YOBO 13

₁“Mahlo ya mina ma vonile timhaka leto hinkwato,

Tindleve ta mina ti ti twile, ti ti hlayisile.

₂Leswi mi swi tivaka, ndza swi tiva na mina,

A ndzi xihlangi eka n'wina.

₃Kambe ndzi nga rhandza ku vulavula na Lowa matimba hinkwawo,

Ndzi nga navela ku nghena eku tengeni ni Xikwembu.

₄Hikuva n'wina mi luka mavunwa,

Mi tinanga leti nga pfuniki nchumu.

₅Loko mi nga miyela hinkwenu,

A ndzi ta ku, mi tlharihile.

₆Yingiselani ku hlamula ka mina,

Mi twa hi nomu wa mina timhaka leti ndzi yimeke ha tona.

₇Xana mi rhandza ku yimela Xikwembu hi mavunwa-ke?

Xana mi nga xi tiyisa hi ku vula swa ku dyelela?

₈Xana mi ta languta nghohe ya xona?

Kumbe mi rhandza ku tiveka vayimeri va Xikwembu xana?

₉Xana mi rhandza loko xi mi vutisisa hinkwaswo-ke?

Kumbe mi nga xi kanganyisa kukotisa loko va kanganyisa munhu xana?

₁₀Hakunene xi ta mi kaneta,

Loko mi tirha exihundleni xa n'wina, mi languta hi nghohe ya vanhu.

₁₁Xana vukulu bya xona

byi nga ka byi nga mi tateli ku chava?

Ni nchavo wa xona wu nga ka wu nga mi khomi xana?

₁₂Marito walawo ya n'wina, i timhaka ta ntshuri,

Makhokholo ya n'wina ma fana ni makhokholo ya vumba.

₁₃“Miyelani, mi ndzi tshika ndzi vulavula!

Ndzi ta humeleriwa hi lexi ndzi nga humelelaka ha xona.

₁₄Swi pfuna yini hambi ndzi nga khoma nyama ya mina hi meno ya mina,

Ndzi fumbarhela moya wa mina hi voko ra mina.

₁₅Vonani, a nga ndzi dlaya, a ndza ha ri na ntshembo;

Ntsena ndzi rhandza ku tengisa mikhuva ya mina emahlweni ka xona.

₁₆Hi kona ku nga ta va ku hlayiseka ka mina,

Hikuva musandzi a nga ka a nga yimi emahlweni ka xona.

₁₇Xiyani, mi yingisela marito ya mina,

Timhaka ta mina ti va ti nghena etindleveni ta n'wina.

₁₈Vonani, ndzi tlhandlakanyile timhaka ta mina;

Ndzi tiva leswaku ndzi ta vekiwa la lulameke.

₁₉U kwihi la rhandzaka ku tengisana na mina?

Hikuva ndzi nga miyela, ndzi fa sweswi.

₂₀Ntsena u ndzi humesele hi swilo swimbirhi,

Hilaha ndzi nga tiki fihla mombo wa mina emahlweni ka wena.

₂₁U khwanyeta voko ra wena ekule na mina,

U va u ndzi tshunxa hi nchavo wa wena.

₂₂Kutani u vitana, ndzi ta pfumela,

Kumbe ku vulavula mina, wena u ndzi hlamula!

₂₃Swidyoho swa mina ni swivi swa mina swingani xana?

U ndzi byela ku dyoha ka mina ni nandzu wa mina.

₂₄U ndzi fihlela yini mombo wa wena,

U ndzi ringanisela yini nala wa wena?

₂₅Xana u rhandza ku chavisa tluka leri hehukeke?

Kumbe ku hlongola mungu lowu omeke xana?

₂₆Leswi u ndzi baka hi leswi bavaka,

U ndzi ba hikwalaho ka swidyoho swa vuntshwa bya mina xana?

₂₇Swi lo yini loko u ndzi bohela milenge hi misinya,

Hambi ku ri ku siva tindlela ta mina hinkwato,

Ni ku rhendzerisa mikondzo ya mina;

₂₈Kasi ndzi hela kukota rikunyi leri dyiweke hi swivungu,

Ni nguvu leyi dyiweke hi mahele.