Ta ku avanyisa loku taka.
1Yimbani timhalamhala eSiyoni, mi yimba tinanga entshaveni ya mina leyo kwetsima! Vaaki hinkwavo va tiko a va rhurhumele, hikuva siku ra Yehovha ra ta, ri fikile, 2siku ra munyama ni mihihi, siku ra mapapa ni tihunguva! Ra ta kukotisa loko vurhonga byi tshinelela byi ya emahlweni etintshaveni. Maswivo ku ta tiko lerikulu lera matimba, leri ku nga si vaka na rin'wana ni khale, na kona ku nga ka ku nga vi na rin'wana lero tano ku ya fika emakun'wini ya tinxaka. 3Emahlweni ka rona ku ni ndzilo lowu phorhaka ni ndzhaku ka rona ku ni langavi leri hisaka. Emahlweni ka rona tiko ri fana ni ntanga wa Edeni, kutani loko ri hundzile, tiko ri sala ri va mananga lama chavisaka; a ku sali nchumu endzhaku ka yena. 4Loko va voniwa, onge i timangwa, va tsutsuma kukota lava khandziyeke tihanci. 5Loko va twiwa, onge i mpfumawulo wa tigolonyi leti tlulatlulaka etinhlohlorhini ta tintshava, onge tinhlahle leti balekaka emalangavini ya ndzilo loko wu hisa nhova. Va fana ni vandla ra matimba leri tilunghiseleke ku lwa. 6Emahlweni ka vona, matiko ma rhurhumela, mimombo hinkwayo yi hundzuka.
7Va tsutsumela ekhokholweni kukota tinhenha, va khandziyela rirhangu kukota vavanuna va mivango. Un'wana ni un'wana a khoma ndlela ya yena, va nga ri na ku hambuka. 8A va susumetani, un'wana ni un'wana a hlayisa rixaxa rakwe; loko va wisiwa ehansi hi tlhari, a va tshiki rixaxa ra vona. 9Va hangalakela emutini, va tsutsuma ehenhla ka makhumbi ni tindlu, va nghena hi mafasitere kukota vayivi.
10Emahlweni ka vona, misava ya rhurhumela, matilo ma tsekatseka, dyambu ni n'weti swi hundzuka munyama, ni tinyeleti ta timeka. 11Kutani Yehovha a pfumisa rito ra yena emahlweni ka vandla ra yena, hikuva magovela ya yena hi lamakulu ngopfu, ni muheti wa rito ra yena u ni matimba; hikuva siku ra Yehovha hi lerikulu, ra chavisa, i mani la nga ri tiyelaka?
12“Hambi ku ri namuntlha,” ku vula Yehovha, “vuyani eka mina hi timbilu ta n'wina hinkwato, mi titsona swakudya, mi rila, mi tiba swifuva. 13Handzulani timbilu ta n'wina, ti nga ri tinguvu,” mi tlhelela eka Yehovha, Xikwembu xa n'wina, hikuva u ni tintswalo ni nsovo, wa hlwela ku kariha, u tele musa, wa vaviseka loko a vavisa munhu. 14Ku tiva mani xana kumbe a nga ka a nga tlheri a rivalela, ni ku siya endzhaku ka yena ku kateka, ni mihlengo, ni magandzelo lama humeseriwaka Yehovha Xikwembu xa n'wina?
15Yimbani timhalamhala eSiyoni, mi lerisa ku titsona swakudya, mi rhamba nhlengeletano. 16Hlengeletani tiko mi endla nhlengeleto leyi hlawuriweke! Rhambani swikoxa, rhambani ni swihlangi, hambi swi ri leswi an'waka emaveleni! Loyi a ha ku tekaka nsati a a hume endlwini ya yena ni loyi a ha ku tekiwaka a hume ekamareni ya yena. 17Ni vaprista lava tirhelaka Yehovha, a va be nkosi exikarhi ka rikupakupa ni alitari, va ku: “Oho! Yehovha, tsetselela tiko ra wena; u nga nyiketi ndzhaka ya wena eku soriweni, yi tseketseriwa hi vamatiko! Xana ku nga vuriwela yini exikarhi ka matiko, va ku: ‘Xi kwihi-ke, Xikwembu xa vona?’ ”
Yehovha u ta tsetselela tiko ra yena.
18Yehovha u vavisekele misava, kutani u tsetselele tiko ra yena. 19Yehovha u hlamulele tiko ra yena, a ku: “Vonani ndzi ta mi rhumela koro, ni dzova ra vhinyo, ni mafurha, kutani mi ta xurha hi swona; a ndzi nga ha mi endli lava sandziwaka exikarhi ka matiko.
20“Loko xi ri xirha xexo lexi humaka etlhelo ra n'walungu, ndzi ta xi susa exikarhi ka n'wina, ndzi xi hlongolela etikweni leri omeke; mavandla ya xona lama xi rhangelaka emahlweni, ndzi ta ma hoxa elwandle ra le vuxeni, ni ya le ndzhaku ndzi ma susumetela elwandle ra le vupeladyambu; kutani ku nun'hwa ka xona ku ta humela ehandle ku bola ka xona ku ta hangalaka, hikuva xi endle leswikulu.
21“U nga chavi, wena misava; u tsaka, u tsaka ngopfu; hikuva Yehovha u ta endla leswikulu. 22Mi nga chaveni, n'wina swiharhi swa nhova; hikuva madyelo ya mananga ma ta hatlisa ma endla rihlaza, hikuva murhi wu ta veka mihandzu ya wona, makuwa ni vhinya swi ta humesa matimba ya swona. 23Na n'wina vana va Siyoni, tsakani, mi tsaka ngopfu eka Yehovha, Xikwembu xa n'wina, hikuva u ta mi nyika hilaha ku fanelaka e timpfula letikulu, u ta mi nisela timpfula, timpfula ta rihunga, ni ta xirimo; hi wona masungulo. 24Swivuya swi ta tala hi mavele, ku halaka makhuwana lama teleke vhinyo ni mafurha. 25Ndzi ta mi tlherisela swakudya swa malembe lama nga dyiwa hi njiya, ni magerere, ni swidzedzane ni timhera, vandla ra mina lerikulu leri ndzi ri rhumeke exikarhi ka n'wina. 26Mi ta dya, mi ko mi xurha, mi ta dzunisa vito ra Yehovha, Xikwembu xa n'wina, la mi endleleke leswi hlamarisaka, kutani tiko ra mina ri nga ka ri nga ha tshami ri khomiwa hi tingana, ni siku ni rin'we. 27Mi ta tiva leswaku ndzi le xikarhi ka Israele, ni leswaku mina Yehovha ndzi Xikwembu xa n'wina; a ku na xin'wana; tiko ra mina ri nga ka ri nga ha tshami ri khomiwa hi tingana, ni siku ni rin'we.
28“Endzhaku ka sweswo, ndzi ta chela moya wa mina ehenhla ka nyama hinkwayo, ku ta profeta vana va n'wina va xinuna ni va xisati; swidyuhati swa n'wina swi ta lorha milorho, ni majaha ya n'wina ma vona mahlori. 29Ni le henhla ka malandza ya xinuna ni ya xisati, ndzi ta chela moya wa mina hi masiku walawo. 30Kutani ndzi ta endla masingita etilweni ni le misaveni, ngati ni ndzilo, ni hunguva ya musi.
31“Dyambu ri ta hundzuka munyama; ni n'weti wu hundzuka ngati, ku nga si ta siku lerikulu, leri chavisaka ra Hosi.
32“Kutani un'wana ni un'wana la khongelaka vito ra Yehovha u ta pona; hikuva entshaveni ya Siyoni, ni le Yerusalema, ku pona ku ta va kona, hilaha Yehovha a vuleke hakona, exikarhi ka lava nga ta sala van'wana hi lava nga ta vitiwa hi Yehovha.
