Ta ku biwa ni ku pona ka Ariele.
1Khombo ri na Ariele, ri na Ariele, muti lowu Davhida a simekeke ntsonga wa yena kona!
Engetelelani lembe hi lembe; a ku tlhandlamane mikhuvo, 2kutani ndzi ta wela eAriele, ku ta va ku rila ntsena ni mikosi; kambe eka mina, u ta tshama a va kukotisa Ariele, (muti wa alitari ya Xikwembu).
3Ndzi ta ku etlelela hi matlhelo hinkwawo, ndzi ku rhendzela hi mavandla, ndzi ku akela makhokholo. 4U ta tsongahatiwa, rito ra wena ri ta huma ehansi, marito ya wena ma ta huma entshurini tanihi marito ya xindzhuti, ku vulavula ka wena ku ta huma entshurini tanihi rito ra ku n'unun'uta.
5Kambe ntshungu wa valala va wena wu ta va tanihi ritshuri lero vevukanyana; ntshungu wa tinhenha wu va tanihi mungu lowu hahaka; kan'wekan'we swi ta humelela! 6U ta endzeriwa hi Yehovha wa tinyimpi hi ku ninginika ka misava, hi ndlati ni ku pfuma lokukulu, ni xihuhuri ni xidzedze, ni langavi ra ndzilo lowu hisaka. 7Kutani ntshungu wa matiko hinkwawo lowu lwaka na Ariele, ni hinkwavo lava rhendzeleke muti ni khokholo ra wona, wu ta va tanihi norho, ni leswi voniwaka emunyameni wa vusiku. 8Tanihi munhu loko a ri ni ndlala a lorha, leswaku wa dya, kutani a pfuka, a twa ndlala; kukotisa ni munhu la nga ni torha, loko a lorha a ri karhi a nwa; kutani a pfuka, a karhele, kambe moya wa yena wu ni torha; swi ta va tano ni mitshungu ya matiko lama humaka nyimpi ku lwa ni ntshava ya Siyoni.
9Yimani, mi hlamala! Tisiveni mahlo, mi swinya! Va pyopyiwile, ku nga ri hi vhinyo; va tsekatseka, ku nga ri hi ku hlula hi byalwa. 10Hikuva Yehovha u mi nyike moya wa vurhongo, u pfarile mahlo ya n'wina, hileswaku vaprofeta; u funengete tinhloko ta n'wina hi ritsandze, hileswaku vavoni. 11Kutani hlavutelo hinkwayo eka n'wina yi kotisa timhaka ta buku leyi lemeriweke; yi nyikiwa munhu la tivaka ku hlaya, kutani mi ku eka yena: “Yi hlaye-ke!” A hlamula, a ku: “Ndza hluleka, hikuva yi lemeriwile.” 12Kumbe loko yi nyikiwa la nga tiviki ku hlaya, va ku: “Hlaya!” A nga hlamula a ku: “A ndzi tivi ku hlaya.”
13Hosi yi te: “Loko tiko leri, ri titshinetile eka mina hi milomu, va ndzi chava hi nomu, kasi timbilu ta vona ti le kule na mina, ni xichavo lexi va ndzi chavaka ha xona, wu ri nawu ntsena wa vanhu lowu va wu dyondzeke. 14Hikwalaho, ndzi ta endla ehenhla ka tiko leri, mitirho leyi hlamarisaka ni masingita; ku tiva ka tintlhari ta vona ku ta hela, ni ku twisisa ka va mano va vona ku ta lova.”
15Khombo eka lava tumbelelaka leswaku va fihlela Yehovha makungu ya vona, va endla mitirho ya vona emunyameni, va ku: “Hi ta voniwa hi mani? La hi tsundzukaka i mani?” 16Yo! Vumbabva bya n'wina! Vumba byi nga fanisiwa ni muvumbi wa byona xana? Mitirho yi nga landzula muendli wa yona, yi ku: “A ndzi endliwi hi yena xana?” Kumbe xilo lexi vatliweke xi nga sandza muvatli wa xona, xi ku: “A nga na vutlhari!”
17Vonani, ku nga ri kungani Lebanoni u ta hundzuka nsimu ya mirhi leyi tswalaka, kutani yona nsimu yi ta vuriwa xihlahla. 18Hi siku lero lava feke tindleve va ta yingisa timhaka ta Buku; kutani mahlo lama feke ma ta boxa vusiku ni munyama wa byona. 19Lava nga enhlomulweni va ta tsakela Yehovha; lava pfumalaka va ta titsakisa hi Mukwetsimi wa Israele. 20Hikuva muxanisi a nga ka a nga ha vi kona; musandzi, na yena, u ta hela, ni vanhu hinkwavo lava nga hanyanya na yena ku endla swo biha va ta va va susiwile; 21va nga lava hehlaka van'wana ehubyeni, va rindza loyi a tengaka timhaka ta yena, va wisa la lulameke hi mavunwa ya vona.
22Hikwalaho Yehovha la kutsuleke Abrahama, u byela yindlu ya Yakobo, a ku: “Sweswi, Yakobo a nga ka a nga ha khomiwi hi tingana, kutani mombo wa yena wu nga ha tshami wu tshutshala. 23Hikuva vana va yena, siku va vonaka mitirho ya mavoko ya mina eka yena, va ta dzunisa vito ra mina; ina, va ta dzunisa Mukwetsimi wa Yakobo, va chava Xikwembu xa Israele. 24Kutani lava moya wa vona ingi wu hambukile va ta dyondza vutlhari, ni lava nga kaneta, va ta amukela dyondzo.”
