Ta ku kwetsima ka ku tekana.
1Yehovha a byela Muxe, a ku: 2“Byela vana va Israele, u ku eka vona: ‘Hi mina Yehovha, Xikwembu xa n'wina. 3Mi nga tshuki mi endla leswi va swi endlaka etikweni ra Egipta, laha ingi mi akile kona; mi nga tshuki mi endla leswi va swi endlaka etikweni ra Kanana laha ndzi mi yisaka kona; mi nga tshuki mi landza mikhuva ya vona. 4Mi ta yingisa ku lerisa ka mina, mi landza milawu ya mina, mi famba ha yona. Hi mina Yehovha, Xikwembu xa n'wina. 5Mi ta yingisa milawu ya mina ni ku lerisa ka mina, munhu la swi endlaka u ta hanya ha swona; hi mina Yehovha.
6“ ‘Ku nga tshuki ku va ni wanuna la tshinelelaka xaka ra yena, leyi nga nyama ya yena, ku funungula vuhava bya yena: hi mina Yehovha.
7“ ‘U nga tshuki u funungula vuhava bya tata wa wena, ni vuhava bya mana wa wena; i mana wa wena, u nga fununguli vuhava bya yena.
8“ ‘U nga tshuki u funungula vuhava bya nsati wa tata wa wena; i vuhava bya tata wa wena.
9“ ‘U nga tshuki u funungula vuhava bya makwenu wa xisati, a nga n'wana wa tata wa wena, hambi a ri n'wana wa mana wa wena; hambiloko a velekiwile endlwini, hambiloko a velekiwile ehandle; u nga fununguli vuhava bya yena.
10“ ‘U nga tshuki u funungula vuhava bya ntukulu wa wena wa xisati, hikuva i vuhava bya wena.
11“ ‘U nga tshuki u funungula vuhava bya makwenu, n'wana wa xisati wa tata wa wena, la nga velekiwa hi tata wa wena; i makwenu.
12“ ‘U nga tshuki u funungula vuhava bya hahani wa wena, hikuva i ngati ya tata wa wena.
13“ ‘U nga tshuki u funungula vuhava bya makwavo wa xisati wa mana wa wena, hikuva i nyama ya mana wa wena.
14“ ‘U nga tshuki u funungula vuhava bya makwavo wa tata wa wena; u nga tshuki u tshinela nsati wa yena; i hahani wa wena.
15“ ‘U nga tshuki u funungula vuhava bya n'wingi wa wena; i nsati wa n'wana wa wena, u nga fununguli vuhava bya yena.
16“ ‘U nga tshuki u funungula vuhava bya nsati wa makwenu; i vuhava bya makwenu.
17“ ‘U nga tshuki u funungula vuhava bya wansati ni n'wana wa yena; u nga tshuki u teka ntukulu wa yena ku funungula vuhava bya vona, i maxaka swinene; swi fana ni ku dlaya.
18“ ‘U nga tshuki u teka namu wa wena leswaku ku pfuxiwa ku vengana, i ku funungula vuhava bya namu wa wena swin'we ni bya nsati wa wena a ri karhi a hanya.
19“ ‘U nga tshuki u tshinelela wansati hi nkarhi wa n'hweti ya yena ku funungula vuhava bya yena.
20“ ‘U nga tshuki u hlangana ni nsati wa warikwenu ku tinyamisa na yena.
21“ ‘U nga tshuki u nyiketa vana va wena leswaku ku phahliwa timhamba ta Moloko ha vona. U nga tshuki u sorisa vito ra Xikwembu xa wena. Hi mina Yehovha.
22“ ‘U nga tshuki u etlela ni wanuna kukotisa loko u etlela ni wansati; i ku dyoha lokukulu ngopfu.
23“ ‘U nga tshuki u etlela ni xifuwo ku tinyamisa ha xona. Wansati a nga tshuki a tshinelela xifuwo ku oswana na xona; i tingana leti chavisaka.
24“ ‘Mi nga tshuki mi tinyamisa hi xilo xin'we swa swilo leswi: hikuva; matiko lawa ndzi ma hlongoleke emahlweni ka n'wina, ma tinyamisile hi swilo leswi hinkwaswo. 25Tiko ri nyamisiwile hi swona; ndzi avanyisile ku dyoha ka rona, kutani misava yi hlantile vaaki va yona. 26Loko mi ri n'wina, mi ta hlayisa milawu ya mina ni ku lerisa ka mina, mi nga tshuki mi endla ni xin'we xa swivi leswi, hambi a ri la tswariweke etikweni, hambi muluveri la luveleke exikarhi ka n'wina. 27Hikuva swivi leswi, swi endliwe hi vanhu va tiko lava akeke kona, mi nga si va kona, kutani misava yi nyamisiwile hi swona. 28Tilanguteleni leswaku misava yi nga tshuki yi mi hlanta loko mi yi nyamisile, kukotisa leswi yi hlanteke tiko leri ngi ri ri kona emahlweni ka n'wina. 29Hikuva hinkwavo lava nga ta endla xin'wana xa swivi leswi, va ta susiwa exikarhi ka varikwavo. 30Mi ta hlayisa milawu ya mina, leswaku mi nga tshuki mi landza ni wun'we wa mikhuva leyo biha leyi landziweke hi vona mi nga si va kona; mi nga tshuki mi tinyamisa ha yona.’ Hi mina Yehovha, Xikwembu xa n'wina.”
