Ku dyoha ka ririmi.
1Vamakwerhu, mi nga tshuki mi va vadyondzisi lavanyingi, mi ri karhi mi tiva leswaku hi ta kuma ku avanyisiwa loku tlurisaka; 2hikuva hinkwerhu ha hoxa eka leswo tala; kungakuloko un'wana a nga hoxi eku vulavuleni, loyi, i munhu la hetisekeke, la tivaka ku tifuma miri hinkwawo.
3Vonani, hi nghenisa matomu emilon'wini ya tihanci, leswaku ti ta hi yingisa, kutani hi fambisa miri hinkwawo wa tona. 4Vonani tingalava na tona, hambi ti ri letikulu swonghasi, hambi na swona ti susumetiwa hi mimoya ya matimba, ti fambisiwa hi xihendzulo lexitsongo, hinkwako laha muhendzuri a rhandzaka kona. 5Hi mukhuva wolowo, na rona ririmi, i xirho lexitsongo, kambe ri tidzunisa ngopfu. Vonani ndzilo lowutsongo, wu nga hisa tihunyi leto tala swonghasi! 6Ririmi, na rona, i ndzilo, i tiko ra ku homboloka; ririmi ri vekiwile eswirhweni swa hina ri nyamisa miri hinkwawo, ri va ri tshivelela ndlela hinkwayo ya ku hanya ka munhu; kutani na rona ri kondleteriwile hi ndzilo wa tihele.
7Kasi tinxaka hinkwato ta swivandzana ni tinyanyana hambi swi ri swikokovi, ni tinhlampfi, swi nga hluriwa, swi va swi hluriwile hi rixaka ra vanhu; 8kambe loko ri ri ririmi, a ku na munhu la ri kotaka; i ku biha loku nga hluriwiki, ri tele vuxungu lebyi dlayaka. 9Ha rona hi khensa Xikwembu Tatana, ha rona kambe, hi rhukana vanhu, lava endliweke hi xifaniso xa Xikwembu. 10Enon'wini wu ri wun'we, ku huma ku khensa ni ku rhukana. A swi faneli, vamakwerhu, leswaku timhaka ti va tano. 11Xana xihlovo xi nga pfelela hi nseledyana wu ri wun'we, mati yo nandziha ni ya ku bava xana? 12Vamakwerhu, xana murhi wa nkuwa wu nga swi kota ku veleka mihandzu ya mutlhwari xana? Kumbe vhinya wu nga veleka makuwa xana? Na swona, mati yo dzunga a ma swi koti ku endla mati yo nandziha.
Vutlhari byimbirhi.
13I mani la nga ni ku tlhariha ni ku tiva exikarhi ka n'wina xana? A a kombise mitirho ya yena hi mikhuva yo saseka leyi nga ni vutlhari lebyinene. 14Kambe loko mi chivirikela ku biha, kutani ku tengisana ku ri kona etimbilwini ta n'wina, mi nga tshuki mi tidzunisa, ni ku hemba hi ku dyohela leswinene. 15A hi byona vutlhari lebyi xikaka hi le henhla, kambe i bya misava, i bya vumunhu, ni bya mademona. 16Hikuva laha ku chivirika loko biha ni ku tengisana ku nga kona, na kona, ku va ni madzolonga, ni timhaka hinkwato leta tingana. 17Kambe vutlhari lebyi pfaka ehenhla, ku sungula ka byona i ku tenga, byi engeta byi va ni ku rhula, ni ku olova, ni ku yingisela, byi tele tintswalo, ni mihandzu leyinene, a byi tsekatseki, a byi kanganyisi. 18Kutani mihandzu ya ku lulama yi byariwa eku rhuleni, eka lava endlaka mitirho ya ku rhula.
