Ta tinyoka leti hisaka.
1Hosi ya Aradi, wa Kanana, la akeke edzongeni, kuteloko yi twile leswaku Israele a ta hi ndlela ya Atarimi, a ya lwa na Israele, a khoma vanhu. 2Israele a hlambanya eka Yehovha, a ku: “Loko u neha tiko leri emavokweni ya mina, ndzi ta lovisa miti ya rona, ndzi yi yirisa.” 3Yehovha a yingisa rito ra Israele, kutani a va nyiketa Vakanana ni miti ya vona va va lovisa, va va heta; kutani va thya xivandla lexi vito ra Horma (ku yila).
4Kutani va suka entshaveni ya Hori hi ndlela ya Lwandle ro Tshwuka, va ya rhendzeleka tiko ra Edomu. Kambe tiko ri hela timbilu endleleni leyi. 5Tiko ri dzumadzumela Xikwembu na Muxe, ri ku: “Mi hi humesele yini eEgipta leswaku hi ta fa emananga? Hikuva a ku na vuswa a ku na mati; timbilu ta hina ti nyenya swakudya leswi sandzekaka leswi.”
6Yehovha a rhumela tiko tinyoka leti hisaka, ti va luma; kutani vanhu lavo tala va fa eIsraeleni. 7Kavaloko tiko ri ta eka Muxe, ri ku: “Hi dyohile hikuva hi dzumadzumele Yehovha na wena; hi khongelele eka Yehovha leswaku a hlongola tinyoka ekule na hina.” Kutani Muxe a khongelela tiko. 8Yehovha a ku eka Muxe: “Tiendlele nyoka leyi hisaka u yi hayeka emhandzeni; leswaku, mani na mani la lumiweke, loko a languta nyoka, a ta hanya.” 9Kutani Muxe a endla nyoka ya koporo a yi hayeka emhandzeni kutani kuteloko munhu a lumiwile hi nyoka, a a languta nyoka ya koporo, a hanya.
10Kutani vana va Israele va suka, va ya dzima mixaxa eOboto. 11Kutani va suka eOboto, va ya dzima mixaxa erhumbini ra Abarimi, emananga la languteneke na Mowabu, tlhelo ra vuxa. 12Kutani va suka kona, va ya gova enkoveni wa Zarede. 13Va suka kona, kutani va ya gova entlhandlukweni wa Arinoni, lowu nga emananga, lowu humaka etikweni ra Vaamori; hikuva nambu wa Arinoni i ndzilakana wa Mowabu, exikarhi ka Mowabu ni Vaamori. 14Hikwalaho ku vuriwile ebukwini ya Mivango ya Yehovha: “Vhahebe lowu nge ka Sufa, ni mikova ya Arinoni, 15ni ku rhelela ka mikova loku kongomaka etlhelo ra Ara, ku fika endzilakaneni wa Mowabu.”
16Loko va suka kona, va ya eswihlobyeni swa Bera. Hilaha Yehovha a nga ku eka Muxe: “Hlengeleta tiko, ndzi ta va nyika mati.” 17Kavaloko Israele a yimbelela risimu leri:
18“Pfelela xihlovo! Mi xi yimbelela!
Xihlovo lexi tihosi ti xi celeke;
Lexi vakulu va tiko va xi celeke
Hi tinhonga ta vona ta vuhosi.”
19Loko va suka emananga, va ya eMatana; kutani va suka eMatana, va ya eNahaliele, va suka eNahaliele, va ya eBamoto; 20va suka eBamoto, va ya enkoveni lowu nga emasin'wini ya Mowabu, ehenhla ka Pisga, tlhelo ra mananga.
Ta ku hluriwa ka Vaamori.
21Kutani Israele a rhuma tintsumi eka Sihoni, hosi ya Vaamori, ti ku eka yena: 22“Ndzi pfumelele ku tsemakanya etikweni ra wena; hi nga ka hi nga hambukeli emasin'wini, hambi evhinyeni hi nga ka hi nga nwi mati ya swihlovo; hi ta famba hi gondzo, hi ko hi huma etikweni ra wena.” 23Sihoni a nga pfumelelanga Israele ku tsemakanya etikweni ra yena; kutani Sihoni a hlengeleta tiko ra yena hinkwaro, a huma ku ya hlangana na Israele emananga, a fika eYahasi, kutani a lwa na Israele. 24Israele a n'wi heta hi vukari bya tlhari, kutani a teka tiko ra yena ku suka eArinoni, ku ya fika eYaboko, ku ya fika ni ka vana va Amoni; hikuva ndzilakana wa vana va Amoni a wu tiyile. 25Israele a teka miti leyi hinkwayo, kutani Israele a aka emitini hinkwayo ya Vaamori, wu nga Hexiboni ni le mitini hinkwayo leyi nga ehansi ka wona. 26Hikuva Hexiboni a wu ri ntsindza wa Sihoni, hosi ya Vaamori, la nga lwa ni hosi ya Mowabu leyi ngi yi ri kona emahlweni, kutani a yi tekela tiko hinkwaro ku fika eArinoni.
27Hikwalaho vayimbeleri va ku:
“Tanani eHexiboni!
Muti wa Sihoni a wu akiwe ni ku tiyisiwa!
28Hikuva ndzilo wu humile eHexiboni,
Langavi ri humile emutini wa Sihoni;
Ri hisile Ara-Mowabu,
Ni vini va tintshava ta Arinoni.
29Khombo ri na wena Mowabu!
U lovile, tiko ra Kemoxi!
Ri nyiketile vana va rona eku balekeni,
Ni vanhwanyana va rona va va makhumbi
ya Sihoni, hosi ya Vaamori.
30Hi va copetele hi miseve,
Ku suka eHexiboni, ku fika eDiboni,
Hinkwaswo swi herisiwile,
Hi hlaserile ku ya fika eNofaka;
Ndzilo wu ya fika eMedeba.”
31Israele a aka etikweni ra Vaamori, 32kutani Muxe a rhuma tintsumi ku ya kamba Yazere. Va teka miti leyi nga ehansi ka wona, kutani va hlongola Vaamori lava akeke eka wona. 33Kutani va hundzuka, va khandziya hitlhelo ra Baxani. Kutani Ogo, hosi ya Baxani, a huma ku ya hlangana na vona eEdreyi, a ri ni tiko ra yena hinkwaro, a lava ku lwa na vona. 34Kutani Yehovha a ku eka Muxe: “U nga n'wi chavi, hikuva ndzi n'wi nyiketile emavokweni ya wena, yena ni vanhu va yena hinkwavo, ni tiko ra yena; u ta n'wi endla kukotisa leswi u nga swi endlela Sihoni, hosi ya Vaamori, la akeke eHexiboni.” 35Kutani va lwa na yena, va n'wi hlula ni vana va yena, ni tiko ra yena hinkwaro, ku nga ponanga na un'we; kutani va teka tiko ra yena.
