LUKA 4

₁Kambe Yesu, loko a tele hi Moya lowo Kwetsima, a suka eYordani, a yisiwa hi Moya emananga. ₂Kutani a ringiwa kona hi Diyavulosi hi masiku ya mune wa makume, a nga dyi nchumu hi masiku walawo; kambe, eku heleni ka wona, a twa ndlala. ₃Kwalaho Diyavulosi a ku eka yena: “Loko u ri N'wana wa Xikwembu, u nge ribye leri ri hundzuka vuswa.” ₄Yesu a n'wi hlamula, a ku: “Ku tsariwile leswaku munhu a nga ka a nga hanyi hi vuswa ntsena, kambe u ta hanya hi marito hinkwawo ya Xikwembu.”

₅Kutani Diyavulosi a n'wi yisa entshaveni leyo leha, a n'wi kombisa kan'we ku fuma hinkwako ka misava, kutani a ku eka yena: ₆“Ndzi ta ku nyika vuhosi hinkwabyo, ni ku kwetsima ka ku fuma loku, hikuva ndzi swi nyikiwile, kambe ndzi swi nyika loyi ndzi n'wi rhandzaka. ₇Kutani sweswi, loko u ndzi khinsamela, hinkwaswo leswo swi ta va swa wena.” ₈Yesu a n'wi hlamula, a ku: “Suka eka mina Satana, hikuva ku tsariwile leswaku: ‘U ta khinsamela Hosi, Xikwembu xa wena, u tirhela xona ntsena.’ ”

₉Kutani Diyavulosi a n'wi yisa eYerusalema, a n'wi veka exihlungweni xa tempele, kutani a ku eka yena: “Loko u ri N'wana wa Xikwembu, jitama ehansi; ₁₀hikuva ku tsariwile leswaku: ‘Xikwembu xi ta ku lerisela tintsumi ta xona, ti ku hlayisa, ti ku khavutela emavokweni ya tona, ₁₁leswaku nenge wa wena wu nga tshuki wu khunguvanyeka hi ribye.’ ” ₁₂Yesu a n'wi hlamula, a ku: “Ku tsariwile leswaku: ‘U nga tshuki u ringa Hosi, Xikwembu xa wena.’ ” ₁₃Diyavulosi, kuteloko a hetile ndzingo hinkwawo, a n'wi tshika, nkarhi wun'wana wu kondza wu fika.

₁₄Yesu a tlhelela eGaleliya hi matimba ya Moya; kutani ku twakala ka yena ku tiviwa ematlhelo hinkwawo ya tiko lero. ₁₅Kutani a dyondzisa emasinagogeni ya vona, a ri karhi a dzunisiwa hi vanhu hinkwavo.

₁₆A ya ni le Nazareta, laha a nga kulela kona; kutani hi siku ra Savata, a nghena esinagogeni hi mukhuva wa yena, kutani a yimela ku hlaya. ₁₇A nyikiwa buku ya muprofeta Esaya; kuteloko a phurumule buku, a kuma mhaka leyi tsariweke, leyi nge: ₁₈“Moya wa Xikwembu wu le ka mina, hikuva xi ndzi totile, xi va xi ndzi rhuma ku byela swisiwana Evhangeli, ku horisa va timbilu leti vavisekaka; ₁₉ku byela lava bohiweke leswaku va ta tshunxiwa ni lavo fa mahlo leswaku va ta tlhela va vona, ku nyika lava xanisiwaka nkarhi wa ku tifambela, ni ku vula lembe lerinene ra Hosi.” ₂₀Kuteloko a phutsile buku, a yi nyika nandza a tshamisa; kutani hinkwavo lava nga esinagogeni va n'wi langutisisa. ₂₁Kavaloko a sungula ku va byela, a ku: “Namuntlha, rito leri ri hetisekile etindleveni ta n'wina.” ₂₂Kutani hinkwavo va n'wi yimela, va ri karhi va hlamala hi marito lamanene lama humaka enon'wini wa yena, va ku: “Xana loyi a hi n'wana Yosefa xana?” ₂₃A ku eka vona: “Kunene mi nga ndzi byela xivuriso lexi nge: ‘N'anga, tihanyise u ri wena; leswi hi swi tweke swi endliwe hi wena eKapernawume, u swi endla ni kwala, etikweni ra wena.’ ” ₂₄Kambe a ku: “Kunene, ndzi ri eka n'wina: A ku na muprofeta la amukeriwaka etikweni ra rikwavo. ₂₅Kunenenene ndzi ri eka n'wina: Vavasati va tinoni lavo tala a va ri kona etikweni ra Israele, emikarhini ya Eliya, loko tilo ri pfariwa hi malembe manharhu na ntlhanu wa tin'hweti ni n'hweti yin'we, kutani ndlala leyikulu yi va kona emisaveni hinkwayo; ₂₆kambe Eliya a nga rhumiwanga eka un'wana loko ku nga ri eka wansati wa noni wa Sarepta, etikweni ra Sidoni. ₂₇Ni va nhlokonho lavo tala a va ri kona etikweni ra Israele, emikarhini ya muprofeta Elixa, kambe a ku vanga na la basisiweke loko a nga ri Naamani wa Siriya.” ₂₈Kutani lava nga esinagogeni va tala vukari hinkwavo, loko va twa timhaka teto. ₂₉Va yima, va n'wi hlongolela ehandle ka muti, va n'wi yisa eriweni ra ntshava leyi muti wa vona ingi wu akiwe henhla ka yona, ku n'wi susumetela kona. ₃₀Kambe yena a hundza exikarhi ka vona, a tifambela.

₃₁Kutani a ngirimela eKapernawume muti wa Galeliya; kavaloko a dyondzisa vanhu hi masiku ya Savata. ₃₂Kutani va hlamala hi ku dyondzisa ka yena, hikuva rito ra yena a ri ri ni matimba.

₃₃Munhu a a ri kona esinagogeni loyi ngi a ri ni moya wa thyaka, wa demona, a huwelela hi rito lerikulu, ₃₄a ku: “Mhaka ya hina na wena hi yihi, Yesu wa Nazareta? Xana u tele ku hi lovisa? ₃₅Ndza ku tiva, u Muhlawuriwa wa Xikwembu.” Kutani Yesu a n'wi tshinya, a ku: “Miyela, u suka eka yena.” Kuteloko demona ri n'wi wisile exikarhi ka hinkwavo, ri huma eka yena, ri nga n'wi endlanga nchumu. ₃₆Kutani va hlamala hinkwavo, va vutisana, va ku: “Rito leri, hi lero yini, loko a tshinya mimoya leyo biha hi vuhosi ni matimba, kutani yi huma?” ₃₇Kwalaho xidzumo xa yena xi twakala hi matlhelo hinkwawo ya tiko lero.

₃₈Kutani a huma esinagogeni, a nghena endlwini ya Simoni; kambe mukon'wana wa Simoni a a khomiwe hi vuvabyi lebyikulu hi ku hisa ka miri, kutani va n'wi khongelela eka yena. ₃₉Kavaloko Yesu a korhama ehenhla ka yena, a tshinya vuvabyi, kutani byi n'wi tshika, a hatlisa a pfuka a va tirhela.

₄₀Loko dyambu ri perile, hinkwavo lava vabyaka hi vuvabyi byihi ni byihi, a va tisiwa eka yena, kutani a tlhandleka mavoko ya yena ehenhla ka un'wana ni un'wana, a va horisa. ₄₁Mademona ma huma eka lavo tala, ma huwelela, ma ku: “Hi wena Kriste, N'wana Xikwembu.” Kambe Yesu a ma tshinya, a nga ma pfumeleri ku vula leswaku ma n'wi tiva, leswaku hi yena Kriste.

₄₂Kuteloko ri xile, a huma, a ya emananga, kutani vunyingi byi n'wi lava; loko va n'wi kumile va n'wi sivela leswaku a nga suki eka vona. ₄₃Kambe a ku eka vona: “Ndzi fanele ku ya vula emitini yin'wana e Evhangeli ya ku fuma ka Xikwembu, hikuva ndzi rhumeriwe swona.” ₄₄Kutani a dyondzisa emasinagogeni ya Galeliya.