MATEWU 13

₁Hi siku rero, Yesu a huma endlwini, a tshama ekusuhi ni lwandle. ₂Kutani mitshungu leyikulu yi hlengeletana eka yena; hikwalaho Yesu a nghena ebyatsweni, a tshama eka byona; ntshungu hinkwawo a wu yime eribuwini. ₃Kutani a va byela timhaka leto tala hi swifaniso, a ku: “Vonani, muhaxi u humile ku ya haxa. ₄Kakuloko a haxa, timbewu tin'wana ti wela endleleni; kutani tinyanyana ti ta, ti ta ta dya.

₅“Tindzhoho tin'wana ti wela emaribyeni, laha ku nga riki na misava yo tala, kutani ti hatlisa ti mila, hikuva ti nga ri na misava, a yi nga entanga. ₆Kutani dyambu loko ri tlhava, ti vuna, ti tshwa hi ku pfumala timitsu. ₇Tin'wanyana ti wela exikarhi ka mitwa; kutani mitwa yi kula, yi ti kama. ₈Kambe tin'wanyana ti wela emisaveni leyinene, kutani ti veka swakudya, ndzhoho yin'wana yi veka dzana, yin'wana ntlhanu wa makume na khume rin'we, yin'wana makume manharhu. ₉La nga ni tindleve ku yingisa a a yingise.”

₁₀Vadyondzisiwa va tshinela, va ku eka yena: “Xana u vulavulela yini na vona hi swifaniso?” ₁₁A va hlamula, a ku: “Hikuva n'wina mi nyikiwile ku tiva swihundla swa ku fuma ka le tilweni, kambe vona a va nyikiwanga. ₁₂Hikuva la nga na swona, u ta nyikiwa a taleriwa; kambe la nga riki na nchumu, u ta tekeriwa ni leswi a nga na swona. ₁₃Hikwalaho ndzi vulavulaka na vona hi swifaniso hileswaku, hambi va vona, va nga ka va nga vonisisi, hambi va yingisa, va nga ka va nga yingisi ni ku swi twisisa. ₁₄Kutani ku hetisekile eka vona leswi nga bvumbhiwa hi Esaya, loko a te: ‘Hi ku yingisa, mi ta yingisa, kambe mi nga ka mi nga twisisi, mi ta vona hi mahlo, kambe mi nga ka mi nga vonisisi. ₁₅Hikuva timbilu ta tiko leri ti nonile, ni tindleve ta vona va ti nonon'hwisile, ni mahlo ya vona va ma pfarile, leswaku va nga tshuki va vona hi mahlo, ni ku yingisa hi tindleve, ni ku twisisa hi timbilu, ni ku hundzuka leswaku ndzi nga ti tshuka ndzi va hanyisa.’

₁₆“Kambe loko mi ri n'wina, mahlo ya n'wina ma katekile hikuva ma vona, na tona tindleve ta n'wina, hikuva ta yingisa. ₁₇Ndzi vurisile ndzi ri eka n'wina: Vaprofeta lavo tala ni lava lulameke lavo tala, va naverile ku vona leswi mi swi vonaka, kambe a va swi vonanga; ni ku yingisa leswi mi swi yingisaka, kambe a va swi yingisanga. ₁₈Loko mi ri n'wina, yingisani timhaka ta xifaniso xa muhaxi:

₁₉“Un'wana ni un'wana loko a yingisa rito ra ku fuma, a nga ri twisisi, lowo biha a ta eka yena, a n'wi tekela leswi byariweke embilwini ya yena; hi la byariweke ekusuhi ni ndlela. ₂₀La byariweke emaribyeni, i munhu la yingisaka marito, a hatlisa a ma amukela hi ku tsaka, ₂₁kambe a nga na timitsu endzeni ka yena; wa tiya nkarhinyana ntsena, kutani loko makhombo kumbe ku xanisa swi humelela hikwalaho ka rito, a hatlisa a khunguvanyeka. ₂₂Loko a ri loyi a byariweke emitweni, i munhu la yingisaka rito, kambe a tikarhatela swilo swa misava, ni ku kanganyisiwa hi xuma; kutani swi tsondziyela rito, ri ko ri nyumba. ₂₃Kambe la byariweke emisaveni leyinene, i munhu la yingisaka rito a ri twisisa; kutani a veka tindzhoho, yin'wana yi veleka dzana, yin'wana ntlhanu wa makume na khume rin'we, yin'wana makume manharhu.”

₂₄Yesu a va vekela xifaniso xin'wana, a ku: “Ku fuma ka le tilweni ku fana ni munhu la byaleke mbewu leyinene ensin'wini ya yena. ₂₅Kutani loko vanhu va etlele, ku ta nala wa yena, a ta byala mfava emaveleni, a tifambela. ₂₆Kuteloko mavele ma tlhavile, ri ri khava, na wona mfava wu vonaka. ₂₇Kutani malandza ya n'wini wa yindlu ma ta ma ku eka yena: ‘Hosi, a hi ku u byarile mbewu leyinene ensin'wini ya wena; xana mfava lowu wu pfa kwihi-ke?’ ₂₈A ku eka vona: ‘I ku endla ka nala.’ Malandza ma ku eka yena: ‘A ku swi rhandzi leswaku hi ya tsuvula mfava-ke?’ ₂₉A ku eka vona: ‘E-e, kumbexana loko mi ya tsuvula mfava, mi nga tsuvula ni mavele: ₃₀Swi tshikeni ha swimbirhi, swi kula kun'we, ku kondza ku fika ku tshovela! Hilaha ndzi nga ta ku eka vatshoveri: Rhangani hi mfava, mi tsuvula, mi wu boha hi tinyandza, mi hisa, kambe mavele, mi ma hlengeleta exivuyeni xa mina.’ ”

₃₁Kutani a va vekela xifaniso xin'wana, a ku: “Ku fuma ka matilo ku fana ni ndzhoho ya sinapi yoleyo munhu a yi tekeke, a ya yi byala ensin'wini ya yena. ₃₂Kunene yi ri yona leyitsongo eka timbewu hinkwato kambe loko yi mirile, yi tlula matsavu hinkwawo, yi hundzuka murhi lowukulu, kutani tinyanyana ta le henhla ti ta aka emarhavini ya wona.”

₃₃A va byela xifaniso xin'wana, a ku: “Ku fuma ka matilo ku fana ni comela lexi wansati a xi tekeke, a xi fihla mapeni ya mipimo minharhu, ma ko ma kukumuka hinkwawo.”

₃₄Timhaka teto hinkwato Yesu a byela ntshungu hi swifaniso, a nga vulavuri na vona hi swimbe, ₃₅leswaku ku ta endleka rito ra Muprofeta la nga te: “Ndzi ta ahlamisa nomu wa mina hi swifaniso ndzi xaxameta ni timhaka leti ngi ti fihliwile ka ha ri mpfhuka misava yi vumbiwa.”

₃₆Kuteloko Yesu a tlherisile ntshungu, a nghene endlwini, vadyondzisiwa va yena va ta eka yena, va ku: “Hi hlamusele xifaniso xa mfava wa le nsin'wini.” ₃₇Kutani a va hlamula, a ku:

₃₈“La byaleke mbewu leyinene, i N'wana wa Munhu; nsimu, i misava; mbewu leyinene, i vana va ku fuma; mfava i vana va lowo biha. ₃₉Nala la byaleke mfava, i Diyavulosi; ku tshovela, i makumu ya mikarhi leyi; vatshoveri, vona, i tintsumi. ₄₀Kukotisa loko mfava wu tsuvuriwa, wu ya hisiwa endzilweni swi ta va sweswo emakun'wini ya mikarhi leyi. ₄₁N'wana wa Munhu u ta rhuma tintsumi ta yena, ti ta humesa ehandle ka ku fuma ka yena vakhunguvanyisi hinkwavo, ni lava endlaka leswo biha. ₄₂Ti ta va cukumeta ekheleni ra ndzilo, laha mikosi yi nga ta va kona, ni ku getsela ka meno. ₄₃Enkarhini wolowo lavo lulama va ta hatima kukotisa dyambu eku fumeni ka Tata wa vona. La nga ni tindleve ku yingisa, a a yingise.

₄₄“Kambe ku fuma ka matilo ku fana ni xuma lexi fihliweke ensin'wini; ku nga te loko munhu a xi kumile, a xi fihla, kutani, eku tsakeni ka yena, a xavisa swilo swa yena hinkwaswo, a tixavela nsimu yoleyo. ₄₅Ku fuma ka le tilweni kukotisa muxavi la lavaka tidayimani letinene; ₄₆kutani loko a kumile dayimani yin'wana ya nxavo lowukulu, a ya xavisa swilo hinkwaswo leswi a nga na swona, a tixavela yona.

₄₇“Kambe ku fuma ka le tilweni ku kotisa nkukuto lowu petiweke elwandle, kutani wu phasa swilo swa tinxakaxaka; ₄₈loko wu tele va wu kokela eribuwini, va tshamisa, va hlengeleta leswinene eswibyeni swa vona, va cukumeta leswo biha. ₄₉Swi ta va tano emakun'wini ya mikarhi leyi; tintsumi ti ta huma, ti hlawula lavo homboloka eka lava lulameke, ₅₀ti va cukumeta ekheleni ra ndzilo laha mikosi yi nga ta va kona, ni ku getsela ka meno.”

₅₁Yesu a ku eka vona: “Xana ma ti twa timhaka leti hinkwato xana?” Va ku eka yena: “Ina, Hosi.” ₅₂Kutani a ku eka vona: “Hilaha ndzi nge: Mutsari un'wana ni un'wana la dyondzisiweke hi ta ku fuma ka le tilweni, u kotisa munhu la nga n'wini wa yindlu la humesaka evukosini bya yena swilo leswintshwa ni leswa khale.”

₅₃Kuteloko Yesu a hetile swifaniso sweswo, a suka kwalaho; ₅₄kuteloko a fikile emutini wa rikwavo, a dyondzisa vanhu esinagogeni ya vona va va va hlamala, va ku: “Xana loyi u byi kume kwihi vutlhari lebyonghasi, ni mahlori layonghasi? ₅₅Yeloyi a hi n'wana wa muvatli-ke? A hi ku mana wa yena hi loyi va nge i Mariya; ni vamakwavo, xana a hi Yakobo, na Yosefa, na Simoni, na Yuda-ke? ₅₆Ni vamakwavo va xisati, a va kona laha eka hina hinkwavo xana? Kasi leswi hinkwaswo, swi n'wi humelerise ku yini-ke?” ₅₇Kutani va khunguvanyeka eka yena. Kambe Yesu a ku eka vona: “Muprofeta a nga soriwi, loko ku nga ri etikweni ra yena, ni le ndlwini ya yena.” ₅₈Kutani kwalaho a nga endlanga mahlori yo tala, hi leswi va nga pfumelangiki eka yena.