Ta Yesu loko a hanyisa munhu la nga tswariwa a file mahlo.
1Yesu, kakuloko a hundza, a vona munhu loyi ka hari mpfhuka a tswariwa, a a file mahlo. 2Kutani vadyondzisiwa va yena va n'wi vutisa, va ku: “Rabi, i mani la dyoheke? Xana hi yena kumbe i vatswari va yena, leswi a nga tswariwa a file mahlo?” 3Yesu a hlamula, a ku: “A ku dyohanga yena, hambi va ri vatswari va yena, kambe hileswaku mitirho ya Xikwembu yi kombisiwa ha yena. 4Ndzi fanele ku tirha mitirho ya la ndzi rhumeke, dyambu ri nga si pela; vusiku bya ta lebyi munhu a nga tiki tirha ha byona. 5Loko ndza ha ri la emisaveni, ndzi ku vonakala ka misava.”
6Kuteloko a vulavurile sweswo, a tshwutela marhi ehansi, a pfuva ndzhope hi marhi, kutani a tota mahlo ya lowo fa mahlo hi ndzhope wolowo, 7a ku eka yena: “Famba u ya hlamba evuhlambelweni bya Silowama” (hileswaku xirhumiwa).
8Lava akeke na yena ni lava nga n'wi vona a ha file mahlo, va ku: “Xana a hi yena loyi a a tshamaka a kombela-ke?” 9Van'wana va ku: “Hi yena.” Van'wana va ku: “U fana na yena.” Kambe yena a ku: “Hi mina.” 10Kutani va ku eka yena: “Mahlo ya wena ma hanyanyisiwe ku yini?” 11A hlamula, a ku: “Munhu loyi va nge i Yesu u pfuve ndzhope a ndzi tota mahlo ha wona, kutani a ku eka mina: ‘Famba evuhlambelweni bya Silowama, u hlamba’; kutani ndzi yile ndzi ya hlamba, kutani ndzi vona.” 12Va ku eka yena: “Yeloyi u kwihi?” A ku: “A ndzi n'wi tivi.”
13Va n'wi yisa eka Vafarisi loyi ingi a file mahlo. 14Kambe a ri ri siku ra Savata leri Yesu a nga endla ndzhope ha rona, a n'wi hanyisa mahlo. 15Vafarisi, na vona, va n'wi vutisa mukhuva lowu a nga hanyanyisiwa ha wona. A ku eka vona: “U ndzi vekele ndzhope emahlweni, kutani ndzi ya hlamba, kutani ndzi tlhela ndzi vona.” 16Hikwalaho Vafarisi van'wana va ku: “Munhu loyi a hi wa Xikwembu, hikuva a nga hlayisi Savata.” Van'wana va ku: “Mudyohi a nga endlisa ku yini masingita layo tano xana?” Kutani ku hambana ku va kona exikarhi ka vona. 17Va tlhela va ku eka loyi ingi a file mahlo: “Wena u ri yini ha yena, leswi a nga ku hanyisa mahlo?” A ku: “I muprofeta.”
18Kambe Vayuda a va pfumelanga leswaku a a file mahlo kutani a tlhela a vona, va kondza va vitana vatswari va yena, 19va va vutisa, va ku: “Xana loyi, i n'wana wa n'wina, loyi mi nge u tswariwile a file mahlo-ke? U vonisa ku yini sweswi?” 20Vatswari va yena va va hlamula, va ku: “Ha n'wi tiva leswaku i n'wana wa hina ni leswaku u tswariwile a file mahlo; 21kambe loko wu ri mukhuva lowu a vonaka ha wona sweswi, a hi wu tivi, ni la n'wi hanyiseke mahlo, a hi n'wi tivi. U ni malembe, n'wi vutiseni, u ta tivula.” 22Vatswari va yena va vurisa sweswo hi ku chava Vayuda; hikuva Vayuda a va kanerile leswaku loko munhu a n'wi vula Kriste, u ta hlongoriwa esinagogeni. 23Hikwalaho vatswari va yena va nga te: “U ni malembe, n'wi vutiseni.”
24Va engeta va vitana ra vumbirhi munhu loyi ingi a file mahlo, va ku eka yena: “Dzunisa Xikwembu, ha swi tiva leswaku munhu loyi i mudyohi.” 25Kambe yena a hlamula, a ku: “Loko a ri mudyohi, a ndzi swi tivi; ndzo tiva xilo xin'we ntsena, hileswaku a ndzi file mahlo, kutani ndza vona sweswi.” 26Va engeta va ku eka yena: “U ku endlisile ku yini-ke? U ku pfurile mahlo hi mukhuva wihi-ke?” 27A va hlamula, a ku: “Ndzi tshama ndzi mi byela; xana a mi swi twanga? Xana mhaka leyi, mi rhandza ku yi twa kambe ha yini-ke? Xana na n'wina mi rhandza ku va vadyondzisiwa va yena-ke?” 28Kutani va n'wi rhukana va ku: “Hi wena u nga mudyondzisiwa wa yena; hina hi vadyondzisiwa va Muxe. 29Ha swi tiva leswaku Xikwembu xi vulavurile na Muxe; kambe yeloyi a hi n'wi tivi laha a humaka kona.” 30Munhu loyi a va hlamula, a ku: “I mhaka leyi hlamarisaka kunene loko mi nga n'wi tivi laha a humaka kona, kasi u ndzi hanyanyisile mahlo! 31Ha swi tiva leswaku Xikwembu a xi yingisi vadyohi; kambe kungakuloko munhu a chava Xikwembu, a endla hi ku rhandza ka xona, xa n'wi yingisa. 32A hi si swi twa ni siku ni rin'we leswaku munhu u hanyisile mahlo ya un'wana la nga tswariwa a file mahlo. 33Loko loyi, a a nga ri wa Xikwembu, a a nga ti endla nchumu.” 34Va n'wi hlamula, va ku: “Wena, u tswariwile eswivini wena hinkwako, kasi u hi dyondzisa-ke?” Kutani va n'wi hlongolela ehandle.
35Yesu a swi twa leswaku va n'wi hlongolele ehandle; kuteloko a n'wi kumile, a ku eka yena: “Xana wa pfumela eka N'wana wa Xikwembu xana?” 36A hlamula, a ku: “I mani, Hosi, ndzi ta pfumela eka yena?” 37Yesu a ku eka yena: “U n'wi vonile, hi yena la vulavulaka na wena.” 38Yena a ku: “Ndza pfumela, Hosi.” Kutani a n'wi khinsamela.
39Yesu a ku: “Ndzi tile emisaveni leyi, ku avanyisa, leswaku lava nga voniki va vona; ni leswaku lava vonaka, va hundzuka lavo fa mahlo.” 40Vafarisi van'wana lava ngi va ri na yena kwalaho, kakuloko va twa mhaka leyi, va ku eka yena: “Na hina hi file mahlo xana?” 41Yesu a ku eka vona: “Loko ingi mi file mahlo, a mi nga ti va na nandzu; kambe sweswi mi nge: ‘Ha vona,’ hikwalaho xidyoho xa n'wina xi tshama eka n'wina.
