LUKA 19

₁Kuteloko Yesu a nghenile eYeriko, a tsemakanya exikarhi ka muti. ₂Munhu a a ri kona la vuriwaka Zakiya, a ri hosi ya valuvisi, a fuwe ngopfu. ₃A a rhandza ku vona Yesu leswaku u lo yini. Kambe a siveriwa hi ntshungu, hikuva a a komile. ₄Kutani a tsutsumela emahlweni, a khandziya emurhini wa nkuwa, leswaku a ta n'wi vona, hikuva a a ta hundza eka wona. ₅Kuteloko Yesu a fikile kwalaho, a languta ehenhla, a n'wi vona, kutani a ku eka yena: “Zakiya, hatlisa u xika, hikuva ndzi fanele ku ya tshama endlwini ya wena namuntlha.” ₆Kutani a hatlisa ku xika, a n'wi amukela hi ku tsaka. ₇Kambe hinkwavo loko va swi vona va hleva, va ku: “U hambukele eka wanuna wa mudyohi ku ya wisa kona.”

₈Kwalaho Zakiya a yima, a ku eka Hosi: “Vona, Hosi, ndzi avanyisela swisiwana rifuwo ra mina hi le xikarhi; loko ndzi dyile xilo xa munhu ndzi n'wi tlherisela ka mune.” ₉Kutani Yesu a ku eka yena: “Namuntlha ku hanya ku nghenile endlwini leyi, hikuva na yena loyi, i n'wana Abrahama; ₁₀hikuva N'wana wa Munhu u tile ku lava ni ku hanyisa leswi loveke.”

₁₁Kakuloko va ha yingisa timhaka teto, Yesu a engeta a va byela xifaniso, hikuva a a ri ekusuhi na Yerusalema, kutani va ringanisa leswaku ku fuma ka Xikwembu ku ta hatlisa ku humelela.

₁₂A ku: “Munhu lonkulu a ya endzela etikweni leri nga ekule ku ya teka vuhosi kutani a ta ta vuya. ₁₃Kuteloko a vitanile malandza ya yena ya khume, a ma nyika tipondho ta khume; a ku eka wona: ‘Bindzulani ha tona ndzi ko ndzi vuya.’ ₁₄Kambe vanhu va tiko ra yena a va n'wi venga; va rhuma tintsumi emitileni ya yena ku vula leswaku: ‘A hi rhandzi ku fumiwa hi yena.’ ₁₅Kute siku a tlhelaka, a tekile vuhosi, a lerisa leswaku malandza ya yena, lawa ngi ma nyikiwile mali, ma vitaniwa leswaku a ta tiva leswi un'wana ni un'wana a bindzuleke ha yona. ₁₆Ku fika lowo rhanga, a ku: ‘Hosi, pondho ya wena yi bindzurile tipondho ta khume.’ ₁₇Kutani a ku eka yena: ‘Hi swona, nandza lonene; leswi u tshembekeke hi xilo lexitsongo, u ta fuma miti ya khume.’ ₁₈Wa vumbirhi a ta, a ku: ‘Hosi, pondho ya wena yi bindzule tipondho ta ntlhanu.’ ₁₉Kutani a ku eka yena: ‘Na wena, fuma miti ya ntlhanu.’ ₂₀Un'wana a ta, a ku: ‘Hosi, pondho ya wena ya ha ri yona leyi, ndzi yi phutsele hi duku; ₂₁hikuva ndzi ku chavile, hikuva u ri munhu la nonon'hwaka, u teka lexi u nga xi vekangiki, u tshovela lexi u nga xi byalangiki.’ ₂₂A ku eka yena: ‘Nandza lowo biha, ndzi ta ku avanyisa hi ku vula ka wena. U tivile leswaku ndzi munhu wo nonon'hwa, ndzi teka lexi ndzi nga xi vekangiki, ndzi tshovela lexi ndzi nga xi byalangiki. ₂₃Loko swi ri tano, a ku vekanga ha yini mali ya mina eku andziseni, kutani eku vuyeni ka mina, a ndzi ta yi teka swin'we ni leyi bindzuriweke.’ ₂₄Kutani a ku eka lava nga kwalaho: ‘N'wi tekeleni pondho, mi yi nyika la nga ni tipondho ta khume.’ ₂₅Kutani va ku eka yena: ‘Hosi, u ni tipondho ta khume.’ ₂₆‘Ndza mi byela leswaku ku ta nyikiwa un'wana ni un'wana la nga ni xilo; kambe la pfumalaka, u ta tekeriwa na xona lexi a nga na xona. ₂₇Loko va ri valala va mina lava nga swi rhandziki leswaku ndzi va fuma, va tiseni kwala, mi va dlaya emahlweni ka mina.’ ”

₂₈Kuteloko a vulavurile timhaka teto, a famba emahlweni, a tlhandlukela eYerusalema. ₂₉Kuteloko a tshinela eBetefage na Betaniya, ekusuhi ni ntshava leyi vuriwaka ya Mitlhwari, a rhuma vadyondzisiwa va yena vambirhi, a ku: ₃₀“Yanani emutini wolowo mi wu kongomaka, kutakuloko mi nghene eka wona, mi ta kuma mbhongolwana leyi kulekiweke, leyi nga siki khandziyiwaka hi munhu: yi tshunxeni, mi yi tisa. Kungakuloko munhu a mi vutisa, a ku: ₃₁‘Mi yi tshunxela yini?’ Mi ta ku eka yena: ‘Hosi ya yi lava.’ ” ₃₂Lava rhumiweke va famba, va ya kuma swi ri tano, hilaha a nga va byela hakona. ₃₃Kakuloko va tshunxa mbhongolo, vini va yona va va vutisa, va ku: “Mbongolo yoleyo mi yi tshunxela yini?” ₃₄Vona va ku: “Hosi ya yi lava.” ₃₅Kutani va yi tisa ka Yesu; va andlala tinguvu ta vona ehenhla ka mbhongolo, va khandziyisa Yesu ehenhla ka yona. ₃₆Kakuloko a ri karhi a famba, va andlala tinguvu ta vona endleleni.

₃₇Kutani loko a tshinelele eku rheleleni ka Ntshava ya Mitlhwari, ntshungu hinkwawo wa vadyondzisiwa wu sungula ku tsaka, va dzunisa Xikwembu hi marito lamakulu hikwalaho ka masingita hinkwawo lawa va ma voneke va ku: ₃₈“A ku khensiwe Hosi leyi taka hi vito ra Yehovha! Ku rhula a ku ve ematilweni, ni ku kwetsima ematilweni lama nge henhlahenhla.” ₃₉Kutani Vafarisi van'wana, lava ngi va ri exikarhi ka ntshungu, va ku eka yena: “Mufundhisi, tshinya vadyondzisiwa va wena.” ₄₀A va hlamula, a ku: “Ndza mi byela leswaku loko lava va miyela, maribye ma ta huwelela.”

₄₁Kuteloko a tshinerile, a vona muti a wu rilela; a ku: ₄₂“Yo! Loko ngi na wena u ti tivile hi siku leri ra wena, timhaka leti ta ku rhula ka wena! Kambe sweswi, ti fihleriwe mahlo ya wena. ₄₃Hikuva ku ta ta masiku ehenhla ka wena, lawa valala va wena va nga ta biyela rirhangu, va ku rhendzela ha rona, va ku sivelela hi matlhelo hinkwawo. ₄₄Va ku mbundzuxela ehansi, wena ni vana va wena lava nga exikarhi ka wena; kambe va nga ka va nga tshiki eka wena, ribye ehenhla ka ribye rin'wana, hikuva a ku tivanga nkarhi lowu u endzeriweke ha wona.”

₄₅Kuteloko a nghenile etempeleni, a sungula ku hlongolela ehandle hinkwavo lava xaviselanaka kona, a ku eka vona: ₄₆ kasi n'wina mi yi endlile bako ra makhamba.”“Ku tsariwile leswaku: ‘Yindlu ya mina yi ta va yindlu ya ku khongela’;

Kutani a dyondzisa etempeleni hi masiku hinkwawo. ₄₇Kambe vaprista lavakulu ni vatsari ni vakulu va tiko, a va rhandza ku n'wi dlaya. ₄₈Kambe va tsandzeka ku endla nchumu, hikuva vunyingi hinkwabyo a byi n'wi yingisa.