. ₁₂Vana va Yuda: Ere, na Onani, na Xela, na Perese na Zera; kambe Ere na Onani a va fele etikweni ra Kanana. Vana va Perese a a ri Hesironi na Hamula. ₁₃Vana va Isakara: Tola, na Puwa, na Yobo na Ximroni. ₁₄Vana va Zebuloni: Seredi, na Elone na Yahaliele. ₁₅Hi vona vana va Leya, lava a velekeleke Yakobo, loko va ha ri Padani-Aramu, na Dina, n'wana wa xisati wa Yakobo; vana va yena va xinuna ni va xisati a va ri vanhu va 33.

₁₆Vana va Gadi: Sefoni, na Hagi, na Xuni, na Esiboni, na Eri, na Arodi na Areli. ₁₇Vana va Asere: Yimina, na Yixivha, na Yixivhi, na Beriya, na Seraka, makwavo wa xisati wa vona. Vana va Beriya a va ri va Hebere na Malikiele. ₁₈Hi vo lavo vana va Zilipa, yeloyi Labani a nyikeke Leya, n'wana wa yena; a velekele Yakobo vanhu valavo, va khume na ntlhanu na un'we.

₁₉Vana va Rahele, nkata Yakobo: Yosefa na Benjamini. ₂₀Etikweni ra Egipta, Yosefa a veleka Manase na Efrayimi, lava a velekeriweke hi Asnati, n'wana Potifera, muprista wa Ono. ₂₁Vana va Benjamini: Bela, na Bekere, na Axibele, na Gera, na Naamani, na Ehi, na Roxa, na Mupimi, na Hupimi, na Aridi. ₂₂Valavo i vana va Rahele, lava a velekeleke Yakobo; hinkwavo a va ri vanhu va khume na mune.

₂₃N'wana wa Dani a a ri Huximi. ₂₄Vana va Neftali: Yahasele, na Guni, na Yesere, na Xileme. ₂₅Hi vona vana va Biliha, yeloyi Labani a nga nyika Rahele, n'wana wa yena; a velekela Yakobo vana valavo; hinkwavo a va ri vanhu va ntlhanu na vambirhi.

₂₆Vanhu hinkwavo lava nga ya Egipta na Yakobo, va hume eswifungheni swa yena, a va ri vanhu va 66, ehandle ka vasati va vana va Yakobo. ₂₇Kutani vana va Yosefa, lava velekeriweke yena eEgipta, a va ri vambirhi. Vanhu hinkwavo va yindlu ya Yakobo lava nga ya eEgipta, a va ri 70.

₂₈Yakobo a rhangisa Yuda emahlweni, a n'wi rhumela eka Yosefa, a ta n'wi lunghisela ndlela ya eku ya eGoxeni. Va fikisa sweswo etikweni ra Goxeni. ₂₉Kutani Yosefa a bohela kalichi yakwe, a khandziya, a ya hlangana na Israele, tata wakwe, eGoxeni, kutani a humelela eka yena, a wela enhan'wini ya yena, a rila a hlwela enhan'wini ya yena. ₃₀Kutani Israele a ku eka Yosefa: “A ndzi fe sweswi, leswi ndzi nga vona mombo wa wena, hikuva wa karhi wa hanya.”

₃₁Kutani Yosefa a ku eka vamakwavo ni ka va yindlu ya tata wa yena: “Ndza ha tlhela ndzi ya tivisa Faro, ndzi ta ku eka yena: ‘Vamakwerhu ni va yindlu ya tatana lava humaka etikweni ra Kanana, va fikele la ka mina; ₃₂vanhu lava, i varisi, hikuva ntirho wa vona i ku risa mitlhambi, va tile ni swifuwana swa vona ni swifuwo swa vona, ni swigotso hinkwaswo leswi va nga na swona.’ ₃₃Kutakuloko Faro a mi vitana, a mi vutisa, a ku: ‘Mitirho ya n'wina i yihi?’ ₃₄mi ta ku eka yena: ‘Malandza ya wena i varisi va mitlhambi, ku suka evutsongwaneni bya hina ku fikela sweswi, hina ni vatata wa hina.’ Hi kona mi nga ta tiva ku tshamisa etikweni ra Goxeni, hikuva varisi hinkwavo va mitlhambi va nyenyetsa etikweni ra Egipta.”