Ta milawu ya magovela ni ya ku famba.
1Yehovha a byela Muxe na Aroni, a ku: 2“Vana va Israele va ta gova un'wana ni un'wana ekusuhi ni mfungho wa yena, ni le hansi ka nceka wa tindlu ta vatata wa vona; va ta gova va langutene ni tabernakela ya nhlengeletano, va wu rhendzele hinkwako.
3“Emahlweni, hitlhelo ra vuxa, ku ta tlhomiwa mfungho wa nxaxa wa Yuda hi mitlawa ya vona; hosi ya vana va Yuda, Nahaxoni n'wana Aminadaba, ni vandla ra yena, 4ni vanhu va ntsengo wa yena va 74 600. 5Lava nga ta gova etsheveni ra yena, i nyimba ya Isakara, hosi ya vana va Isakara, Netanele, n'wana Suwara, ni vandla ra yena, 6ni vanhu va ntsengo wa yena va 54 400; 7ni nyimba ya Zebuloni, hosi ya vana va Zebuloni, Eliyabu, n'wana Heloni ni vandla ra yena, 8ni vanhu va ntsengo wa yena va 57 400. 9Ntsengo hinkwawo wa vavanuna va mixaxa ya Yuda, va ri 186 400, hi mavandla ya vona; hi vona lava nga ta rhanga ku suka.
10“Edzongeni, mfungho wa mixaxa ya Rhuveni hi mitlawa ya vona; hosi ya vana va Rhuveni, Elizuri, n'wana Xedewuru, ni vandla ra yena, 11ni vanhu va ntsengo wa yena va 46 500. 12Lava nga ta gova etsheveni ra yena, i nyimba ya Simiyoni; hosi ya vana va Simiyoni, Xelumiele, n'wana Suri-Xadayi, ni vandla ra yena, 13ni vanhu va ntsengo wa yena va 59 300; 14ni nyimba ya Gadi, hosi ya vana va Gadi, Eliyasafa, n'wana Duwele, ni vandla ra yena, 15ni vanhu va ntsengo wa yena va 45 650. 16Ntsengo hinkwawo wa vavanuna va mixaxa ya Rhuveni, va ri 151 450, hi mitlawa ya vona. Va ta suka va ri va vumbirhi.
17“Kutani tabernakela ya nhlengeletano yi ta suka, nxaxa wa Valevhi wu va xikarhi ka mixaxa; va ta suka hilaha va govaka hakona; un'wana ni un'wana exivandleni xa yena, hi mifungho ya vona.
18“Evupeladyambu, mfungho wa mixaxa ya Efrayimi hi mitlawa ya vona; hosi ya vana va Efrayimi, Elixama, n'wana Amihudi, ni vandla ra yena, 19ni vanhu va ntsengo wa yena va 40 500. 20Ekusuhi na yena, nyimba ya Manase; hosi ya vana va Manase, Gamaliele, n'wana Pedasuru, ni vandla ra yena, 21ni vanhu va ntsengo wa yena va 32 200; 22ni nyimba ya Benjamini, hosi ya vana va Benjamini, Abidana, n'wana Gidiyoni, ni vandla ra yena, 23ni vanhu va ntsengo wa yena va 35 400. 24Ntsengo hinkwawo wa vavanuna va mixaxa ya Efrayimi, va ri 108 100, hi mitlawa ya vona. Va ta suka va ri va vunharhu.
25“En'walungwini, mfungho wa mixaxa ya Dani, hi mitlawa ya vona; hosi ya vana va Dani, Ahiezere, n'wana Amixadayi, ni vandla ra yena, 26ni vanhu va ntsengo wa yena va 62 700. 27Lava nga ta gova ekusuhi na vona, i nyimba ya Asere hosi ya vana va Asere, Pagiele, n'wana Okirani ni vandla ra yena, 28ni vanhu va ntsengo wa yena va 41 500; 29ni nyimba ya Neftali; hosi ya vana va Neftali, Ahira, n'wana Enana, ni vandla ra yena, 30ni vanhu va ntsengo wa yena va 53 400. 31Ntsengo hinkwawo wa vavanuna va mixaxa ya Dani, va ri 157 600. Va ta suka va ri ve ndzhaku, hi mifungho ya vona.”
32Hi vona vana va Israele lava tsariweke hi tinyimba ta vona. Ntsengo hinkwawo wa mixaxa hi mitlawa ya vona a va ri va 603 550. 33Kambe Valevhi a va hlayiwanga exikarhi ka vana va Israele, hikuva Yehovha a lerisile Muxe hi sweswo. 34Vana va Israele va endla hinkwaswo hilaha Yehovha a leriseke Muxe hakona. A va govisa sweswo hi mifungho ya vona, kambe a va suka hi mukhuva wolowo, un'wana ni un'wana hi yindlu ya yena ni nyimba ya yena.
