Mikateko leyi nga ta tela Yerusalema.
1Emikarhini ya makumu, ntshava ya yindlu ya Yehovha yi ta va yi yimisiwile ehenhla ka tintshava, yi wungamela switsunga, kutani matiko ma ta hangalakela kona. 2Matiko layo tala ma ta ta kona, ma ku: “A hi yeni, hi tlhandlukela entshaveni ya Yehovha, endlwini ya Xikwembu xa Yakobo, a ta hi dyondzisa tindlela ta yena, kutani hi famba hi tindlela ta yena.” Hikuva nawu wu ta huma eSiyoni, ni rito ra Yehovha ri ta huma eYerusalema. 3Yehovha u ta avanyisa matiko layo tala, a tshinya tinxaka leta matimba ta le kule. Hi mabanga ya vona va ta fula swikomu, hi mafumu ya vona va fula tihwevo, tiko rin'wana a ri nga ha pfukeli rin'wana hi tlhari, a va nga ha dyondzi nyimpi. 4Va ta tshama un'wana ni un'wana ehansi ka nkuwa, ni le hansi ka vhinya ya yena, ku nga ri na loyi a va pfuxaka; hikuva nomu wa Yehovha wa tinyimpi wu vurisile. 5Vamatiko hinkwawo va famba un'wana ni un'wana hi vito ra xikwembu xa yena, kambe hina, hi famba hi vito ra Yehovha, Xikwembu xa hina, hi mikarhi ni mikarhi.
6Hi siku lero, ku vula Yehovha, ndzi ta hlengeleta leswi khwitaka ni leswi hlongoriweke, ni lexi ndzi xi endleke hi ku nonon'hwa. 7Lexi khwitaka, ndzi ta xi endla xisalela, ni lexi tshikiweke ndzi xi endla tiko lera matimba, kutani Yehovha u ta va fuma entshaveni ya Siyoni hilaha ku nga heriki. 8Loko u ri wena, nhlohlorhi ya ntlhambi, xitsunga xa n'wana Siyoni, eka wena ku ta ta, ku va ku fika vuhosi byo sungula, ku nga ku fuma ka n'wana wa Yerusalema.
9Kasi hi leswo yini loko u huwelela hi matimba? Xana a ka ha ri na hosi, kumbe mutsundzuxi wa wena u lovile, leswi ku vaviseka ku ku khomeke hi matimba, kukotisa wansati loko a veleka. 10Khuna, u twa ku vaviseka, n'wana Siyoni, kukotisa muveleki; hikuva u ta huma emutini, u ta tshama enhoveni, u ya fika ni le Babilona. Hi kona u nga ta tshunxiwa, Yehovha u ta ku kutsula emavokweni ya valala va wena. 11Sweswi matiko layo tala ma ku hlengeletanele, ma ku: “U sandziwile, mahlo ya hina ma ta vona khombo ra Siyoni!” 12Kambe a ma tivi mianakanyo ya Yehovha, a ma twisisi ku tsundzuka ka yena; hikuva u ma hlengeleta kukotisa tinyandza exivuyeni. 13Pfuka u hula, n'wana Siyoni, hikuva ndzi ta ku endlela rimhondzo ra nsimbhi, ni min'wala ya koporo, u ta fayetela matiko layo tala; ndzi ta hlawulela Yehovha rifuwo ra wona, ni vukosi bya wona, ndzi hlawulela hosi ya misava hinkwayo.
