YOBO 22

₂“Xana munhu a nga pfuna Xikwembu hi xilo xin'wana xana?

E-e, ni ku ringa; munhu wa vutlhari u tipfuna yena n'wini ntsena?

₃Lowa matimba hinkwawo

a nga vona vunene bya wena hi ku tsaka-ke?

Kumbe xana a nga kuma bindzu hi mikhuva ya wena ya ku lulama-ke?

₄Xana a ku laya hikuva wa ku chava,

Kumbe a yisana na wena ehubyeni xana?

₅A ndzi ku: Ku biha ka wena ka chavisa,

Ni ku dyoha ka wena a ku pfumali ntsengo xana?

₆Hikuva u tekile ntsena xikhensanandzu eka varikwenu,

U hluvule vapfumari, u teke tinguvu ta vona;

₇A ku nyikanga munhu wa torha mati,

U alele la nga ni ndlala vuswa bya wena.

₈Munhu wa matimba a a fuma tiko,

Ni nkulukumba a tiendla muaki wa rona.

₉A u tlherisa vasati va tinoni, va pfumala,

Mavoko ya xisiwana ma tshoviwa.

₁₀Hikwalaho u rhendzeriwile hi mitlhamu,

U khomiwa hi nchavo kan'wekan'we.

₁₁Kumbe a ku voni munyama,

Ni ndhambi ya mati layo tala lama ku funengeteke?

₁₂“Xana Xikwembu a xi tlakukangi kukota tilo xana?

Languta ku tlakuka ka tinyeleti ti tlakukile swonghasi!

₁₃U ri: ‘Xikwembu xi nga tiva yini?

Xana xi nga avanyisa xi boxa munyama xana?

₁₄Mapapa ma xi sivekile leswaku xi tsandzeka ku vona,

Xi fambafamba emaninginingini ya le tilweni.’

₁₅Xana u rhandza ku teka ndlela ya khale,

Laha ku kandziyeke vanhu va hava xana?

₁₆Kasi va susiwile wu nga si va nkarhi,

Vuako bya vona byi fana ni nambu lowu khulukaka.

₁₇A va ku eka Xikwembu: ‘Tshinela kule!

Xana Lowa matimba hinkwawo a nga hi endlela yini xana?’

₁₈Hambiswiritano, u tatile tindlu ta vona hi xuma,

Makungu ya timbabva a ma ve ekule na mina!

₁₉Lavo lulama va vona sweswo, va tsaka,

La pfumalaka nandzu u hleka vona,

a ku:

₂₀‘Valala va hina va herisiwile,

Ndzilo wu hisile rifuwo ra vona!’

₂₁“Hikwalaho u endla ntwanano na Xikwembu,

u ta vona ku tsaka;

Hi mukhuva wulowo rihleko ri ta ta eka wena;

₂₂Wa nga amukela dyondzo leyi humaka enon'wini wa xona,

U nghenisa marito ya xona embilwini ya wena.

₂₃Loko u tlhelela eka Lowa matimba u ta tlhela u pfuxiwa,

Ntsena u hlongola ku homboloka entsongeni wa wena;

₂₄U cukumeta nsuku entshurini,

Ni nsuku wa Ofiri emaribyeni ya milambyana;

₂₅Hi kona Lowa matimba hinkwawo a nga ta va nsuku wa wena,

Ni silivhere ya wena ya nkoka.

₂₆Hikuva hi kona u nga ta kuma ku tsaka eka Lowa matimba hinkwawo.

U ta yimisa mombo wa wena eka Xikwembu.

₂₇U ta xi khongela, xi ta ku yingisa,

U ta heta ku hlambanya ka wena.

₂₈Loko u kanela mhaka yin'wana yi ta humelela eka wena,

Ku vonakala ku ta vangama etindleleni ta wena.

₂₉Hambi u famba eku titsongahateni,

u ta tikombelela matimba ya ku tipfuxa,

Xikwembu xi ta pfuxa munhu la titsongahataka,

₃₀Swi tsandza ni la nga pfumariki nandzu,

U ta n'wi lamulela hi ku basa ka mavoko ya wena.”