VAHEVERU 5

₁Hikuva muprista lonkulu, hambi a ri mani na mani, leswi a tekiwaka exikarhi ka vanhu, a vekeriwa ta Xikwembu hikwalaho ka vanhu, leswaku a ta humesa mihlengo ni magandzelo hikwalaho ka swidyoho, ₂a ri karhi a swi kota ku tsetselela lava nga tiviki, ni lava lahlekeke, leswi na yena a rhendzeriwaka hi mikarhalo. ₃Kutani hikwalaho ka yona, swa n'wi fanela leswaku a tihumesela magandzelo hikwalaho ka swidyoho swa yena, kukotisa loko a humesele tiko. ₄Kambe a ku na munhu la nga titekelaka vuhosi lebyi, loko a nga ri la vitiweke hi Xikwembu, kukotisa Aroni.

₅Hi mukhuva wolowo, Kriste, na yena, a nga tikurisanga ku tiendla muprista lonkulu, kambe u vekiwe hi loyi a nga te eka yena: “N'wananga hi wena, ndzi ku velekile namuntlha”; ₆kukotisa leswi a n'wi byelaka kun'wana, a ku: “U muprista hilaha ku nga heriki hi mukhuva wa Melkisedeke.” ₇Hi yena loyi, emasikwini ya nyama ya yena, a tiseleke loyi ngi a ri ni matimba ya ku n'wi ponisa eku feni, mikhongelo ya ku chivirika, a ri karhi a huwelela ni ku rila; a tlhela a yingisiwa, a susiwa tingana; ₈kutani, hambi a ha ri N'wana, u dyondzile ku yingisela hi leswi a vavisiweke ha swona; ₉kutani, kuteloko a hetisekile, a va n'wini wa ku kutsula loku nga heriki, eka hinkwavo lava n'wi yingisaka; ₁₀hikuva u vuriwile hi Xikwembu muprista lonkulu hi mukhuva wa Melkisedeke.

₁₁Emhakeni leyi, hi ni leswo tala leswi hi nga swi vulaka, kambe swa nonon'hwa ku swi hlamusela, hikuva mi hundzukile lava lolohaka eku yingiseni. ₁₂Hikuva a swi mi fanele khale ku va vafundhisi, kasi ni sweswi, ma ha fanela ku tivisiwa masungulo ya timhaka ta Xikwembu; kutani mi hundzukile vanhu lava faneriwaka hi ntswamba, ku nga ri hi swakudya leswi tiyeke. ₁₃Hikuva un'wana ni un'wana la wundliwaka hi ntswamba, u ta kohliwa hi rito ra ku lulama, hikuva a a ri n'wana; ₁₄kambe swakudya leswi tiyeke i swa vakulukumba, va nga lava tivaka ku avanyisa leswo saseka ni leswo biha, hikuva va swi toloverile.