NEHEMIYA 12

₁Vaprista ni Valevhi lava nga vuya na Zerubabele, n'wana Salatiele na Yexuwa: Seraya, Yeremiya, Ezra, ₂Amariya, Maluka, Hatuxi, ₃Xekaniya, Rehumi, Meremoto, ₄Ido, Ginetoyi, Abiya, ₅Miyamini, Maadiya, Biliga, ₆Xemaya, Yoyaribi, Yedaya, ₇Salu, Amoko, Hilkiya, Yedaya; lava a ti ri tihosana ta vaprista ni ta vamakwavo emasikwini ya Yexuwa.

₈Ni Valevhi: Yexuwa, Binuyi, Kadimiele, Xerebiya, Yuda, Mataniya; yena ni vamakwavo a va fambisa tinsimu ta ku dzunisa. ₉Na Bakibukiya na Uno, vamakwavo; a va hlamulana na vona. ₁₀Yexuwa a veleka Yoyakimi, Yoyakimi a veleka Eliyaxibi, Eliyaxibi a veleka Yoyada, ₁₁Yoyada a veleka Yonatani, Yonatani a veleka Yaduwa.

₁₂Emasikwini ya Yoyakimi, vaprista, vini va tindlu, a a ri: wa Seraya, Meraya; wa Yeremiya, Hananiya; ₁₃wa Ezra, Mexulama; wa Amariya, Yohanani; ₁₄wa Maluki, Yonatani; wa Xebaniya, Yosefa; ₁₅wa Harimi, Adina; wa Merayoto, Helikayi; ₁₆wa Ido, Zakariya; wa Ginetoni, Mexulama; ₁₇wa Abiya, Zikri; wa Miniyamini; wa Mowadiya Pilitayi; ₁₈wa Biliga, Xamuwa; wa Xemaya Yonatani, ₁₉wa Yoyaribi, Matenayi; wa Yedaya, Uzi; ₂₀wa Salayi, Kalayi; wa Amoko, Ebere; ₂₁wa Hilkiya, Haxabiya; wa Yedaya, Netanele.

₂₂Loko va ri Valevhi, tihosana ta tindlu ti tsariwile enkarhini wa Eliyaxibi, ni wa Yoyada, ni wa Yohanani ni wa Yaduwa; ni vaprista va tsariwile eku fumeni ka Dariyosi Muperesi.

₂₃Vana va Levhi, tihosana ta tindlu ti tsariwile ebukwini ya Tikronika ku ta fika enkarhini wa Yohanani, n'wana Eliyaxibi. ₂₄Tihosana ta Valevhi a a ri: Haxabiya, na Xerebiya, na Yexuwa, n'wana Kadimiele, ni vamakwavo lava langutaneke na vona, a va ri ni mfanelo ya ku dzunisa Yehovha, hilaha Davhida, munhu wa Xikwembu, a leriseke hakona; ntlawa wu ri karhi wu hlamulana ni ntlawakulobye. ₂₅Mataniya, na Bakibukiya, na Obadiya, na Mexulama, na Talimoni, na Akubu, a va ri valanguteri va tinyangwa ta tindlu ta xuma leti nga etinyangweni. ₂₆Lava a va hanya emikarhini ra Yoyakimi n'wana Yexuwa, n'wana Yosadaka, ni le mikarhini ya Nehemiya, mufumi, ni ya muprista, Ezra, mutsari.

₂₇Enkarhini wa ku khangula rirhangu ra Yerusalema, Valevhi va vitaniwa emitini hinkwayo ya vona, va ku va ta eYerusalema, va ta khangula rirhangu hi ku tsaka, ni tinsimu, ni ku yimbelela hi swiphambati, ni magubu, ni tiharipa. ₂₈Vana va vayimbeleri, na vona, va hlengeletana ematikweni lama rhendzelekaka Yerusalema, exikarhi, ni le mitini ya Vanetofati, ₂₉na Beta-Giligala, ni tiko ra Geba, ni ra Azimavhete, hikuva vayimbeleri a va tiakele miti ematlhelweni ya Yerusalema. ₃₀Vaprista ni Valevhi va tibasisa ngopfu, va basisa tiko ni nyangwa ni rirhangu.

₃₁Kutani ndzi khandziyisa tihosana ta va Yuda ehenhla ka rirhangu, ndzi veka mitlawa mimbirhi leyikulu leyi yimbelelaka va yimile hi ku longoloka, wun'wana wu famba ehenhla ka rirhangu hitlhelo ra xinene, wu langutile enyangweni ya Vulongo; ₃₂va landziwa hi Hoxaya ni ku pambula kun'wana ka tihosana ta Yuda, ₃₃na Azariya, na Ezra, na Mexulama, ₃₄na Yuda, na Benjamini, na Xemaya, na Yeremiya, ₃₅ni vana va vaprista lava tameleke tinanga; Zakariya, n'wana Yonatani, n'wana Xemaya, n'wana Mataniya, n'wana Mikaya, n'wana Zakuru, n'wana Asafa, ₃₆ni vamakwavo a nga Xemaya, Asarele, Milalayi, Gilalayi, Maayi, Netanele, Yuda, Hanani, va ri ni timbila ta Davhida, munhu wa Xikwembu; mutsari Ezra, yena a va rhangela emahlweni. ₃₇Kuteloko va fikile enyangweni ya Tiva, ku lavana ni laha va nga kona, va khandziya hi swikhandziyo swa muti wa Davhida hi ndzulamo wa rirhangu leri ungameleke yindlu ya Davhida, ku ya fika enyangweni ya Mati evuxeni.

₃₈Ntlawa wa vumbirhi lowu yimbelaka wu famba hitlhelo rin'wana, mina ndzi landza endzhaku, ndzi ri ni hafu ya tiko, hi famba ehenhla ka rirhangu leri ungamelaka khokholo ra switofu, ku fika erirhangwini lero anama, ₃₉ni le henhla ka nyangwa ya Efrayimi, ni le nyangweni ya Khale, ni le nyangweni ya Tinhlampfi, ni le khokholweni ra Hananele, ni le khokholweni ra Mea, ku ya fika eNyangweni ya Tinyimpfu, kutani va yima enyangweni ya Khotso. ₄₀Mitlawa mimbirhi ya vayimbeleri yi yima emahlweni ka yindlu ya Xikwembu, na mina ndzi yima sweswo, ndzi ri ni ku avanyisa kun'wana ka tihosana. ₄₁Ni vaprista Eliyakimi, Maaseya, Miniyamini, Mikaya, Eli-Howenayi, Zakariya, Hananiya, va tamele tinanga; ₄₂Maaseya, Xemaya, Eliyazara, Uzi, Yohanani, Malikiya, Elamu, na Ezere, vayimbeleri va yimbelela, va fambisiwa hi Yizirahiya. ₄₃Siku rero Vaisraele va tlhava magandzelo lamakulu va tsaka, hikuva Xikwembu a xi va tsakisile hi ku tsaka lokukulu; swi tsandza ni vavasati ni vana a va tsaka; ku tsaka ka Yerusalema, ku twakala kule.

₄₄Siku lero ku vekiwa vakamberi ku kambela makamara ya vuveko bya mihlengo, ni bya swirhangana, ni bya ku pambula ka hi khume va ta hlayisela kona mihlengo leyi humaka emitini ya matlhelo, swi ri leswi averiwaka eka vaprista ni Valevhi hi nawu, hikuva ku tsaka a ku ri kona eka Yuda, hikuva vaprista ni Valevhi va tlherile va yima emahlweni ka Xikwembu, ₄₅vona va hlayisa hinkwaswo leswi nga swa ntirho wa Xikwembu xa vona, ni leswi nga swa ku tibasisa, na vona vayimbeleri, ni valanguteri va nyangwa va endla sweswo, hilaha ku lerisiweke hakona hi Davhida na Solomoni, n'wana wa yena. ₄₆Hikuva emikarhini ya Davhida na Asafa, eku sunguleni a ku ri ni mufambisi wa vayimbeleri, ni tinsimu ta ku dzunisa ni ku khensa Xikwembu. ₄₇Emikarhini ya Zerubabele ni le mikarhini ya Nehemiya, Vaisraele hinkwavo a va humesa mihlengo ya vayimbeleri ni ya valanguteri va tinyangwa hilaha ku faneleke ku humesiwa hakona hi siku rin'wana ni rin'wana swilo leswi hlawuriweke, swi nyikiwa Valevhi; Valevhi, vona, va nyika vana va Aroni.