VAHEVERU 2

₁Hikwalaho, hi fanele ku tiyisela hi ku tlurisisa eka timhaka leti hi ti yingiseke, leswaku hi nga ti tshiki ti khaluta. ₂Hikuva loko rito leri vuriweke hi tintsumi ri tiyile, loko na kona, ku tlula ka milawu, ni ku tiarisa hinkwako ku kumile hakelo leyi ringanaka, ₃hina hi ta chupukisa ku yini, loko hi nga xiyi ku hlayiseka loko tano, loku nga sungula ku vuriwa hi Hosi, kambe ku tiyisiwile eka hina hi lava swi yingiseke, ₄Xikwembu xi ri karhi xi tiyisa vumbhoni bya vona hi swikombiso leswa masingita, ni mitirho leyo tala ya matimba; xi ri karhi xi va avela Moya lowo Kwetsima, hilaha xi swi rhandzaka hakona.

₅Hikuva misava leyi nga ta ta, leyi hi yi vulaka, a yi vanga yi vekiwa eku fumeni ka tintsumi, ₆kambe mbhoni yin'wana yi vurile kun'wana, yi te: “Munhu i yini, leswaku u ta n'wi anakanya; kumbe n'wana wa munhu i yini, leswaku u ta n'wi endzela? ₇U n'wi endlile la nge hansinyana ka tintsumi; u n'wi vekile ehenhla ka mitirho ya mavoko ya wena; ₈u vekile hinkwaswo ehansi ka milenge ya yena.” Hikuva loko Xikwembu xi vekile hinkwaswo ehansi ka yena, a nga siyanga nchumu lowu nga vekiwangiki ehansi ka yena; hambi swi ri tano, a hi si vona hinkwaswo swi vekiwile ehansi ka yena. ₉Kambe Yesu loyi ingi a vekiwile ehansinyana ka tintsumi hi nkarhi wu nga ri wungani, ha n'wi vona a rhwexiwile ku kwetsima ni xichavo hikwalaho ka rifu leri a ri tweke, leswaku hi tintswalo ta Xikwembu, a twa rifu hikwalaho ka munhu un'wana ni un'wana.

₁₀Hikuva a swi n'wi fanela, loyi hinkwaswo swi endleriweke yena, kambe swi endliwe hi yena, leswaku loko a lave ku yisa lavo tala eku vonakaleni, a hetisisa hi ku vaviseka, la nga n'wini wa ku hlayiseka ka vona. ₁₁Hikuva, hambi a ri la basisaka, hambi va ri lava basisiweke, hinkwavo va huma eka un'we; hikwalaho a nga na tingana ku va vula vamakwavo, ₁₂loko a ku: “Ndzi ta tivisa vamakwerhu vito ra wena, ndzi ku yimbelelela tinsimu exikarhi ka tinhlengeletano. ₁₃Na swona, u ri: Ndzi ta va loyi a ku tshembaka.” Na swona: “Hi mina loyi, ni vana lava Xikwembu xi ndzi nyikeke vona.” Na swona, u ri: Ndzi ta va loyi a ku tshembaka.”

₁₄Hikwalaho; kukotisa leswi vana va averiwaka ngati ni nyama, hi mukhuva wolowo, na yena, u averiwile swona, leswaku a ta herisa hi rifu la nga ni matimba ya rifu, a nga Diyavulosi, ₁₅ni ku tshunxa un'wana ni un'wana la bohiweke evukhumbini hi masiku hinkwawo ya ku hanya ka yena hi ku chava rifu. ₁₆Hikuva kunene a nga tekanga tintsumi, kambe u tekile rixaka ra Abrahama. ₁₇Hikwalaho-ke, a swi fanela leswaku a fanisiwa hinkwako ni vamakwavo, leswaku a ta va muprista lonkulu la nga ni ku tsetselela, ni ku tshembeka ka hinkwaswo swa Xikwembu, a ko a kutsula tiko eku dyoheni ka rona. ₁₈Hikuva leswi a tweke ku vaviseka ni ku ringiwa, wa swi kota ku pfuna lava ringiwaka.