Ta ku tshinyiwa ka Vayuda lava yeke eEgipta.
1Rito leri nga ta eka Yeremiya hikwalaho ka Vayuda hinkwavo lava akeke etikweni ra Egipta, lava akeke eMigidolo, na Tahapanese, na Nofu, ni le tikweni ra Patroso, ri ku: 2“Ku vula Yehovha wa mavandla, Xikwembu xa Israele: Mi vonile ku biha hinkwako loku ndzi ku humeseleke Yerusalema, ni miti hinkwayo ya Yuda; vonani, yi onhakile kutani, a ka ha ri na muaki eka yona. 3Hikwalaho ka ku biha hinkwako loku va ku endleke ku ndzi pfuka, va ya hisela swikwembu swin'wana mirhi ya risuna, va tirhela leswi va nga swi tiviki hambi mi ri n'wina, hambi va ri vatata wa n'wina. 4Ndzi tshama ndzi mi rhumela malandza ya mina hinkwawo, va nga vaprofeta, ndzi va rhuma wa ha ri mixo, leswaku mi nga endli swilo swa manyala leswi ndzi swi vengaka. 5Kambe a va swi twanga, a va rhiyanga tindleve ta vona leswaku va ta tshika vumbabva bya vona, va ta tshika ni ku hisela swikwembu swin'wana mirhi ra risuna. 6Kutani ku kariha ka mina, ni ku leva ka mina ku tlhandluka ku pfurhela miti ya Yuda, ni mitsendzele ya Yerusalema, swi hundzuke rhumbi ni mananga, hilaha swi vonakaka namuntlha hakona.
7“Kutani sweswi, ku vula Yehovha, Xikwembu xa mavandla, Xikwembu xa Israele, mi endlele mimoya ya n'wina swo biha swonghasi ha yini, leswaku ku va ku tsemiwa eka n'wina vavanuna, ni vavasati, ni vana, ni swihlangi exikarhi ka Yuda, leswaku ku nga sali masalela ya n'wina xana? 8Mi ndzi pfukela yini hi ku endla ka mavoko ya n'wina, hi ku hisela; swikwembu swimbe timhamba etikweni ra Egipta, laha mi teke ku aka kona leswaku mi susiwa, mi va ndzhukano, ni xisolo, exikarhi ka matiko hinkwawo ya misava? 9Xana mi rivarile ku endla ku biha ka vatata wa n'wina, ni ku endla ku biha ka tihosi ta Yuda, ni ku endla ku biha ka vasati va vona, ni ku endla ku biha ka n'wina, ni ku endla ku biha ka vasati va n'wina leswi va swi endleke etikweni ra Yuda, ni le mitsendzeleni ya Yerusalema, xana? 10Ku fikela siku leri, a ku si va na loyi a titsongahateke, hambi, va ri lava chavaka, ni lava fambaka hi milawu ya mina, ni ku lerisa ka mina loku ndzi ku vekeke emahlweni ka n'wina ni le mahlweni ka vatata wa n'wina. 11Hikwalaho, ku vula Yehovha wa mavandla, Xikwembu xa Israele: vonani, ndzi hundzulukile mombo wa mina eka n'wina ku onha, ni ku tsema Yuda hinkwawo! 12Ndzi ta khoma lava seleke va Yuda, lava phikelelaka ku ya etikweni ra Egipta, ku ya aka kona, va lova hinkwavo, va ta wa etikweni ra Egipta; va lovisiwa hi matlhari ni ndlala; ku sungula hi lontsongo ku fikela eka lonkulu, va ta fa hi matlhari ni ndlala; va endliwa ndzhukano, ni xisandzu, ni manyala, ni xisolo. 13Ndzi ta ba lava akeke etikweni ra Egipta, kukotisa loko ndzi bile Yerusalema, hi matlhari, ni ndlala ni ntungu. 14A ku nga poni na un'we wa lava seleke va Vayuda lava ngheneke etikweni ra Egipta ku ta aka kona, va ta vuyela etikweni ra Yuda, laha timbilu ta vona ti navelaka ku vuyela kona, va tiakela kona; hikuva a va nga ha tlheleri kona, loko va nga ri lava poneke.”
15Kutani vavanuna hinkwavo lava nga tiva leswaku vasati va vona va hisele swikwembu swimbe mirhi ya risuna, ni vavasati hinkwavo lava nga yima kona, yi ri nhlengeletano leyikulu, ni tiko hinkwaro leri akeke etikweni ra Egipta, ePatroso, va hlamula Yeremiya, va ku: 16“Loko ri ri rito leri u hi byeleke rona hi vito ra Yehovha, hi nga ka hi nga ku yingisi; 17kambe hi ta endla hinkwaswo leswi humeke emilon'wini ya hina, hi ta humesela nkosikazi ya matilo mirhi ya risuna, hi yi chelela swakunwa, hilaha hi endleke hakona, hina ni vatata wa hina, tihosi ta hina ni tihosana ta hina, emitini ya Yuda ni le mitsendzeleni ya Yerusalema; enkarhini wolowo a hi xurha hi vuswa; a hi tsaka, hi nga voni makhombo. 18Kambe mpfhuka hi tshika ku humesela nkosikazi ya matilo mirhi ya risuna, ni ku yi chelela swakunwa, hi pfumarile hinkwaswo, hi va hi herisiwa hi tlhari ni ndlala.” 19Kutani loko a hi tshama hi humesela nkosikazi ya matilo mirhi ya risuna, hi va hi yi chelela swakunwa, xana hi swi endla ehandle ka vanuna va hina, ni loko hi yi swekela swinkwanyana, hi va hi yi chelela swakunwa ku yi dzunisa xana?
20Kavaloko Yeremiya a vulavula ni tiko hinkwaro, a byela vavanuna ni vavasati ni hinkwavo lava n'wi hlamuleke sweswo, a ku: 21“Xana Yehovha a nga tsundzukanga, a va a anakanya mirhi ya risuna leyi mi yi hiseke emitini ya Yuda ni le mitsendzeleni ya Yerusalema, n'wina, ni vatata wa n'wina, ni tihosi ta n'wina, ni tindhuna ta n'wina, ni vanhu va tiko-ke? 22Yehovha a nga kotanga ku ya emahlweni ku swi rhwala hikwalaho ka vudyoho bya mitirho ya n'wina ni manyala lawa mi ma endleke; kutani tiko ra n'wina ri hundzukile mananga, tiko leri onhiweke, leri soriweke, leri nga akiwiki hilaha swi voniwaka namuntlha. 23Hikuva mi hisile mirhi ya risuna, mi va mi dyohela Yehovha, kutani a mi yingisanga rito ra Yehovha, a mi hlayisangi nawu wa yena, ni swileriso swa yena, ni switsundzuxo swa yena, hikwalaho makhombo lawa ma mi fikerile hilaha swi vonekaka namuntlha hakona.”
24Yeremiya a engeta a ku eka tiko hinkwaro ni ka vavasati hinkwavo: “Yingisani rito ra Yehovha, n'wina hinkwenu va Yuda lava nga etikweni ra Egipta: 25Ku vula Yehovha wa mavandla, Xikwembu xa Israele, a ku: N'wina ni vasati va n'wina mi vulavurile hi milomu ya n'wina, mi va mi endla hi mavoko ya n'wina, mi ku: ‘Hi rhandza ku hetisa leswi hi swi hlambanyeleke, hi ta hisela nkosikazi ya matilo mirhi ya risuna, ni ku yi chelela swakunwa.’ Kunene sweswi mi hetisile ku hlambanya ka n'wina ni marito ya n'wina! 26Hikwalaho yingisani rito ra Yehovha, n'wina Vayuda hinkwenu, lava mi akeke etikweni ra Egipta: Maswivo ndzi hlambanya hi vito ra mina lerikulu, ku vula Yehovha, leswaku vito ra mina ri nga ha khongeriwi etikweni hinkwaro ra Egipta hi munhu ni un'we wa Yuda la nga ku: ‘Hosi Yehovha wa hanya!’ 27Waswivo, ndzi va langutela ku va endla leswo biha, ku nga ri swo saseka; kutani vanhu hinkwavo va Yuda lava nga etikweni ra Egipta va ta herisiwa hi tlhari ni ndlala, va ko va hela. 28Kambe van'wana, va nga ri vangani, lava poneke tlhari, va ta suka etikweni ra Egipta; va tlhelela etikweni ra Yuda, kutani hinkwavo lava seleke va Yuda, lava teke etikweni ra Egipta ku aka kona, va ta tiva xana i rito ra mina kumbe ra vona ri nga ta tiya. 29Kutani xikombiso xa n'wina hi lexi, ku vula Yehovha, leswaku ndzi ta mi laya exivandleni lexi, mi ta tiva leswaku marito ya mina ma ta hetisiwa hi khombo ehenhla ka n'wina. 30Ku vula Yehovha: Maswivo, ndzi ta nyiketa Faro Hofira, hosi ya Egipta, emavokweni ya valala va yena, emavokweni ya lava lavaka vutomi bya yena, hilaha ndzi nyiketeke Sedekiyasi, hosi ya Yuda, emavokweni ya Nebukadnetsara, hosi ya Babilona, nala wa yena, loyi ngi a lava vutomi bya yena.”
