LEVHITIKA 21

₁Yehovha a ku eka Muxe: “Byela vaprista, vana va Aroni, u ku eka vona: ‘Muprista a nga tshuki a tiyirisa hi mufi etikweni ra yena, ₂loko a nga ri mufi wa xaka ra yena, ra ngati ya yena, hambi mana wa yena, hambi tata wa yena, hambi n'wana wa wanuna, hambi n'wana wa wanhwanyana, hambi makwavo wa wanuna, ₃hambi makwavo la nga tekiwangiki, la nga ekusuhi na yena, la nga riki na nuna; u ta tinyamisa hikwalaho ka yena. ₄Leswi a nga ni vuhosi etikweni ra yena, a nga tshuki a tinyamisa a nyamisa ni vuhosi bya yena. ₅Vaprista va nga tshuki va byewula misisi, va nga tshuki va titsemela ematlhelo ya malebvu, va nga titlhaveli emirini ya vona. ₆Va ta tihlawulela Xikwembu xa vona, hikuva va tshama va humesela Yehovha magandzelo lama hisiwaka, swi ri swakudya swa Xikwembu xa vona: va ta va lava hlawuriweke.

₇“ ‘Va nga tshuki va teka nsati wa mbhisa, kumbe la nga ni xisandzu; va nga tshuki va teka wansati la tshikiweke hi nuna wa yena, hikuva muprista u hlawuleriwe Xikwembu xa yena. ₈U ta n'wi vula la hlawuriweke, hikuva hi yena la humesaka swakudya swa Xikwembu xa wena, hikuva ndzi hlawulekile, mina Yehovha la mi hlawulaka. ₉Kungakuloko n'wana wa wanhwana wa muprista a tikhomisa tingana hi ku tinyiketa vuoswi, a khomise tata wa yena tingana; u ta hisiwa endzilweni.

₁₀“ ‘Loko a ri muprista lonkulu exikarhi ka vamakwavo, la hlawuriweke hi ku cheriwa enhlokweni mafurha ya ku tola, la ambexiweke tinguvu leti hlawuriweke, a nga ka a nga fununguli nhloko ya yena hambi ku ri ku handzula tinguvu ta yena. ₁₁A nga ka a nga tshineleli mufi ni un'we, a nga tshuki a tinyamisela tata wa yena, hambi mana wa yena. ₁₂A nga tshuki a huma evukwetsimelweni, a nga tshuki a endla vukwetsimelo bya Xikwembu xa yena xilo xa hava; hikuva mafurha ya ku tola ya Xikwembu xa yena, ma le henhla ka yena: hi mina Yehovha.

₁₃“ ‘Loko a teka nsati, u ta teka wanhwana. ₁₄A nga ka a nga teki noni, hambi a ri wa mbiri, hambi a ri la khomisiweke tingana, kumbe nsati wa muoswi: kambe u ta teka wanhwana exikarhi ka tiko ra yena. ₁₅A nga tshuki a khomisa xivongo xa yena tingana etikweni ra yena; hikuva hi mina Yehovha la n'wi hlawulaka.’ ”

₁₆Yehovha a byela Muxe, a ku: ₁₇“Byela Aroni, u ku eka yena: ‘Munhu un'wana ni un'wana wa rixaka ra wena ni wa vatukulu va wena, la nga ni vulema, a nga tshuki a tshinelela ku humesa swakudya swa Xikwembu xa yena; ₁₈hikuva ku nga tshuki ku tshinela munhu la nga ni vulema emirini wa yena. Munhu un'wana ni un'wana la feke mahlo, kumbe la khwitaka hambiloko a ri ni xivati, hambi xin'wana lexo mila emirini, ₁₉kumbe munhu la tshovekeke nenge, kumbe voko, ₂₀kumbe la nga ni lundza, kumbe xigono, kumbe la nga ni tihlo ra ndzololo, hambi la nga ni ntshansi ra nhloko, kumbe ntshansi rin'wana, kumbe la tsheniweke. ₂₁Munhu un'wana ni un'wana wa rixaka ra Aroni, muprista, la nga ni vulema, a nga tshuki a tshinela ku humesa magandzelo lama hiseriwaka Yehovha, u ni vulema, a nga ka a nga tshineleli ku humesa swakudya swa Xikwembu xa yena. ₂₂U ta dya kunene vuswa bya Xikwembu xa yena, ni ku averiwa ka yena ka swilo leswi hlawuriweke ngopfu, ni leswi kwetsimisiweke; ₂₃kambe a nga ka a nga yi ekusuhi ni xisirhelelo ni ku tshinelela alitari, hikuva u ni vulema. A nga tshuki a endla vukwetsimelo bya mina swahava, hikuva hi mina Yehovha la n'wi kwetsimisaka.’ ”

₂₄Kutani Muxe a byerisa sweswo Aroni ni vana va yena, ni vana hinkwavo va Israele.