ESAYA 20

₁Hi lembe leri Tartani a nga rhumiwa hi Sargoni, hosi ya Asiriya, a wela eAxidodo, a wu rhendzela, a wu teka, ₂emikarhini yoleyo Yehovha a vulavula na Esaya, n'wana Amotsi, a n'wi byela, a ku: “Famba u tshunxile saka leri nga exisutini xa wena, u susile ni tintanghu emilengeni ya wena.” Kutani a endlisa sweswo, a famba a tshunxile, a susile tintanghu. ₃Kutani Yehovha a ku: “Tanihi leswi nandza wa mina Esaya a fambaka a tshunxile a nga ri na tintanghu hi malembe manharhu, xi ta va xikombiso ni masingita eka Egipta na Etiyopiya; ₄hi mukhuva wolowo hosi ya Asiriya yi ta famba ni lava khotsiweke Vaegipta ni vakhomiwa Vaetiyopiya, lavantshwa ni swikoxa, va hluvurisiwile va nga ri na tintanghu, mihlana ya vona yi nga funengetiwanga, ti ri tingana ta Egipta.

₅“Kutani va ta rhurhumela, va tshutshala hikwalaho ka Etiyopiya loyi va n'wi tshembeke, ni hikwalaho ka Egipta loyi va tidzuniseke ha yena; ₆kutani lava akeke exihlaleni xolexo va ta ku hi siku rolero: ‘Vonani ku lova ka loyi ngi hi n'wi tshembile, loyi hi nga tsutsumela eka yena ku ya pfuniwa ni ku lamuleriwa emavokweni ya hosi ya Asiriya! Kutani, na hina, hi nga balekisa ku yini?’ ”