Ta nsinya lowunene wa vhinya.
1“Hi mina nsinya lowunene wa vhinya; murimi i Tatana. 2Rhavi rin'wana ni rin'wana leri nga eka mina, leri nga vekiki, wa ri tsema; kutani rin'wana ni rin'wana leri vekaka, wa ri tsema, leswaku ri engeta ku veka. 3N'wina mi basisiwile hi rito leri ndzi mi byeleke rona. 4Tshamani eka mina, na mina eka n'wina. Kukotisa leswi rhavi ri nga velekiki ri ri roxe loko ri nga namarheli ensinyeni, swi tano na n'wina loko mi nga ndzi namarheli. 5Hi mina nsinya wa vhinya; n'wina mi marhavi. La tshamaka eka mina, na mina loko ndzi tshama eka yena, u veka ngopfu; hikuva ehandle ka mina a mi swi koti ku tirha nchumu. 6Kungakuloko munhu a nga tshami eka mina, u ta cukumetiwa ehandle kukotisa rhavi; kutani marhavi lama omeke, ma rholeriwa ma cukumetiwa endzilweni, ma tshwa. 7Loko mi tshama eka mina, ni marito ya mina loko ma tshama eka n'wina, kombelani hinkwaswo leswi mi swi rhandzaka, mi ta endleriwa swona. 8Laha Tatana a dzunisiwaka hakona, hi loko mi veka mihandzu ya ku tala, hilaha mi nga ta va vadyondzisiwa va mina.
Ta ku tshama erirhandzwini ra Yesu, ni ku rhandzana.
9“Kukotisa leswi Tatana a ndzi rhandzeke, na mina ndzi mi rhandzile; tshamani erirhandzwini ra mina. 10Loko mi hlayisa milawu ya mina, mi ta tshama erirhandzwini ra mina, hilaha na mina ndzi nga hlayisa milawu ya Tatana, kutani ndzi tshame erirhandzwini ra yena. 11Ndzi mi byerile timhaka leti leswaku ku tsaka ka mina ku tshama eka n'wina, ni leswaku ku tsaka ka n'wina ku hetiseka.
12“Nawu wa mina hileswaku mi rhandzana kukotisa leswi ndzi mi rhandzeke. 13A ku na munhu la nga ni rirhandzu leri tlulaka ra loyi a tshikelaka vanakulobye vutomi bya yena. 14Mi ta va vanakulorhi loko mi endla hinkwaswo leswi ndzi mi byelaka swona. 15A ndza ha mi vuli malandza, hikuva nandza a nga tivi leswi hosi ya yena yi swi endlaka; ndzi mi vurile vanakulorhi, hikuva ndzi mi tivisile hinkwaswo leswi ndzi swi tweke eka Tatana.
16“A hi n'wina mi ndzi hlawuleke; hi mina ndzi mi hlawuleke, kutani ndzi mi vekile leswaku mi ya mi veleka mihandzu, ni leswaku mihandzu ya n'wina yi tshama, swi ri leswaku hinkwaswo leswi mi nga ta swi kombela eka Tatana hi vito ra mina, a mi nyika swona. 17Leswi ndzi mi lerisaka swona hileswaku mi rhandzana.
Ta rivengo ra misava.
18“Kungakuloko misava yi mi venga, tivani leswaku yi rhangile yi ndzi venga. 19Loko ngi mi ri va misava, ingi misava yi rhandzile swa yona; kambe leswi mi nga riki va misava kambe leswi ndzi mi hlawuleke emisaveni, hikwalaho, misava ya mi venga. 20Tsundzukani rito leri ndzi nga mi byela, loko ndzi te: ‘Nandza a hi nkulukumba eka hosi ya yena. Loko va ndzi xanisile va ta mi xanisa, na n'wina.’ Loko va hlayisile rito ra mina, va ta hlayisa ni ra n'wina. 21Kambe va ta mi endla hinkwaswo leswi, hikwalaho ka vito ra mina, hikuva a va tivi la ndzi rhumeke. 22Loko ngi ndzi nga tanga ndzi vulavula na vona, a va nga ta va na nandzu, kambe sweswi, a va na lexi va nga ta landzula ha xona nandzu wa vona. 23La ndzi vengaka, u venga na Tatana. 24Loko ngi ndzi nga tirhanga exikarhi ka vona mitirho leyi nga tirhiwangiki hi munhu un'wana, ingi va nga ri na nandzu; sweswi, va yi vonile, kutani va ndzi vengile, mina na Tatsana. 25Kambe swi ri leswaku rito leri nga tsariwa enawini wa vona ri endleka, leri nge: ‘Va ndzi vengile ntsena.’
26“Kutakuloko ku fika Muchaveleri, loyi ndzi nga ta n'wi rhuma eka n'wina, a huma eka Tatana, wu nga Moya wa ntiyiso, lowu humaka eka Tatana, hi yena la nga ta vula vumbhoni bya mina; 27na n'wina mi ta va timbhoni, hikuva a mi ri na mina ka ha ri eku sunguleni.
