Ta Yeremiya loko a bvumbha ku onhaka ka Yerusalema, ni ka Tempele.
1Eku sunguleni ka ku fuma ka Yoyakimi, n'wana Yosiya, hosi ya Yuda, rito leri humaka eka Yehovha ri ta eka mina, ri ku:
2“Yehovha u vula, a ku: Famba, u yima erivaleni ra yindlu ya Yehovha, u byela va miti hinkwayo ya Yuda, lava nghenaka ku ya khinsama endlwini ya Yehovha marito hinkwawo lawa ndzi ku lerisaka ku va byela wona; u nga va fihleli rito, hambi ri ri rin'we. 3Kumbe va ta yingisa, va hundzuka un'wana ni un'wana emikhuveni leyo biha ya yena, leswaku ndzi ta hundzuka eku biheni kuloko mina ndzi anakanyeke ku va endla hikwalaho ka mitirho ya vona leyo biha.
4“U va byela, u ku: ‘Ku vula Yehovha: Kungakuloko mi nga ndzi yingisi, ku famba emilawini leyi ndzi yi vekeke emahlweni ka n'wina, 5ni ku yingisa marito ya malandza ya mina vaprofeta, volavo ndzi tshameke ndzi va rhumela eka n'wina, volavo ndzi va rhumaka ndzi pfuka wa ha ri mixo, kambe a mi va yingisanga; 6ndzi ta endla yindlu leyi kukotisa Xilo, ni muti lowu, ndzi wu endla eXilo lexo rhukaniwa hi matiko hinkwawo ya misava.’ ”
Va lava ku n'wi dlaya.
7Vaprista ni vaprofeta ni tiko hinkwaro va twa Yeremiya loko a vulavula marito walawo endlwini ya Yehovha. 8Kuteloko Yeremiya a hetile ku vulavula hinkwako loku Yehovha a n'wi leriseke ku byela tiko hinkwaro, vaprista ni vaprofeta, ni tiko hinkwaro, va n'wi khoma, va ku: “U ta fela makumu! 9Xana u profetela yini hi vito ra Yehovha, u ku: ‘Yindlu leyi yi ta kotisa Xilo, ni muti lowu wu ta onhiwa, wu pfumala muaki,’ xana?” Kutani tiko hinkwaro ri rhendzela Yeremiya endlwini ya Yehovha. 10Vakulukumba va Yuda loko va twa timhako toleto, va huma endlwini ya hosi, va tlhandlukela endlwini ya Yehovha, va tshama erivaleni ra nyangwa leyintshwa ya Yehovha. 11Vaprista ni vaprofeta va byela vakulukumba ni tiko hinkwaro, Va ku: “Munhu yeloyi u lulamela hi rifu, hikuva u profetile hikwalaho ka muti lowu hilaha mi swi tweke hakona hi tindleve ta n'wina.”
12Kutani Yeremiya a byela vakulukumba hinkwavo ni tiko, a ku: “I Yehovha la ndzi rhumeke ku profeta hikwalaho ka yindlu leyi ni ka muti lowu marito hinkwawo lawa mi ma tweke. 13Sweswi, hundzukani emikhuveni ya n'wina ni le ku endleni ka n'wina, mi yingisela rito ra Yehovha Xikwembu xa n'wina, kutani na yena Yehovha a ta hundzuka eku biheni loku a ku vuleke ehenhla ka n'wina. 14Loko ndzi ri mina, vonani, ndzi le mavokweni ya n'wina; endlani ha mina hilaha swi nga swinene ni ku lulama emahlweni ya n'wina. 15Ntsena, ma swi tiva leswaku loko mi ndzi dlaya, mi ta va mi veke ngati leyi nga riki na nandzu ehenhla ha n'wina, ni le henhla ka muti lowu, ni le henhla ka vaaki va kona; hikuva kunene Yehovha u ndzi rhumile eka n'wina, leswaku ndzi ta mi byela marito lawa hinkwawo etindleveni ta n'wina.”
16Kutani vakulukumba ni tiko hinkwaro va byela vaprista ni vaprofeta, va ku: “Munhu loyi a nga fanelanga ha rifu, hikuva u vulavule na hina hi vito ra Yehovha, Xikwembu xa hina.”
17Van'wanyana eka vakulukumba va tiko va yima, va byela nhlengeletano hinkwayo ya tiko, va ku: 18“Mikiya wa Morexeta u tshama a profeta enkarhini wa Hezekiya, hosi ya Yuda, a byela tiko hinkwaro ra Yuda, a ku: ‘Ku vula Yehovha wa mavandla: Siyoni u ta rimiwa kukota nsimu, Yerusalema, a va nhulu ya maribye, ntshava ya Tempele yi va mananga ya swihlahla.’ 19Xana Hezekiya, hosi ya Yuda, ni tiko ra Yuda hinkwaro, va tshama va n'wi dlaya-ke? Xana a nga chavanga Yehovha, a khongela hi matimba emahlweni ka Yehovha, kutani Yehovha a hundzukile eka swo biha leswi a swi vuleke hikwalaho ka vona xana? Loko hi ri hina, a hi ta endlela mimoya ya hina leswo biha ngopfu.”
20Naswona munhu a a ri kona la profeteke hi vito ra Yehovha, a nga Uriya, n'wana Xemaya, wa Kiriyata-Yeyarimi; a ri karhi a profeta hikwalaho ka muti lowu ni ka tiko leri kukota marito hinkwawo ya Yeremiya. 21Hosi Yoyakimi, ni tindhuna hinkwato ta yena, ni vakulukumba hinkwavo, loko va twa ku vulavula ka yena, hosi yi lava ku n'wi dlaya, kambe Uriya, loko a swi twile, a chava, a tsutsuma a ya eEgipta. 22Kutani, hosi Yoyakimi a rhumela vanhu Egipta, a rhuma Elinatani, n'wana Akibora, a ri ni van'wana, ku ya Egipta. 23Va ya teka Uriya eEgipta, va n'wi tisa eka hosi Yoyakimi, a n'wi tlhava hi fumu a va a cukumeta ntsumbu wa yena emasirheni ya lava nga vanhu ntsena. 24Kambe voko ra Ahikama, n'wana Xafani, ri yimela Yeremiya, leswaku a nga nyiketiwi emavokweni ya tiko a dlawa.
