TINHLAYO 25

₁Israele a a tshamile Xitimi, kutani tiko ri sungula ku tinyiketa vuoswi ni vanhwanyana va Mowabu. ₂Va vitana tiko emagandzelweni ya swikwembu swa vona, kutani tiko ri dya, ri khinsama emahlweni ka swikwembu swa vona. ₃Israele a namarhela Baala-Peyori, kutani vukari bya Yehovha byi pfurhela Israele. ₄Kavaloko Yehovha a ku eka Muxe: “Vitana tihosi hinkwato ta tiko, u hayeka swidyohi emahlweni ka Yehovha emun'wini, kutani ku pfurha ka vukari bya Yehovha ku ta sukela Israele.” ₅Muxe a ku eka vaavanyisi va Israele: “Dlayani vanhu hinkwavo lava namarheleke Baala-Peyori.”

₆Kavaloko munhu wa vana Vaisraele a ta a tisa eka vamakwavo wansati wa Midiyani, Muxe, ni nhlengeletano hinkwayo ya vana va Israele va n'wi vona, loko va ri karhi va rila enyangweni ya tabernakela ya nhlengeletano. ₇Kuteloko Finiyasi, n'wana Eliyazara, n'wana Aroni, muprista, a vona sweswo, a suka enhlengeletanweni, a teke tlhari evokweni ra yena, ₈a landza munhu wa Israele entsongeni wa yena, kutani a va tlhava havambirhi makhwiri, yena Muisraele, na yena wansati loyi. Kutani ntungu wu hlela exikarhi ka vana va Israele. ₉Lava nga fa hi ntungu lowu a va ri vanhu va 24 000.

₁₀Kutani Yehovha a byela Muxe, a ku: ₁₁“Finiyasi, n'wana Eliyazara, n'wana Aroni, muprista, u susile vukari bya mina ehenhla ka vana va Israele, hikuva a a ri ni rilondzo ra mina exikarhi ka vona; kutani a ndzi lovisanga vana va Israele evukarini bya mina. ₁₂Hikwalaho u ta n'wi byela leswaku ndzi endla na yena ntwanano wa ku rhula, ₁₃wu ta va eka yena ni ka vatukulu va yena ntwanano wa vuprista lowu nga heriki, hikuva u hisekele Xikwembu xa yena, kutani u endlele vana va Israele mhamba.”

₁₄Vito ra wanuna wa Israele la dlayiweke ni wansati wa Midiyani, a a ri Zimri, n'wana Salu, hosi ya nyimba ya va Simiyoni. ₁₅Vito ra wansati wa Midiyani la dlayiweke, a a ri Kozibi, n'wana Suru, la nga hosi ya nyimba yin'wana ya va Midiyani.

₁₆Yehovha a byela Muxe, a ku: ₁₇“Hlayani Vamidiyani kukotisa valala va n'wina, mi va dlaya; ₁₈hikuva va mi endlile valala va vona hi ku mi rivata hi mano ya vona emhakeni ya Peyori, ni le mhakeni ya Kozibi n'wana hosi yin'wana ya Midiyani, a ri makwavo wa vona, la nga dlawa siku ra khombo leri nga humelela emhakeni ya Peyori.”