LUKA 2

₁Emikarhini yoleyo, ku humelela nawu wa hosi Khezari Awugusto, leswaku matiko hinkwawo ma tsariwa. ₂Ku tsala loko rhanga loku, ku endliwile enkarhini lowu Kwirino a fumaka Siriya. ₃Kutani vanhu hinkwavo va ya tsariwa, un'wana ni un'wana emutini wa yena. ₄Yosefa na yena a suka eGaleliya emutini wa Nazareta, ku ya eYudiya emutini wa Davhida, lowu vuriwaka Betlehema, hikuva a a ri munhu wa yindlu ya Davhida ni wa rixaka ra yena; ₅a ya tsariwa na Mariya loyi a n'wi languteleke, loyi ngi a ri ni khwiri. ₆Kakuloko va ha ri kona, masiku ya ku tika ka yena ma hela. ₇Kutani a veleka n'wana wa yena wa mativula, wa wandzisanyana; a n'wi phutsela hi nguvu, a n'wi lata exidyelweni, hikuva a va nga ri na byetlelo endlwini ya vaendzi.

₈A ku ri ni varisi etikweni rero, va etlele enhoveni, va risa mitlhambi ya vona nivusiku. ₉Kutani, hi nomu lowu, ntsumi ya Hosi yi humelela eka vona, ku vonakala ka Hosi ku va rhendzela, kutani va chava hi ku chava lokukulu. ₁₀Ntsumi yi ku eka vona: “Mi nga chavi, vonani, ndzi mi byela ku tsaka lokukulu, loku nga ta va eka tiko hinkwaro; ₁₁hileswaku namuntlha mi velekeriwile Mulondzovoti emutini wa Davhida; i Kriste Hosi. ₁₂Xikombiso xa n'wina hi lexi: Mi ta kuma wandzisanyana la phutseriweke, loyi a latiweke exidyelweni.”

₁₃Kutani hi nomu lowu, vunyingi bya mavandla ya le henhla byi va ni ntsumi, byi vonga Xikwembu, byi ku: ₁₄“Ku kwetsima a ku ve eka Xikwembu ematilweni ya le henhla, ku tsaka a ku ve emisaveni eka vanhu lava khensiwaka.”

₁₅Kuteloko tintsumi ti va siyile, ti tlhelela etilweni, varisi va byelana va ku: “A hi yeni eBetlehema, hi ya vona leswi humeleleke kona, leswi Hosi yi nga hi tivisa swona.” ₁₆Kutani va hatlisa va ya, va ya kuma Mariya na Yosefa ni wandzisanyana la latiweke exidyelweni. ₁₇Kuteloko va n'wi vonile, va vula hinkwako timhaka ta xihlangi leti va nga byeriwa tona. ₁₈Kutani hinkwavo lava ti twaka, va hlamala hi timhaka leti vuriwaka hi varisi. ₁₉Kambe Mariya a hlayisa timhaka leti hinkwato, a ti hlayisa embilwini ya yena. ₂₀Kutani varisi va tlhela, va ri karhi va dzunisa Xikwembu. Va xi twarisa hikwalaho ka hinkwaswo leswi va swi voneke, ni leswi va swi tweke hilaha va nga byeriwa hakona.

₂₁Masiku ya ntlhanu na manharhu ya ku yimbisa n'wana loko ma herile, va n'wi thya vito ra Yesu, hilaha ntsumi yi nga n'wi thya hakona, mana wa yena a nga si kuma khwiri. ₂₂Kuteloko ku hundzile masiku lawa Mariya a nga hlamba ha wona hi nawu wa Muxe, va yisa n'wana eYerusalema, ku ya n'wi kombisa eka Hosi, ₂₃hilaha ku nga tsariwa enawini wa Hosi leswaku: “N'wana un'wana ni un'wana wa wanuna, wa mativula, u ta hlawuleriwa Hosi”; ₂₄va ya humesa mhamba leyi lerisiweke hi nawu wa Hosi: “ma nga matuva mambirhi, kumbe mavondlo mambirhi ya matuva.”

₂₅EYerusalema, a ku ri ni munhu la vuriwaka Simiyoni. Munhu loyi a a lulamile, a chava Xikwembu, a langutele ku chaveleriwa ka Israele. Moya lowo Kwetsima a wu ri eka yena. ₂₆A a kombisiwile khale hi Moya lowo Kwetsima leswaku a nga ka a nga fi a nga si vona Kriste wa Hosi; ₂₇kutani a yisiwa etempeleni hi moya lowo kwetsima. Kuteloko Yesu n'wana a tisiwa hi vakulu va yena, ku ta endla ha yena hi ku lerisa ka nawu, ₂₈Simiyoni a n'wi amukela emavokweni ya yena, a vonga Xikwembu, a ku: ₂₉“Sweswi, Hosi, u tshika nandza wa wena a famba hi ku tsaka, hilaha u nga vula hakona, ₃₀hikuva mahlo ya mina ma vonile ku hlayiseka ka wena, ₃₁loku u ku lunghiseke emahlweni ka matiko hinkwawo, ₃₂leswaku ku ve ku vonakala loku nga ta voninga matiko, ni ku kwetsima ka Israele, tiko ra wena.”

₃₃Kutani Yosefa ni mana wa n'wana va hlamala hi timhaka leti a vuriwaka ha tona. ₃₄Kutani Simiyoni a va katekisa, a ku eka Mariya, mana wa n'wana: “Vona, n'wana loyi, u vekeriwile ku khunguvanyeka ni ku pfuka ka lavo tala eIsraeleni, ni ku va xikombiso lexi nga ta landzuriwa; ₃₅miehleketo ya timbilu leto tala yi ta humelela erivaleni.”

₃₆Kambe a ku ri na Ana, muprofeta wa wansati, n'wana Fanuwele, wa rixaka ra Asere, a a dyuhele ngopfu. Loko a tekiwile a ri wanhwana, u tshame ni nuna wa yena ntlhanu wa malembe na malembe mambirhi ntsena, ₃₇a yi ri noni ya malembe ya ntlhanu wa makume na makume manharhu na mune. A a nga suki etempeleni, kambe a tirhela Xikwembu hi ku titsona swakudya, ni ku khongela vusiku ni nhlekanhi. ₃₈Na yena a humelela enkarhini wolowo, a khensa Hosi, a vula timhaka ta Yesu eka hinkwavo lava languteleke ku kutsuriwa ka Israele, emutini wa Yerusalema.

₃₉Kuteloko va hetile hinkwaswo leswi lerisiweke hi nawu wa Hosi, va tlhelela eGaleliya, va ya eNazareta, emutini wa vona. ₄₀Loko a ri n'wana, a kula, a tiya matimba emoyeni, a tala vutlhari; ni tintswalo ta Xikwembu ti tshama eka yena.

₄₁Vakulu va yena a va ya eYerusalema, hi malembe hinkwawo enkhubyeni wa Paseka. ₄₂Kutani loko a kurile, a ri ni malembe ya khume na mambirhi, va tlhandlukela eYerusalema, hi mukhuva wa nkhuvo. ₄₃Masiku ya nkhuvo, kuteloko ma herile, va tlhelela ekarikwavo; Yesu n'wana a sala eYerusalema, vatswari va yena va nga swi tivi. ₄₄Kambe va anakanya leswaku u le xikarhi ka lava fambaka na vona; va famba siku rin'we, kutani va n'wi lava exikarhi ka maxaka ya vona, ni le xikarhi ka lava tivanaka na vona. ₄₅Kambe, loko va nga n'wi voni, va tlhelela eYerusalema, va ri karhi va n'wi lava. ₄₆Endzhaku ka masiku manharhu, va n'wi kuma etempeleni, a tshamisile exikarhi ka vafundhisi, a va yingisela, ni ku va vutisa swivutiso; ₄₇kutani hinkwavo lava n'wi yingiseke va hlamala hi ku tlhariha ka yena, ni ku hlamula ka yena. ₄₈Kakuloko va n'wi vona, va hlamala ngopfu. Mana wa yena a ku eka yena: “N'wananga, u hi endlele yini leswo tano waswivo, a hi ku lava, tata wa wena na mina, hi ri ekhombyeni ngopfu?” ₄₉Yena a ku eka vona: “A mi ndzi lavela yini? Xana a mi nga swi tivi leswaku ndzi fanele ku va entirhweni wa Tatana xana?” ₅₀Kambe a va twisisanga mhaka leyi a yi vulaka. ₅₁Kutani a ngirimela na vona, a ya eNazareta, a tshama a va yingisa. Kutani mana wa yena a hlayisa timhaka leti hinkwato embilwini ya yena. ₅₂Loko a ri Yesu, a kula eku tlhariheni, ni le ku leheni, ni le tintswalweni, emahlweni ka Xikwembu ni vanhu.