YOBO 9

₂“Ndzi tiva swinene leswaku swi tano!

Munhu la faka a nga lulama hi ku yini emahlweni ka Xikwembu xana?

₃Ni loko a rhandza ku tenga na xona,

A nga ka a nga hlamuli mhaka na yin'we, ni ka leta madzanadzana.

₄Vutlhari ni matimba hinkwawo swi na xona:

I mani la nga kanetanaka na xona, a vuya a hanya?

₅U tshineta tintshava, ti nga swi tivi Leswaku u ti phyandlasa hi vukari bya xona.

₆U tsekatsekisa misava emasungulweni ya yona,

Timhandze ta yona ta dzedzemela.

₇U lerisa dyambu leswaku ri nga humi,

U sirhela tinyeleti hi fungu.

₈Hi yena ntsena la anekaka matilo,

A famba emitsungeni ya lwandle.

₉U endlile Gongomela na Mahlahle na Xirimela,

Ni leswi enteke swa le dzongeni.

₁₀U endlile swilo leswikulu leswi nga tiviwiki,

Swilo leswi hlamarisaka leswi nga hlayiwiki.

₁₁Vona, u hundza eka mina, a ndzi n'wi voni,

Wa hundza emahlweni ka mina, a ndzi n'wi tsundzuki.

₁₂Vona, wa susa; a nga siveriwa hi mani?

I mani la nga ta ku eka yena: ‘U endla yini?’

₁₃“Xikwembu a xi tlherisi vukari bya xona,

Lava tikurisaka va tikerisiwa ehansi ka xona.

₁₄Mina ndzi mani leswaku ndzi xi hlamula xana?

Ndzi nga hlawurisa ku yini timhaka ta ku xi hlamula?

₁₅Hambi ndzi lulamile, ndzi nga ka ndzi nga hlamuli nchumu;

Ndzi ta tikombelela tintswalo eka muavanyisi wa mina.

₁₆Hambi a hlamula, loko ndzi n'wi vita,

Ndzi nga tsandzeka ku pfumela leswaku u yingisile rito ra mina,

₁₇Xona lexi ndzi khandlaka hi xidzedze,

Xi engetela timbanga ta mina ntsena,

₁₈A xi ndzi nyiki nkarhi wa ku hefemula,

Hikuva xi ndzi xurhisa hi leswo bava.

₁₉Loko ndzi tivitela matimba!

U ri, hi mina wa matimba,

Kumbe ku lulama!

U ri, i mani la nga ta ndzi vitana ehubyeni?

₂₀Hambi ndzi lulamile, nomu wa mina wu fanele ku ndzi vula lowo biha;

Loko ndzi nga ri na nandzu, u ta ndzi vula ndzi ri mbabva.

₂₁Hambi ndzi lulamile, a ndzi tivi mbilu ya mina,

Ndzi phiriwa hi vutomi bya mina.

₂₂Ku ni mhaka yin'we ntsena leyi ndzi yi tiyisaka,

Ndzi ri: Xi onha la nga tiki na nandzu ni lowa nandzu.

₂₃Loko ngi fumu ri nga dlaya kan'we! ...

Kambe xi hleka hi miringo ya loyi a nga riki na nandzu.

₂₄Misava yi nyikiwile emavokweni ya lavo biha;

Xi sirhela mahlo ya vaavanyisi va yona;

Loko xi nga ri xona la endleke sweswo, a nga va mani xana?

₂₅“Masiku ya mina ma hatlisa ma hundza, ma tlula vatsutsumi;

Ma balekile, ma nga si vona ku kateka.

₂₆Ma hundza kukota mabyatso ya rihlanga,

Kukota gama leri vutlaka xiharhi xa rona.

₂₇Loko ndzi ku: ‘Ndzi ta rivala ku dzumadzuma ka mina,

Ndzi tshika ku khwanyanisa mombo,’

₂₈Ndzi chavisiwa hi ku vaviseka ka mina hinkwako,

Ndzi karhi ndzi tiva leswaku u nga ka u nga ndzi vuli la pfumalaka nandzu.

₂₉Loko ndzi ri ni nandzu,

Ndza ha tikarhatela yini mahala?

₃₀Hambi ndzi tihlantswa ematini ya gamboko,

Kumbe ndzi hlamba mavoko hi xisibi;

₃₁Hambiswiritano, u ta ndzi puluvundzisa endzhopeni,

Ndzi va ndzi phiriwa hi tinguvu ta mina.

₃₂Hikuva a hi munhu wo kota mina, ndzi nga hlamulana na xona,

Hi yisana ehubyeni na xona;

₃₃A ku na mulamuleri exikarhi ka hina,

La nga hi lamulelaka hi voko ra yena.

₃₄A xi suse nhonga ya xona eka mina,

Ni mavoko ya xona a ma tshike ku ndzi hungukisa;

₃₅Hilaha ndzi nga ta vulavula ndzi nga xi chavi,

Kambe a swi tano na mina.