YOBO 24

₁“Mikarhi leyi vekiweke a yi hlayisiwi hi Lowa matimba hinkwawo xana?

Lava n'wi chavaka a va tivi ha yini masiku ya yena xana?

₂Ku risiwa mitlhambi leyi yiviweke;

Ku tshinetiwa maribye ya mindzilekana,

₃Va byisa mbhongolo ya xisiwana,

Homu ya nsati wa noni yi vekiwa ku languteriwa.

₄Vapfumari va tshinetiwa endleleni,

Swisiwana hinkwaswo swa tiko swi fanela ku tumbela.

₅Vona, kukotisa timbhongolo ta nhova,

Va humele swakudya swa vona wa ha ri mpundzu;

Emananga ntsena va ta kumela vana va vona swakudya.

₆Va tsemela byanyi lebyi seleke emasin'wini,

Va nkun'hula dzumba evhinyeni ya lowo homboloka.

₇Va tshama nivusiku va nga ri na tinguvu,

Hi xirhami, va pfumala xifunengelo.

₈Va neriwa hi timpfula ta tintshava,

Va namarhela maribye hi ku pfumala vuako.

₉Ku tekiwa swisiwana emaveleni ya vamana wa swona,

Vapfumari va tekeriwa swa vona, swi vekiwa ku languteriwa.

₁₀Va famba va swerile va nga ri na tinguvu;

Va rhwexiwa tinyandza leto tala va ri ni ndlala.

₁₁Va kandletela mafurha eswivaveni swa lavo homboloka,

Va khuvuta exikhuvutweni xa vona, va ri ni torha.

₁₂Mikosi ya lava faka yi twakala emitini;

Mimoya ya lava tlhaviweke ya huwelela,

Hambiswiritano,

Xikwembu a xi chawuki manyala ya vanhu!

₁₃“Van'wanyana va venga ku vonakala,

A va tivi tindlela ta kona,

A va yi hi mitila ya kona.

₁₄Mudlayi u pfuka nimixo,

A dlaya xisiwana ni mupfumari,

Nivusiku wa huma ku ya yiva.

₁₅Mahlo ya muoswi ma langutela mpimavayeni,

U ri: ‘A ku na tihlo leri ndzi vonaka,’

Kambe u tifunengeta mombo hi xisirhelo.

₁₆Nivusiku va boxa tindlu.

Ninhlekanhi va tipfalela;

A va vuli nchumu hi ku vonakala.

₁₇Hikuva kuteloko byi xile, eka vona i ndzhuti wa rifu;

Va tiva ku chavisa ka ndzhuti wa rifu.

₁₈“Lavo biha va hatla ku khaluta kukota swilo leswi rhetemukaka ehenhla ka mati;

Ndzhaka ya vona yi rhukaniwile laha emisaveni,

A va ha languti tlhelo ra tivhinya!

₁₉Kukota loko mati ya gamboko ma lahleka, ma munyeka hi ku oma ka dyandza,

Vaendlaswivi va munyisiwa sweswo hi xivandla xa vafi!

₂₀Va rivala hi nyimba leyi va velekeke,

Va dyiwa hi swivungu, a va anakanyiwi!

Mbabva yi susiwa kukota murhi lowu omeke.

₂₁“A ri loyi a dyaka swa mhika leyi nga velekiki,

Loyi a nga endlangiki nsati wa noni swinene ni kan'we! ...

₂₂Xikwembu xi lehisa masiku ya vamatimba hi matimba ya xona,

Va pfuka, hambi va nga tshembi leswaku va ta hanya;

₂₃Va hiwa ku tsaka, va ta tiya,

Kutani mahlo ya xona ma languta tindlela ta vona.

₂₄Va kurisiwile; kambe hi mikarhi yi nga ri yingani, a va ha ri kona:

Va wa, va tekiwa kukota vanhu hinkwavo,

Va tshoveriwa kukota swidzumba.

₂₅Loko swi nga ri tano, i mani la nga ndzi landzulaka,

Ku vulavula ka mina ku ta endliwa swahava hi mani-ke?”