Ta ku titsongahata ni ku tisola ka Yobo.
1Kutani Yobo a hlamula Yehovha, a ku:
2“Ndza swi tiva leswaku a ku tsandzi hi nchumu,
Hikuva a ku na makungu lawa u nga ma hetiki.
3‘I mani la timelaka makungu ya mina hi vuhunguki bya yena?’
Ndzi vulavurile ndzi nga ri na ku twisisa,
I mahlori lama ndzi hlulaka, lawa ndzi nga ma twisisiki?
4‘Oho! Ndzi yingisele sweswi ndzi ta vulavula;
Ndzi ta ku vutisa, u ta ndzi dyondzisa.’
5Tindleve ta mina ti yingisile timhaka ta wena;
Kambe sweswi, mahlo ya mina ma ku vonile.
6Ndza tisola, ndzi tiba xifuva,
Ndzi ri entshurini ni le nkumeni.”
7Kuteloko Yehovha a kanerile na Yobo, Yehovha a ku eka Elifasi wa Temani: “Vukari bya mina byi pfurhele wena ni vanakuloni lavambirhi, hikuva a mi vulanga swa mina swinene kukotisa Yobo, nandza wa mina. 8Hikwalaho, humesani tinkunzi ta ntlhanu na timbirhi, ni makhuna ya ntlhanu na mambirhi, mi ya eka nandza wa mina Yobo, mi ya titlhavela magandzelo, kutani Yobo, nandza wa mina, u ta mi khongelela; hikwalaho ka yena swakwe, ndzi nga ka ndzi nga mi bi hi ku hunguka ka n'wina, hikuva a mi vulavulanga swa mina hi ku lulama, kukotisa nandza wa mina, Yobo.”
9Kutani Elifasi wa Temani, na Bilidada, wa Xuwaka, na Sofara wa Naama, va ya endla hi laha Yehovha a va byeleke hakona, kutani Yehovha a yingisa xikhongelo xa Yobo.
10Kutani Yehovha a humesa Yobo eku bohiweni ka yena, loko a khongelerile vanakulobye, Yehovha a n'wi andzisela kambirhi hinkwaswo leswi ngi a ri na swona.
11Kutani vamakwavo hinkwavo va xinuna ni va xisati, ni hinkwavo lava a nga tivana na vona, va ta eka yena, va dya na yena endlwini ya yena, va hlangula mihloti ya yena va n'wi chavelela eku vavisekeni ka yena hinkwako loku Yehovha a ku tiseleke ehenhla ka yena; un'wana ni un'wana a n'wi nyika xiphemu xa silivhere ni sindza ra nsuku.
12Kutani Yehovha a katekisa mahetelelo ya Yobo ku tlurisa ku sungula ka yena; a fuwa tinyimpfu ta 14 000, ni tikamela ta 6 000, ni tihavi ta majoko ya 1 000, ni timbhongolo ta mantswele ta 1 000. 13A kuma ni vana va vavanuna va ntlhanu na vambirhi, ni vanhwanyana vanharhu; 14lowo rhanga, a n'wi tshula vito ra Yemima, wa vumbirhi, Kesiya, wa vunharhu, Kereni-Hapuku. 15Etikweni hinkwaro, a ku nga ri na wansati la nga kotaka vana va Yobo hi ku saseka. Tata wa vona a va pambulela ndzhaka exikarhi ka vamakwavo.
16Endzhaku ka swona, Yobo a hanya malembe ya 140, a vona vana vi yena ni vana va vona, ku fika erixakeni ra vumune. 17Kutani Yobo a fa a dyuhele, a talele hi masiku.
