1Lava nga tiyisa papila hi ku tiyisa ka vona, i Nehemiya, mufumi n'wana Hakaliya, na Sedekiyasi, 2Seraya, Azariya, Yeremiya, 3Paxahuru Amariya, Malikiya, 4Hatuxi, Xebaniya, Maluka, 5Harimi, Meremoto, Obadiya, 6Daniele, Ginetoni, Baruku, 7Mexulama, Abiya, Miyamini, 8Maaziya, Biligayi, Xemaya. Vona a va ri vaprista.
9Ni Valevhi, Yexuwa, n'wana Azaniya, na Binuyi, exikarhi ka vana va Henadada, Kadimiele. 10Ni vamakwavo va vona: Xebaniya, Hodiya, Kelita, Pelaya, Hanana, 11Mikaya Rehobo, Haxabiya, 12Zakuru, Xerebiya, Xebaniya, 13Hodiya, Bani, Beninu.
14Vakulukumba va tiko: Paroxi Pahata-Mowabu, Elamu, Zatu, Bani, 15Buni, Azigadi, Bebayi, 16Adoniya, Bigivhayi, Adina, 17Atere, Hezekiya, Azuri, 18Hodiya, Haxumu, Besayi, 19Harifi, Anatoto, Nebayi, 20Magipiyaxi, Mexulama, Heziri, 21Mexezabele, Sadoki, Yaduwa, 22Pelatiya, Hanana, Anaya, 23Hoxeya Hananiya, Haxuba, 24Halohexi, Pileha, Xobeke, 25Rehumi, Haxabina, Maaseya, 26Ahiya, Hanana, Anani, 27Maluka, Harimi, Baana.
28Van'wanyana va tiko, ni vaprista ni Valevhi, ni valanguteri va tinyangwa, ni vayimbeleri, ni Vanetinimi ni hinkwavo lava ngi va tihlawurile eka matiko lama akeke ekusuhi, leswaku va namarhela milawu ya Xikwembu va ri ni vasati va vona, ni vana va vona va xinuna ni va xisati va nga hinkwavo lava ngi va ri ni ku tiva ni ku twisisa, 29va hlangana ni vamakwavo va tihosana, va nghena na vona eku hlambanyeni ni le ku tiyiseni, va ku va ta famba emilawini ya Xikwembu, leyi va yi nyikiweke hi Muxe, nandza wa Xikwembu, va ta hlayisa ku lerisa hinkwako ka Yehovha, hosi ya hina ni marito ya yena ni milawu ya yena, va ta famba ha swona. 30Hi tiboha leswaku hi nga ka hi nga nyiki vamatiko vana va hina, ni loko ku ri ku tekela vana va hina vana va xisati va vona, 31kambe hi ku: “Loko va ri vanhu va tiko lava tisaka xuma ni swakudya swa tinxaka hinkwato hi siku ra Savata ku xavisa ha swona, hi nga ka hi nga xavi eka vona hi siku ra Savata, hambi ma ri masiku man'wana lama hlawuriweke; kambe hi ta va ni ku tshunxa hi lembe ra ntlhanu na mambirhi, hi ta tshikela un'wana ni un'wana milandzu ya yena.
32“Kambe hi tivekela milawu, hi tiboha leswaku hi ta humesela yindlu ya Xikwembu xa hina ku avanyisa ka vunharhu ka xikele, hi lembe rin'wana ni rin'wana, 33xi va xa swinkwa swa xikombiso, ni nyiko leyi nga heriki, ni tiholokosta ta masiku, ni Tisavata, ni swa tin'weti loko ti tshama ni swa mikhuvo, ni swa swilo swo kwetsima, ni swa magandzelo ya swidyoho lama humeseriwaka Vaisraele, ni swa mitirho hinkwayo ya yindlu ya Xikwembu xa hina. 34Hi hlahluva hi vuhlolotwana emhakeni ya tihunyi leti (hina, ni vaprista, ni Valevhi, ni van'wana va tiko, hi ku ya hi tindlu ta vatata wa hina) hi fanelaka ku ti humesela yindlu ya Xikwembu xa hina hi mikarhi leyi vekiweke, hi malembe hinkwawo, va ta tshivela ndzilo ha tona ealitarini ya Yehovha, Xikwembu xa hina, hilaha ku tsariweke hakona enawini; 35ni ku neha endlwini ya Yehovha swirhangana swa tiko ra hina, ni swirhangana swa mihandzu hinkwayo ya mirhi hinkwayo hi lembe rin'wana ni rin'wana, 36ni mativula ya vana va hina ni ya swifuwo swa hina, hilaha ku tsariweke hakona emilawini, ni ku tisa endlwini ya Xikwembu xa hina, eka vaprista lava tirhaka mitirho endlwini ya Xikwembu xa hina, mativula ya tihomu ta hina ni ya tinyimpfu ta hina. 37Hi ta tisa leswi hlawuriweke swa mapa ya hina, ni swa tinyiko ta hina, ni swa mihandzu ya mirhi hinkwayo, ni swa vhinyo leyintshwa, ni mafurha, hi swi nehela vaprista emakamareni ya yindlu ya Xikwembu xa hina, swin'we ni ku pambula ka khume ka swa misava, swi nga swa Valevhi; hikuva vona Valevhi va ta teka ku pambula ka khume eka swona emitini hinkwayo leyi nga ni masimu ya tiko ra hina; 38muprista, n'wana Aroni, u ta va ni Valevhi siku va tekaka ku pambula ka khume, kutani Valevhi va ta neha ku pambula ka khume eka swa vukhume endlwini ya Xikwembu xa hina, emakamareni ya yindlu ya vuhlayiselo. 39Vana va Israele ni vana Valevhi va ta neha nhlengo lowu pamburiweke ka koro ni ka vhinyo leyintshwa, ni ka mafurha emakamareni, laha mitirho ya magandzelo yi nga kona, ni laha ku tshamaka vaprista lava tirhaka mitirho, ni valanguteri va tinyangwa ni vayimbeleri, kutani hi nga fularheli yindlu ya Xikwembu xa hina.”
