GENESA 48

₁Endzhaku ka timhaka teto, va ku eka Yosefa: “Waswivo, tata wa wena wa vabya.” Kavaloko a teka vana va yena vambirhi, Manase na Efrayimi. ₂Kutani va tivisa Yakobo, va ku: “N'wana wa wena, Yosefa, hi loyi, wa ta eka wena.” Kutani Israele a sisimuka, a tshamisa emasangwini. ₃Yakobo a ku eka Yosefa: “Xikwembu xa matimba hinkwawo xi tshama xi tikomba eka mina eLuzi, etikweni ra Kanana, xi ndzi katekisa, ₄xi ku eka mina: ‘Waswivo, ndzi ta ku andzisa ndzi ku tata, ndzi ku endla vunyingi bya matiko, ndzi ku nyika tiko leri, ni vatukulu va wena, endzhaku ka wena, yi ta va ndzhaka leyi nga heriki.’

₅“Kutani sweswi, vana va wena lavambirhi, lava u va velekeke etikweni ra Egipta, ndzi nga si ta eka wena etikweni ra Egipta, va ta va va mina: Efrayimi na Manase va ta va va mina kukotisa Rhuveni na Simiyoni. ₆Kambe vana va wena lava u nga va veleka endzhaku ka vona, va ta va va wena; va ta hlayiwa hi mavito ya vamakwavo. ₇Kuteloko ndzi ri karhi ndzi huma ePadani, ndzi fela hi Rahele, etikweni ra Kanana, endleleni, mpfhuka wu nga ri wungani ku fika eEfrata; ndzi n'wi lahla kona, endleleni leyi yaka eEfrata.” (Wu nge Betlehema).

₈Kakuloko Israele a vona vana vambirhi va Yosefa, a ku: “Valavo i va mani xana?”

₉Yosefa a hlamula a ku eka tata wa yena: “I vana va mina, valavo Xikwembu xi ndzi nyikeke vona kwala.”

Yakobo a ku eka yena: “Wa nga va neha eka mina, ndzi va katekisa.” ₁₀Kambe mahlo ya Israele a ma kunguhele hi ku dyuhala, a tsandzeka ku vona. Yosefa a va tshineta, yena a va ntswontswa, a va singarhela. ₁₁Kutani Israele a ku eka Yosefa: “A ndzi nga ehleketanga leswaku ndzi ta vona mombo wa wena, kasi hilaha Xikwembu xi vuyeke xi ndzi langutisisa ni vana va wena.” ₁₂Kutani Yosefa a va susa emarumbini ya tata wa yena, a khinsama ehansi.

₁₃Yosefa a tlhela a va teka havambirhi, a veka Efrayimi evokweni ra yena ra xinene, a kongomana ni voko ra ximatsi ra Israele; Manase yena, a a ri evokweni ra ximatsi, a kongomana ni voko ra xinene ra Israele, a va tshinetela eka yena. ₁₄Kambe Israele a tshambulutela voko ra xinene a ri veka enhlokweni ya Efrayimi (kasi a a ri wandzisana), kutani voko ra ximatsi a ri tlhandleka enhlokweni ya Manase, a hambanyisa mavoko ha vomu, kasi Manase a a ri lowa hosi. ₁₅Kavaloko a katekisa Yosefa, a ku: “Xikwembu lexi vakokwana, Abrahama na Isaka, va fambeke emahlweni ka xona, Xikwembu lexi nga ndzi risa mpfhuka ndzi velekiwa ku fikela sweswi, ₁₆ni ntsumi leyi nga ndzi lamula eku biheni hinkwako, a xi katekise varisanyana lavo; a va thyiwe vito ra mina, ni mavito ya vakokwana Abrahama na Isaka, va andza ngopfungopfu laha emisaveni.”

₁₇Kambe, kuteloko Yosefa a vona leswaku tata wa yena a tlhandleke voko ra yena lera xinene enhlokweni ya Efrayimi, mhaka leyi, yi n'wi vavisa; kutani a tlakusa voko ra tata wa yena a ri susa enhlokweni ya Efrayimi, a tlhandlekisa enhlokweni ya Manase; ₁₈Yosefa a ku eka tata wa yena: “U nga endlisi sweswo tatana, hikuva loyi hi lonkulu; tlhandleka voko ra wena ra xinene enhlokweni ya yena.”

₁₉Kambe tata wa yena a ala, a ku: “Ndza swi tiva, n'wananga, ndza swi tiva; na yena u ta va tiko, na yena, u ta va nkulukumba, hambi swi ri sweswo, ndzisana u ta va lonkulu eka yena, ni vatukulu va yena va ta endla vunyingi bya matiko.”

₂₀A va katekisa sweswo hi siku lero, a ku: “Vaisraele a va vule ku kateka ha wena, va ku: ‘Xikwembu a xi ku endle kukotisa Efrayimi ni kukotisa Manase.’ ” Hi mukhuva wolowo, a veka Efrayimi emahlweni ka Manase.

₂₁Kutani Israele a ku eka Yosefa: “Waswivo, ndza fa; kambe Xikwembu xi ta va na n'wina, xi ta mi tlherisela etikweni ra vakokwa wa n'wina. ₂₂Kutani mina ndzi ku nyika ku avela kun'wana ehandle ka vamakwenu, swi nga leswi ndzi swi kumeke eka Vaamori hi tlhari ra mina ni vurha bya mina.”