YOHANE 20

₁Hi siku ro sungula ra vhiki, Mariya wa Magadala a vindzuka a ya esirheni, bya ha ri vusiku, kutani a vona leswaku ribye a ri susiwile esirheni. ₂Kavaloko a tsutsuma, a ta eka Simoni Petro, ni ka mudyondzisiwa la nga rhandziwa hi Yesu, a ku eka vona: “Va susile Hosi esirheni, kambe a hi tivi laha va n'wi vekeke kona.”

₃Kutani Petro a suka ni mudyondzisiwa lowun'wana, va ya esirheni. ₄Va tsutsuma swin'we havambirhi; kambe mudyondzisiwa lowun'wana a siya Petro, a rhanga a ya fika esirheni. ₅Kuteloko a korhamile ku hlometela, a vona mikumba yi vekiwile ehansi; kambe a nga nghenanga. ₆Kutani Simoni Petro la nga n'wi landza, a fika, a nghena esirheni, kutani a vona mikumba vi vekiwile ehansi; ₇kambe nguvu leyi tsondzeleke nhloko ya yena a yi nga vekiwanga ni tin'wana, kambe a yi petsiwile, yi vekiwile hitlhelo yi ri yoxe. ₈Mudyondzisiwa lowun'wana, la nga rhanga a fika esirheni, na yena a nghena a swi vona, a va a pfumela. ₉Hikuva a va nga si twisisa Tsalwa leri vulaka leswaku Kriste u fanele ku pfuka eku feni. ₁₀Kavaloko vadyondzisiwa va tlhelela ekaya.

₁₁Loko a ri Mariya, a a yimile ehandle, ekusuhi ni sirha, a ri karhi a rila. A ku a ha rila, a korhama ehansi ku hlometela esirheni; ₁₂a vona tintsumi timbirhi leti ambaleke swo basa, ti tshamile, yin'wana yi ri enhlokweni, yin'wana yi ri emilengeni, laha ntsumbu wa Yesu ingi wu latiwile kona. ₁₃Ti ku eka yena: “Wansati, u rilela yini?” Yena a ku eka tona: “Hikuva va susile Hosi yanga, kambe a ndzi tivi laha va n'wi vekeke kona.” ₁₄Kuteloko a vurile sweswo, a hundzuluka, a vona Yesu a yimile; kambe a nga n'wi tivanga leswaku i Yesu. ₁₅Yesu a ku eka yena: “Wansati, u rilela yini? U lava mani xana?” Yena, hi ku ehleketa leswaku i murimi wa ntanga, a ku eka yena: “Hosi, loko u n'wi susile, ndzi byele laha u n'wi vekeke kona, ndzi ta ya ndzi ya n'wi teka.” ₁₆Yesu a ku eka yena: “Mariya!” Yena a rhendzeleka, a ku eka yena: “Rabuni!” hileswaku “Mufundhisi,” hi Xiheveru. ₁₇Yesu a ku eka yena: “U nga ndzi khumbi, hikuva a ndzi si tlhandlukela eka Tatana; kambe yana eka vamakwerhu u ya va byela u ku, ndzi tlhandlukela eka Tatana a nga Tata wa n'wina, ni ka Xikwembu xa mina xi nga Xikwembu xa n'wina”. ₁₈Mariya wa Magadala a ya byela vadyondzisiwa leswaku u vone Hosi, ni leswaku u n'wi byerile timhaka teto.

₁₉Nimadyambu ya siku rero leri sungulaka vhiki, tinyangwa ti pfariwile laha vadyondzisiwa va hlengeletaneke kona hikwalaho ka ku chava Vayuda, Yesu a ta, a yima exikarhi ka vona, a ku eka vona: “Ku rhula a ku ve na n'wina!” ₂₀Kuteloko a vulavurile sweswo, a va komba swandla ni tsheve ra yena. Kutani vadyondzisiwa va tsaka ngopfu loko va vona Hosi. ₂₁Yesu a engeta a ku eka vona: “Ku rhula a ku ve na n'wina! Kukotisa leswi Tatana a ndzi rhumeke, na mina ndzi mi rhumisa sweswo.” ₂₂Kuteloko a vurise sweswo, a huhutela eka vona, a ku: “Amukelani Moya lowo Kwetsima. ₂₃Lava mi nga ta va khomela swidyoho, va ta khomeriwa swona; lava mi nga ta va hlayela swona, va ta hlayeriwa swona.”

₂₄Kambe Tomasi, loyi va nge i Didima, un'wana wa lava khume na vambirhi, a a nga ri na vona loko Yesu a ta. ₂₅Kutani vadyondzisiwa van'wana va ku eka yena: “Hi vonile Hosi.” Kambe a ku eka vona: “Kungakuloko ndzi nga voni timbanga ta timhingu emavokweni ya yena, ni loko ndzi nga nghenisi ritiho ranga etimbangeni ta timhingu, ndzi nghenisa ni voko etsheveni ra yena, ndzi nga ka ndzi nga pfumeri.”

₂₆Kuteloko ku hundzile masiku ya ntlhanu na manharhu, vadyondzisiwa a va ri kona endlwini, na yena Tomasi a a ri na vona. Yesu a ta, tinyangwa ti pfariwile, a yima exikarhi ka vona a ku: “Ku rhula a ku ve na n'wina!” ₂₇Kutani a ku eka Tomasi: “Tisa ritiho ra wena la, languta ni swandla swa mina; tshambuluta ni voko ra wena u ri nghenisa etsheveni ra mina, kutani u nga kanakani, kambe u pfumela.” ₂₈Tomasi a hlamula, a ku eka yena: “Hosi yanga ni Xikwembu xanga!” ₂₉Yesu a ku eka yena: “Leswi u ndzi voneke, Tomasi, u pfumerile; va katekile lava pfumelaka, hambi va nga vonanga.”

₃₀Mahlori man'wana layo tala ma kona lama endliweke hi Yesu emahlweni ka vadyondzisiwa va yena, lama nga tsariwangiki ebukwini leyi. ₃₁Kambe timhaka leti, ti tsariwile leswaku mi pfumela leswaku Yesu i Kriste, N'wana wa Xikwembu, ni leswaku, hi ku pfumela, mi va ni vutomi evitweni ra yena.