VAAVANYISI 5

₂“Khensani Yehovha!

Hikuva varihiseri va Vaisraele va rhangile emahlweni,

Na rona tiko ri titisile kona hi ku swi rhandza.

₃Yingisani, n'wina tihosi,

mi rhiya tindleve, n'wina tihosana!

Hi mina, hi mina, ndzi ta yimbelela Yehovha,

Ndzi ta yimbelela Yehovha, Xikwembu xa Israele!

₄Oho! Yehovha, kuteloko u suke eSeyira,

Loko u huma etikweni ra Edomu,

Misava yi tsekatseka, matilo ma n'oka,

Ni mapapa ma tshona mati.

₅“Tintshava ti suka emahlweni ka Yehovha,

Na yena Sinayi, emahlweni ka Yehovha, Xikwembu xa Israele.

₆“Emikarhini ya Xamgari, n'wana Anati,

Ni le mikarhini ya Yaele, tindlela a ti nga fambeki,

vaendzi a va hambukela etindleleni leto homboloka.

₇Vafambisi a va pfumaleka, a va pfumaleka eIsraeleni,

Ku fika loko ndzi humelela, mina Debora,

Ndzi yima kukota mana wa Israele.

₈Kakuloko Vaisraele va hlawula swikwembu leswintshwa,

Nyimpi yi humelela etinyangweni.

Xana xitlhangu, kumbe tlhari a ri kumiwa

Eka Vaisraele va 40 000 xana?

₉Mbilu ya mina yi ni vafumi va Israele,

Yi ni va tiko lava humeke hi ku rhandza ka vona.

Khensani Yehovha!

₁₀N'wina lava khandziyaka timbhongolo leto basa,

N'wina lava tshamaka emasangwini,

Na n'wina lava fambaka hi tindlela!

Yimbelelani!

₁₁Exikarhi ka swihlovo swa mati,

lava copaka miseve

A va dzunise mitirho yo lulama ya Yehovha,

Mitirho yo lulama ya vafambisi va Israele!

“Kutani tiko ra Yehovha ri xikela etinyangweni.

₁₂Pfuka, pfuka, Debora!

Pfuka, pfuka, u vula risimu!

Pfuka Baraka,

u fambisa lava u va khomeke, n'wana Abinowama!

₁₃Hi nkarhi wolowo lava seleke va tiko va hlule tinhenha,

Yena Yehovha a ndzi hlurisa vamatimba.

₁₄Van'wana a va ri va Efrayimi, lava sukeke eAmaleke.

Endzhaku ka wena ku huma Benjamini,

exikarhi ka vanhu va wena;

Ku humelela ni vafambisi va Makiri,

Ni va Zebuloni lava tamelaka peni ya mutsari.

₁₅Tihosana ta Isakara ti ta na Debora,

va Isakara na Baraka va n'wi landza enkoveni.

Eswinambyaneni swa Rhuveni,

Ku endliwile makungu lamakulu ya timbilu.

₁₆Xana a u tshamisela yini emadyelweni?

Xana a ku ri ku yingisela swirilo swa mitlhambi?

Eswinambyaneni swa Rhuveni,

A ku endliwa makungu lamakulu ya timbilu!

₁₇Giliyadi a titshamele ekaya ehase ka Yordani!

Xana Dani u tshamela yini emabyatsweni?

Asere a titshamele eribuwini

ra lwandle,

A titshamele emahlalukweni ya yena.

₁₈Zebuloni i tiko leri nga chaviki rifu,

Na yena Neftali swi va tano

Eswitsungeni swa le nhoveni.

₁₉“Tihosi ti fika ti lwa;

Ku lwa tihosi ta Kanana,

Ekusuhi na Taanaka, ematini yi Megido;

Kambe a va kumanga nchumu, hambi yi ri mali.

₂₀Tinyeleti ta le matilweni ti lwa,

Ti lwa na Sisera loko ti hundza hi tindlela ta tona.

₂₁Nambu wa Kixoni wu va kukurile,

Nambu wa khale, nambu wa Kixoni.

Oho! Moya wanga, u kandziyela va matimba ehansi.

₂₂Enkarhini lowu masondzo ya tihanci ma vandza ehansi

Hi ku tsutsuma, hi ku tsutsuma ka tinhenha ta vona.

₂₃“Rhuketelani Merozo, ku vula ntsumi ya Yehovha,

Rhuketelani, rhuketelani lava akeke kona;

Hikuva a va tangi ku ta pfuna Yehovha,

Ku ta pfuna Yehovha kun'we ni lava matimba.

₂₄“A ku dzunisiwe Yaele,

exikarhi ka vavasati,

Nsati wa Hebere, Mukeni!

A a dzunisiwe exikarhi ka vavasati

lava akeke emitsongeni.

₂₅Sisera a a kombele mati,

a n'wi nyika ntswamba,

A n'wi tisela mafurha ya wona hi nkambana wa tihosi.

₂₆A teka mhingu hi voko ra yena,

Hi lera xinene, a tamela nyundzu ya vafuri;

A bela Sisera, a n'wi bela enhlokweni,

Loko a n'wi tlhavile, a n'wi boxa xihlaya.

₂₇A korhama emilengeni ya yena, a wa, a lo lulululu,

A korhama emilengeni ya yena, a wa,

Laha a korhameke kona, hi kona a weleke ehansi, a fa.

₂₈“Mana wa Sisera a languta hi fasitere,

Emavonini ya fasitere a huwelela:

‘Golonyi ya yena yi hlwele ha yini ku fika xana?

Tigolonyi ta yena ti famba khwatsi ha yini-ke?’

₂₉Vavasati va vutlhari va rikwavo, va n'wi hlamula,

Na yena a tihlamula, a ku:

₃₀‘A va kumanga nchumu xana?

A va avelananga leswi phangiweke?

Wanuna un'wana ni un'wana a teka nhwanyana kumbe vambirhi.

Tinguvu ta mavala leti phangiweke, i ta Sisera!

Tinguvu ta mavala leti lukiweke leti phangiweke,

Tinguvu timbirhi ta mavala leti lukiweke,

Ta ku bombisa nhamu ya muhluri.’

₃₁“Oho! Yehovha! Valala hinkwavo va wena a va lovisiwe sweswo!

Loko, va ri lava ku rhandzaka, va ta fana ni dyambu,

Loko ri tsuvuka ematimbeni ya rona.”