LEVHITIKA 13

₁Yehovha a byela Muxe na Aroni, a ku: ₂“Kutakuloko munhu a vona enhlongeni ya miri wa yena tshumba, kumbe xilondza, kumbe xivati lexi lavaka ku hundzuka vuvabyi bya nhlokonho enhlongeni ya miri wa yena, va ta n'wi tisa eka Aroni, muprista, kumbe eka un'wana wa vana va yena va vaprista. ₃Kuteloko muprista u vonile vuvabyi lebyi nge enhlongeni ya nyama ya yena, ni loko voya bya xirho lexi vabyaka byi hundzuke lebyo basa, kutani xilondza xi lava ku nghena enhlongeni, i nhlokonho, muprista kuteloko a swi vonile, u ta n'wi vula la nga tengangiki. ₄Kambe kungakuloko enhlongeni ya munhu ku voniwa xivati lexo basa, lexi nga laviki ku nghena enhlongeni, ni loko voya byi nga hundzukanga lebyo basa, muprista u ta pfalela la vabyaka hitlhelo hi masiku ya ntlhanu na mambirhi. ₅Hi siku ra ntlhanu na mambirhi, muprista u ta n'wi kamba, kutani, kutakuloko a ringanisa leswaku xilondza xi yimile, xi nga anamanga enhlongeni, muprista u ta n'wi pfalela ra vumbirhi hi masiku ya ntlhanu na mambirhi. ₆Muprista u ta n'wi kamba ra vumbirhi, hi siku ra ntlhanu na mambirhi; kutani, kutakuloko xilondza lexi xi nga ha kwetsimi, xi nga anamanga enhlongeni, muprista u ta vula munhu loyi la tengeke; i ntshansi. U ta hlantswa tinguvu ta yena, kutani a ta va la tengeke. ₇Kambe kutakuloko a tikombisile eka muprista leswaku a n'wi vula la baseke, kutani xilondza loko xi anamile enhlongeni, a ta tikombisa ra vumbirhi eka muprista. ₈Kutani muprista loko a vona leswaku xilondza lexi xi anamile enhlongeni, muprista u ta n'wi vula la nga tengangiki; i nhlokonho.

₉“Kungakuloko munhu a ri ni nhlokonho, va ta n'wi tisa eka muprista. ₁₀Kutani muprista loko a vona xilondza xo basa enhlongeni, ni loko xi basisile voya, kutani ku va ni nyama leyo tshwuka exilondzeni, ₁₁i nhlokonho leyi ngheneke enyameni ya yena; muprista u ta n'wi vula la nga tengangiki; a nga ka a nga n'wi pfaleri, hikuva wa yila. ₁₂Kambe kungakuloko nhlokonho yi humele hinkwako enhlongeni, kutani yi funengeta nhlonge hinkwayo ya muvabyi, ku suka enhlokweni, ku fika emilengeni, hilaha muprista a swi voneke hakona, ₁₃kutakuloko muprista a vona leswaku nhlokonho yi enetile nyama hinkwayo ya muvabyi, a ta n'wi vula la tengeke; u basile hinkwako, u tengile. ₁₄Kambe siku leri ku nga ta humelela nyama leyo tshwuka, a ta va la nga tengangiki. ₁₅Muprista, kuteloko a vonile nyama leyo tshwuka, u ta n'wi vula la nga tengangiki, nyama leyo tshwuka yi yirile; i nhlokonho. ₁₆Kungakuloko nyama leyo tshwuka yi hundzuka, yi basa, u ta ya eka muprista. ₁₇Kuteloko muprista a swi vonisisile leswaku laha ku vavaka ku basile, u ta vula muvabyi la tengeke; u tengile.

₁₈“Kungakuloko munhu a ri ni tshumba leri holeke enhlongeni ya yena; ₁₉kutani ku humelela kona xilondza lexo basa, kumbe xivati lexi baseke, xi tshwukilenyana, munhu loyi u ta tikombisa eka muprista. ₂₀Kutakuloko muprista a vona leswaku xivati xi lava ku nghena enyameni, ni leswaku voya byi basile, u ta n'wi vula la nga tengangiki, i nhlokonho; yi humelele etshumbeni. ₂₁Kambe, loko muprista a nga voni voya byo basa exivatini, ni loko xi nga nghenanga enyameni, kambe xi basilenyana, muprista u ta pfalela munhu loyi hi masiku ya ntlhanu na mambirhi. ₂₂Kutakuloko xi anama enhlongeni, muprista u ta n'wi vula la nga tengangiki, u ni nhlokonho. ₂₃Kungakuloko xivati xi tshamile, swi nga anamanga, i tshumba leri swonyeke; muprista u ta n'wi vula la tengeke.

₂₄“Kungakuloko munhu a tshwile hi ndzilo, kutani laha ku tshweke ku humelele xivati xo basa ni lexo tshwukanyana, kumbe lexo basa ntsena, ₂₅loko muprista a swi kambile, kutani a vona leswaku voya byi hundzuke lebyo basa exivatini, ni loko swi nghene enyameni; nhlokonho, yi humelele laha ku tshweke. Muprista u ta vula munhu loyi, la nga tengangiki; u ni nhlokonho. ₂₆Kambe muprista, loko a nga vonangi mavoya layo basa exivatini, ni loko xi nga nghenanga enyameni, kambe xi basilenyana, muprista u ta pfalela munhu loyi hi masiku ya ntlhanu na mambirhi. ₂₇Kutakuloko muprista a n'wi kambile hi siku ra ntlhanu na mambirhi, loko xivati xi anamile enhlongeni, muprista a ta n'wi vula la nga tengangiki; u ni nhlokonho. ₂₈Kambe loko xivati xi tshamile, swi nga anamanga enhlongeni, ni loko xi hundzuke lexo basanyana, i ndzosi wa ku tshwa. Muprista u ta n'wi vula la tengeke, hikuva i mbanga leyi swonyeke ya ku tshwa.

₂₉“Kutakuloko munhu, hambi wanuna, hambi wansati, u ni xivavi enhlokweni hambi ku ri exilepfini, ₃₀muprista u ta langutisisa xivavi lexi. Loko xi lava ku nghena enhlongeni, kutani ku voniwa kona mavoya lama rhombeke, lamatsongo; muprista u ta n'wi vula la nga tengangiki; i ntshansi rin'wana, i nhlokonho ya nhloko kumbe ya malebvu. ₃₁Kambe, kuteloko muprista a langutisile xivavi, kutani a vona leswaku xivati xa mbanga a xi nghenangi enhlongeni, hambiloko mavoya ya ntima ma nga ri kona, u ta pfalela la nga ni ntshansi hi masiku ya ntlhanu na mambirhi. ₃₂Kutani hi siku ra ntlhanu na mambirhi, kuteloko muprista a vona leswaku ntshansi a ri yangi emahlweni, ni leswaku a ku na mavoya ya ribungwanyana, ni leswaku mbanga a yi lavi ku nghena enhlongeni, ₃₃munhu loyi u ta byewula misisi, kambe a nga byewuli laha ku nga ni ntshansi; kutani muprista u ta pfalela ra vumbirhi, la nga ni ntshansi masiku ya ntlhanu na mambirhi. ₃₄Kutani, hi siku ra ntlhanu na mambirhi, muprista u ta langutisa ntshansi; kutakuloko ri nga yangi emahlweni, ni loko ti nga lavanga ku nghena enhlongeni, muprista u ta n'wi vula la tengeke: u ta hlantswa tinguvu ta yena, kutani u ta tenga.

₃₅“Kambe loko ntshansi ri anamile enhlongeni, hambi a vuriwile la tengeke, ₃₆muprista u ta n'wi kamba, kutani loko ntshansi ri anamile enhlongeni, muprista a nga na ku langutisa xana mavoya ma ri ya ribungu; u yirisiwile. ₃₇Kambe loko ntshansi ra ha ri rona ra khale, kutani ku mirile mavoya ya ntima; ntshansi ri horile; u horile; muprista u ta n'wi vula la tengeke.

₃₈“Kungakuloko wanuna, kumbe wansati, a ni swivati enhlongeni ya yena, xi ri xivati lexo basa, ₃₉muprista u ta n'wi kamba, kutakuloko swivati swa nhlonge ya miri wa yena swi basilenyana, i xilondza ntsena lexi humeke enhlongeni; u tengile.

₄₀“Kungakuloko misisi ya munhu yi kundzumukile enhlokweni, i rihandla, u tengile. ₄₁Loko nhloko yi hava misisi tlhelo ra mombo, i tinhlohla, u tengile. ₄₂Kambe loko rihandleni, kumbe etinhlohleni, ku rhombilenyana, i nhlokonho leyi humeke. ₄₃Kutakuloko muprista a n'wi kambile, kutani a vona leswaku xivati xi basile, swi ri ni ribungwanyana erihandleni kumbe etinhlohleni, kutani xi fana ni nhlokonho enhlongeni ya munhu, ₄₄i wa nhlokonho, a nga tenganga; muprista u ta n'wi vula la nga tengangiki; vuvabyi byi sungurile enhlokweni.

₄₅“Wa nhlokonho la nga ni vuvabyi lebyi, u ta ambala tinguvu leti handzuriweke, a nga funengeti nhloko; a tisirhelela malebvu, kutani u ta tshama a huwelela: ‘La yilaka, la yilaka!’ ₄₆Hi masiku hinkwawo ya vuvabyi bya yena, u ta va la nga tengangiki. Wa yila; u ta tshama a ri swakwe; ntsonga wa yena wu ta va ehandle ka mixaxa.

₄₇“Loko ti ri tinguvu, kutakuloko ku humelele nhlokonho eka tona hambi yi ri nguvu ya voya bya tinyimpfu, hambi yi ri ya ntsembyana lowu nga lukiwa, kumbe leyi nga swuriwa, ₄₈kumbe ya mavoya, hambi ku ri edzobyeni, kumbe entirhweni wihi ni wihi wa dzovo, ₄₉loko xivati xi ri xa nkuxe, kumbe xa ribungwanyana engubyeni, kumbe edzobyeni, hambi eka lexi nga lukiwa, hambi eka lexi nga swuriwa, hambi ku ri entirhweni wa dzovo; i nhlokonho, va ta xi kombisa muprista. ₅₀Muprista u ta kamba xivati, kutani u ta pfalela xilo lexi yileke hi masiku ya ntlhanu na mambirhi. ₅₁Siku ra ntlhanu na mambirhi, u ta langutisa xivati. Kutakuloko xivati xi anamile engubyini, hambi eka lexi swuriweke, hambi eka lexi lukiweke, hambi xi le edzobyeni, hambi entirhweni wihi ni wihi wa dzovo, i xivati xa nhlokonho lowo leva; xilo lexi xi yirile. ₅₂U ta hisa nguvu, hambi yi ri nguvu leyi swuriweke hi mavoya, kumbe leyi lukiweke, hambi wu ri ntirho wihi ni wihi wa dzovo, laha ku nga ni xivati kona, hikuva i nhlokonho lowo leva; yi fanele ku hisiwa endzilweni.

₅₃“Kambe loko muprista a vona leswaku xivati a xi nga anamanga engubyeni, hambi ku ri eka lexi swuriweke hambi eka lexi lukiweke hambi entirhweni wihi ni wihi wa dzovo, ₅₄muprista u ta va hlantswisa xilo lexi yileke, kutani a xi pfalela ra vumbirhi hi masiku ya ntlhanu na mambirhi. ₅₅Kutani muprista a langutisa xivati loko xi hlantswiwile; kakuloko xivati xi nga hundzukanga, ni loko xi nga anamanga, xilo lexi xi yirile; u ta xi hisa endzilweni; xi dyiwile ehandle kumbe endzeni ka xona.

₅₆“Kambe kungakuloko muprista a vonisisa leswaku xivati xi basilenyana hi ku hlantswiwa, u ta xi handzula engubyeni hambi edzobyeni, hambi eka lexi swuriweke, hambi eka lexi lukiweke. ₅₇Kutakuloko xi vonaka kambe engubyini, hambi eka lexi swuriweke, kumbe eka lexi lukiweke, hambi eka xilo xihi ni xihi xa dzovo, i nhlokonho lowu humeke; u ta hisa xilo lexi nga ni xivati. ₅₈Loko yi ri nguvu, hambi lexi swuriweke, hambi lexi lukiweke, hambi xilo lexi endliweke hi dzovo, kuteloko u xi hlantswile, ni loko xivati xi sukile eka xona, swi ta hlantswiwa ra vumbirhi, xi ta va lexi tengeke kutani.

₅₉“Hi wona nawu lowu vekeriweke xivati xa nhlokonho lexi nga engubyini ya mavoya, hambi ya ntsembyana, kumbe eka lexi swuriweke, kumbe eka lexi lukiweke, hambi eka xilo xihi ni xihi lexi endliweke hi dzovo, leswaku xi vuriwa lexi tengeke kumbe lexi nga tengangiki.”