ESAYA 42

₁“Hi loyi nandza wa mina, loyi ndzi nga ta n'wi yimela, Muhlawuriwa wanga, loyi moya wa mina wu n'wi tsakelaka. Ndzi vekile moya wa mina ehenhla ka yena, u ta dyondzisa vamatiko leswo lulama. ₂A nga ka a nga huweleri, a nga ka a nga tlakusi rito, a nga ka a nga ri twakarisi emitsendzeleni. ₃A nga ka a nga tshovi rihlanga leri khinyekeke, a nga ka a nga timi rivoninyana leri nge ketiketi. U ta dyondzisa swo lulama entiyisweni. ₄A nga ka a nga heri mbilu ni ku karhala, a ko a tiyisa leswo lulama emisaveni, kutani swihlale swi va swi titshembisa enawini wa yena.”

₅La vulaka sweswo i Yehovha la tumbuluxeke matilo loyi a ma andlaleke, la anekeke misava ni swo mila swa yona, loyi a nyikeke moya eka lava akeke eka yona, ni ku hefemula ka lava fambaka eka yona. ₆“Mina Yehovha, ndzi ku vitanele vutomi, ndzi ta ku khoma hi voko, ndzi ku hlayisa, ndzi ku veka leswaku u endla xinakulobye ni tiko, hileswaku u ta va ku vonakala ka matiko, ₇ku pfula mahlo ya lavo fa mahlo, ni ku humesa ekhotsweni lava khomiweke, ni le tronkweni lava tshamaka emunyameni. ₈Hi mina Yehovha, hi rona vito ra mina, ndzi nga ka ndzi nga nyiki un'wana ku vonakala ka mina, ni swifaniso ku vongiwa ka mina. ₉Vonani, leswo rhanga swi endlekile, kutani ndzi mi tivisa leswintshwa, ndza swi bvumbha swi nga si humelela.”

₁₀Yimbelelani Yehovha risimu lerintshwa, yimbani swidzuniso swa yena emakun'wini ya misava, n'wina mi fambaka elwandle, na n'wina mi hanyaka eka rona, n'wina swihlale ni vaaki va swona. ₁₁Mananga ni miti ya kona a yi tlakuse rito, swimitana swa Vakedari a swi tlakuse rito; lava akeke eSela a va huwelele hi ku tsaka, etintshaveni a ku biwe mikulungwana! ₁₂A ku dzunisiwe Yehovha, a ku vuriwe eswihlaleni ku dzuneka ka yena!

₁₃Yehovha wa huma tanihi nhenha, u pfuxa vukari bya yena tanihi munhu la yaka enyimpini, u tlakusa rito, u ba huwa, u kombisa matimba ya yena eka valala va yena. ₁₄U ri: “Ndzi miyerile khale, ndzi ku ntsee, ndzi va ndzi tikhoma; sweswi ndzi ta rila tanihi wansati la velekaka, evukarini bya mina ndzi ta tlhakama; ndzi onha tintshava ni switsunga, ₁₅ndzi ta vunisa rilambyana ra swona, milambu ndzi ta yi hundzula yi va misava leyi tiyeke, ndzi ta omisa mativa. ₁₆Ndzi ta fambisa lavo fa mahlo endleleni leyi va nga yi tiviki, ndzi va fambisa emitileni leyi va nga yi tiviki. Emahlweni ka vona ndzi ta hundzula munyama wu va ku vonakala, ni tintshava ti va rivala; hi leswi ndzi nga ta swi endla, ndzi nga ka ndzi nga va fularheli. ₁₇Va ta tlhelela endzhaku, va va ni tingana, lava tshembaka swifaniso leswi vatliweke, lava nga eka swifaniso leswi nyukisiweke: ‘Mi swikwembu swa hina.’

₁₈“N'wina vo fa tindleve, yingisani! Na n'wina vo fa mahlo, langutani, mi vona! ₁₉Lowo fa mahlo i mani, loko a nga ri nandza wa mina; la feke tindleve i mani loko yi nga ri ntsumi ya mina leyi ndzi yi rhumaka? I mani lowo fa mahlo tanihi la rhandziweke hi Xikwembu, i mani lowo fa mahlo tanihi nandza wa Yehovha? ₂₀U vone swilo swo tala, kambe a ku swi xiyanga; tindleve a ti pfuriwa, kambe a ku twanga nchumu.”

₂₁Yehovha u rhandzile ku katekisa Israele, kutani a va vekela nawu lowukulu ni lowu dzunekaka. ₂₂Kutani tiko leri, ri phangiwile swilo swa rona, ri ni vusweti, hinkwavo va bohiwile emabakweni va khotsiwile ekhotsweni, va phangiwile, ku hava mulamuleri, va hlanguriwile, kutani a ku na la vulaka: “Tlherisa!” ₂₃I mani wa n'wina la nga ta yingisa, la nga ta xiya timhaka teto, a ta swi twa? ₂₄La nyiketeke Yakobo eku phangiweni, na Israele eka lava n'wi hlanguriseke i mani? A hi Yehovha xana? Hi n'wi dyohele; kambe va arile ku famba etindleleni ta yena, a va yingisanga nawu wa yena. ₂₅Hikwalaho u cheletile Israele hi ku pfurha ka vukari bya yena, ni ku leva ka mivango. Mivango yi pfurhile, yi n'wi rhendzele hinkwako, kambe a nga swi twanga, yi n'wi lovisile kutani a nga swi hlayisanga.