YOBO 39

₁“Xana u tiva nkarhi wa ku veleka ka timbavala,

Xana u tsundzukile tinhlangu loko ti tswala-ke?

₂Xana u hlayile tin'hweti ta ku tika ka tona,

Ni nkarhi wa ku veleka ka tona-ke?

₃Ti khinsama ku tswala swirhodyana swa tona,

Ti phumunha ku vaviseka ka tona.

₄Marhole ya tona ma tiyela, ma kulela enhoveni,

Ma suka, ma nga vuyeri eka tona.

₅“I mani la tshunxeke mbhongolo ya nhova,

La tshunxeke mapindza ya mangwa ya nhova-ke?

₆Ndzi yi nyikile mananga ku va vutshamo bya yona,

Ni rivala ra munyu, byi va vuako bya yona.

₇Yi hleka pongo ra miti,

Rito ra muchayeri a ri fiki etindleveni ta yona.

₈Yi rhendzeleka etintshaveni yi lava swakudya swa yona,

Yi tilavela hinkwaswo swa rihlaza.

₉“Xana nyarhi yi ta pfumela ku ku tirhela?

Kumbe xana yi ta etlela ekusuhi ni tshanga ra wena-ke?

₁₀Xana u nga bohelela nyarhi exikon'wini hi ngole?

Kumbe yi nga bela mabuwu, yi ku landzelela emikoveni xana?

₁₁Xana u nga yi tshemba leswi yi nga ni matimba lamakulu?

Kumbe u ta yi lerisa mitirho ya wena-ke?

₁₂Xana u ta yi tshemba leswaku yi tleketlela mavele ya wena ekaya?

Yi ma hlengeleta exivuyeni xa wena xana?

₁₃“Yimbhu yi tlakusa timpapa yi tsakile,

Kambe a hi timpapa na tinsiva ta gumba;

₁₄Hikuva yimbhu yi sukela mandza ya yona ehansi,

Ma alamiwa hi ntshuri wa misava;

₁₅Yi rivele leswaku ma nga kandziyiwa hi masondzo,

Ni ku onhiwa hi swivandzana swa nhova.

₁₆Yi karihela mavondlo ya yona kukota loko ma nga ri ya yona;

Yi lo tshikela ntsena, a yi tsawuki nchumu;

₁₇Hikuva Xikwembu xi yi tsonile vutlhari,

A xi yi nyikanga ku twisisa.

₁₈Hi nkarhi lowo yi pfukaka, yi kuputela timpapa ta yona,

Yi hleka hanci ni mukhandziyi wa yona.

₁₉“Xana hi wena la nyikeke hanci matimba ya yona?

Ni ku bombisa nhamu ya yona hi ntshiva lowu tshukatshukaka?

₂₀Xana u nga yi tlurisa kukota njiya?

Mampfarhampfarha ya tinhompfu ta yona ma chavisa.

₂₁Yi cela misava ehansi, yi titsakela hi matimba ya yona;

Yi huma ku ya hlangana ni matlhari;

₂₂Yi hleka vutoya a yi chavi nchumu,

A yi hambukeli matlhari.

₂₃Ehenhla ka yona yi ketlaketla miseve enkotlotweni,

Ku kwetsima malangavi ya mafumu ni ntlhuvana.

₂₄Yi pfurha ndzilo, yi kwendzula misava,

Yi nga ka yi nga siveriwi loko nanga yi yimba.

₂₅Loko yi twa mpfumawulo wa yona yi ku: ‘Aháà!’

Loko ya ha ri ekule yi nun'hwetela nyimpi,

Ni rito ra tindhuna, ni nkosi wa nyimpi.

₂₆“Xana koti ri haha hi ku endla ka ku twisisa ka wena?

Ri tlakusela tlhelo ra dzonga timpapa ta rona xana?

₂₇Xana i ku lerisa ka wena loko gama ri tlhandluka,

Ri ya aka xisaka xa rona emaninginingini xana?

₂₈Ri tshama emaribyeni, ri tiakela kona,

Etinhleni ta maribye, ni le tinhlohlorhini ta tintshava?

₂₉Loko ri ri kona ri rhalarhala swakudya swa rona,

Mahlo ya rona ma langutisa ekule.

₃₀Mavondlo ya rona ma tian'wela ngati;

Laha mitsumbu yi nga kona, na rona ri kona.”