MALAKIYA 1

₁Hi byona vuprofeta bya rito ra Yehovha leri rhumeriweke Israele ha Malakiya:

₂“Ndzi mi rhandzile,” ku vula Yehovha; kambe mi ri: “U hi rhandzile ha yini?” ₃A ndzi ku: “Esawu a a ri makwa Yakobo!” ku vula Yehovha: “kutani, ndzi rhandze Yakobo, kasi Esawu, yena, ndzi n'wi vengile; ndzi onhe tintshava ta yena, ni ndzhaka ya yena ndzi yi nyike timhungubye ta mananga.” ₄Ni loko Edomu a nga ku: “Hi herisiwile; kambe hi ta tlhela hi pfuxa marhumbi.” Yehovha wa mavandla u ri: “Va ta aka, kambe mina ndzi ta mbundzuxa, kutani va ta vuriwa tiko ra ku biha, ni vanhu volavo Yehovha a va karihelaka hi masiku.” ₅Mahlo ya n'wina ma ta swi vona, kutani mi ta ku: “Yehovha u ta va nkulu ehenhla ka tiko ra Israele.”

₆“N'wana u chava tata wa yena, ni nandza u chava hosi ya yena. Kambe loko ndzi ri tatana, ku kwihi ku dzunisiwa ka mina xana? Ni loko ndzi ri hosi, ku kwihi ku chaviwa ka mina xana? ku vula Yehovha wa mavandla eka n'wina, vaprista, lava solaka vito ra mina. Kambe mi ri: ‘Hi sandzile vito ra wena ha yini-ke?’

₇“Mi tisa swinkwa leswo biha ealitarini ya mina, kutani mi ri: ‘Hi ku nyamise ha yini-ke?’ Hi loko mi ku: ‘Tafula ra Yehovha ra soleka.’ ₈Ni loko mi tisa xifuwo lexo fa mahlo ku endla gandzelo, xana a hi nandzu-ke? Ni loko mi tisa lexi khwitaka ni lexi vabyaka, a hi nandzu xana? Swi yise eka mufumi wa wena, xana u ta ku tsakela, kumbe a tsakisiwa hi wena xana? ku vula Yehovha wa mavandla. ₉‘Kutani sweswi, khongelani emahlweni ka Xikwembu, leswaku xi hi tsetselela!’ Mhaka leyo a yi endliwa hi n'wina. Xana u ta mi amukela xana? ku vula Yehovha wa mavandla.

₁₀“I mani exikarhi ka n'wina la nga ta pfala tinyangwa, leswaku mi nga ha tshuki mi tshivela ndzilo wa alitari ya mina ha nchumu? A ndzi tsakisiwi ha n'wina, ku vula Yehovha wa mavandla, ndzi nga ka ndzi nga amukeri gandzelo leri tisiwaka hi mavoko ya n'wina. ₁₁Hikuva ku suka eku humeni ka dyambu, ku ya fika eku peleni ka rona, vito ra mina hi lerikulu exikarhi ka matiko, ni swivandleni hinkwaswo magandzelo ma ta hisiwa, ni switlhavelo swi tiseriwa vito ra mina, ma nga magandzelo lama tengeke; hikuva vito ra mina ri ri rikulu exikarhi ka matiko, ku vula Yehovha wa mavandla. ₁₂Kambe n'wina, ma ri onha, loko mi ku: ‘Tafula ra Yehovha ri ni thyaka, ni leswi taka eka rona i swakudya leswi solekaka.’ ₁₃Kutani mi ri: ‘Languta, a hi ku karhata ka xona!’ Mi vuya mi xi sola, ku vula Yehovha wa mavandla; mi tisa lexi yiviweke, ni lexi khwitaka, ni lexi vabyaka, mi endla gandzelo ha swona! Xana ndzi ta swi amukela emavokweni ya n'wina xana? Ku vula Yehovha. ₁₄Kambe ku rhukaniwa muxisi, ku nga loko a hlambanya, a humesela Hosi xifuwo lexo biha, kasi lexa matsune xi kona entlhambini wa yena, hikuva ndzi Hosi leyikulu, ku vula Yehovha wa mavandla, kutani vito ra mina ri chaviwa exikarhi ka matiko.